علمي بها بأيام سن الطفوله

[الاطرق بن بدر آل هذال]

كل عام وأنتم بخير

بقلمي المتواضع

علمي بها بأيام ســـــن الطفـــوله=
=عهد البرائه والغلا بين الاطــفــال

نلعب ونمرح وانتلاقا بسهــولــــه=
=نتبادل الضحكه على كل الأشكـــال

لو اتأخر يوم جــتني ذهــولــــــــه=
=يسوقها لي الغلا دون مرســــــــال

حتى منامي بعض الأحيان حـولـــه=
=متعودٍ معها على الضحك وجــــدال

بالليل اخوّفــها ولاهـــي زعــــولــه=
=تقـول مانـي خـايفـــه وانت حــــيال

لاقلت جاك الذيب جتني جـفولـــــه=
=وليا اشبكتني قلت ياعمــري ظـلال

وكم مرةٍ قلــت ادرســي ياكسـولـه=
=تضحك وتعفشني تقول انت محـتال

ماني سواتك وتحسبني مهبولـــــه=
=شطّوره ولابي مثل غيري هــــــبال

وكم مـرّةٍ مــثّلت دور البطـــولــــــه=
=افـزعلها واسـوّي ســوات الأبطـــال

كل ماأشتكت من طفل زوّد فضـولـــه=
=ابهــدلـــه واعطــيه كــفٍ لـياعــــال

كبرت وصارت نور عيني خجــولــه=
=واصبح وجودي حولها يسبب اشكال

قالت تضل النفــس يمــّك مـيولـــــه=
=واشفــق لشوفـك يابعــد كـل الأزوال

والله مانــي من وجــودك ملــولــه=
=لكــن بلاي بعينهم صــرت رجـــال

زولك طويل وصعب حولـي قبولـه=
=ومرات اشوفك تلبس شماغ وعقال

ترى الأهل راحو لبوك وشكــولــه=
=وادري المفارق بيننا فيه غربـــال

والله مهما حاولــو أو حـكـولــــــه=
=تبقى الحبيب اللي له القلب مــيّال

ياما منعني والدي عن وصولـــــه=
=وياما على ضهري عطاني من عقال

قال الغلا له حـد واعــرف اصـولــه=
=واللي مثل سنّك يصيرون عقّــــــال

مايدري ان العقل صعــبٍ حلولــــه=
=واجسامنا تنبض بها قلوب جهّـــال

وشفيك يادنيا مــشيتي عـجـــولـــــه=
=كم ضاع بأسبابك أمــــانـي وآمـــال

من بعـــد ماكنت انتظر شوف زولـه=
=قامت تبكينــي صـــورها والأطـــلال

الروح صارت بالفــراق معــلولـــه=
=وصار الغلا لصويحبي حب بهبــال

ياحظ منهو في حـــياته ينولـــــــــه=
=ملاك بعيوني على الأرض تخـــتال

جاها حظيظٍ غيري ووافـقـولــــــه=
=وتحطــمـت بقلوبنا كــل الآمـــــــال

راحـت بعــيد وصارت بغير دولــــه=
=لكـــن غـلاهـا بالحــشا حــــي لازل

ماطـاع قلــبي في غلاهـا عــذولــه=
=ولايمكــن انساها ولا أطيع عـــذال

ليت الزمن يرجع بنا للطـفولـــــــه=
=وابقـى طفل . ماودّي اصير رجّــال

الاطرق بن بدر الهذال

[فرحة الدنيا]

وأنت بخير
قصيدة جميلة جدا جدا ما أجمل الحب وأصعبه
تحياتي لك

[فراشه دلوعه]

اخوي
أنا شهادتي فيك مجروحه بصراحه
ومهما أبدي رأيي في قصايدك وأبياتك اللي تمطر بسيل من الاحساس والعذوبه
ماراح توفي لك حقك..مشكور على تواجدك الدائم
ومشكور على هالقصيده الأكثر من رائعة

[سندريلا الناعمه]

الاطرق بن بدر آل هذال

مبدع الشاعر,, اتقنت العزف فهنيئاً لك

استمتعت جداً بقراءه قصيدتك

دمت و دام عزفك الرائـع ولحنك العذب

لك أجمل تحية

أختك//سندريلا الناعمه

[الاطرق بن بدر آل هذال]

المشاركة الأصلية كتبت بواسطة فرحة الدنيا

وأنت بخير
قصيدة جميلة جدا جدا ما أجمل الحب وأصعبه
تحياتي لك

فرحة الدنيا

كل عام وانتي بخير ومن العايدين


تسلمين الوف وملايين على تكرمك بالمرور


الف الف شكر لك


تقبلي مني كل التقدير