ياوجودي كل يوم وكل ساعـه = وجد من شيب وعقب الشيب طاحي

شايب تعبان ولا عنده مناعه = وألمراض تجيه من كل النواحي

والعـيال مواصلينه بالقطاعـه = لا كلام ولا سلام بالصباحـي

عزتيلـه اشهد انه لاع لاعـه = ومتلا قلبه من طعـون وجراحـي

واشهد انه ماتهنا بالسناعه = ولاعرف طعم الحلاه من القراحي

يحسب عياله من شيوخ الجماعه = ويحسب عياله من طيور الفلاحي

وياوجودي لا كشف نـور بسطاعه = وياوجودي لامشـت برق ولاحـي

والله انها عذبتني ياجماعه = وشفت انا من عقبها نجم الصباحي

والله اني مولـع فيها ولاعـه = والله اني محزنن عقب الفراحـي

من ردي حظـي ومن زود القلاعـه = دامرآ حظـي ولا منه صلاحـي

حظ منهو حظه بسمـع وطاعـه = تمشي قدامه حظوظـه بالسلاحـي

وياوجودي لانوى فكـري قطاعـه = قام قلبي وأنفصل عني وراحي

كيف بنساها وهي اغلى بضاعه = والبضايع ماتخلى في البراحي

وياوجودي كل يوم وكل ساعـه = وجد من ودع حبيبه بالنياحي