عـودة للخلف   منتديات تعب قلبي > منتديات تعب قلبي للقصص والروايات > روايات تعب قلبي


شجرة الإعجاب41إعجاب

إضافة رد
 
أدوات الموضوع
قديم(ـة) 29-03-12, 03:52 PM   #1
|[ عـضـو مـشـارك ]|

 
صورة مزوووونه الرمزية
 
الدولة: المملكة العربية السعودية
الافتراضي أنا أميرة وهذي قصة حياتي - للكاتبة نيران القهر


السلام عليكم
اخباركم
انا جبت لكم روايه عجبتني كثيييييير للكاتبه (نيران القهر)
يله بسم الله
______________________________

لحظات واوقات كثير نشعر فيها بالحقد
نشعر فيها بالكره لانفسنا ولكل من جرحنا
لكل من ابتسم في اوقات ذرفنا لدموع القهر
لكل من جعل السواد يزحف الى قلوبنا
انا فتاه عشقت الخيال وفضلته على الواقع في اوقات كثيره
عشقت الابتسامات التي ترسمها لي مخيلتي واستبدلت دموع قهري بابتسامات مخيلاتي البريئه
ساطرح في روايتي كل ما شعرت به واوصله عن طريق شخصياتي
احاسيس شخصياتي طلعت من نابع قلبي وارجوا ان تصل الى قلوبكم
وساكون خلف الستار وخلف لقب يمثل ما اشعر به في الخفاء
لا احلل لاي احد نقل روايتي بدون ذكر اسمي عليها(نيران القهر)
ارجوا ان ينال اعجابكم ما خطته يداي
_______________________

(انا اميره وهذي قصة حياتي )
البارت الاول
_____________________________

وقفت وهي لابسه اسود ووجها مبين عليه التعب:لا يا عمي انا واخواني ما راح نطلع من بيتنا
العم:بس انتي شايفه الحال ابوك ما ترك الا الديون كيف بتصرفين عليهم هذا غير الديانه اللي يطالبون ابوك
طالعته وبإصرار وكبرياء:بندبر نفسنا
العم اللي طالع البيت وكأنه يقول كيف
لفت وجهها وبإصرار اكثر:جزاك الله خير يا عمي بس انا واخواني نعرف نصرف امورنا
العم طلع من جيبه فلوس ومد يده
طالعت يده وباستغراب:وش هذا
العم وهو يمسك يدها ويحط الفلوس فيها:اخذي هذي مساعده لك ولاخوانك
مدت الفلوس وبكبرياء:ابوي ما رباني اخذ حسنه من احد وانا قلت بدبر اموري انا واخواني
العم مشى وتركها مكانها ولا اهتم لكلامها بس التفت عليها لما سمع صوت الفلوس وهي تقطعها لنصفين
طالعها وسمعها تقول ببرود:قلت لك ما احب الحسنات وفمان الله يا عمي
العم هز راسه بياس ومشى طالع من المكان وهي مشت وجلست على الكنب البسيط اللي عباره عن كنبتين وحطت راسها بين يديها وبهمس:يارب عيني يارب اكون دائما قويه وتظل كرامتي مرفوعه وكرامة ابوي وما امد يدي لاحد ابد ما ادري وش اسوي يا يبه ما ادري .....
(الحدث اللي قريتوه كان من 6 سنوات اخر مره شفت فيها عمي في هالست سنوات صارت اشياء كثيره بعد وفاة ابوي وامي
كثير ناس قالوا عني كلام وكثير ناس طلعوا عني اشاعات
في منهم من قال:عانس ليه لاني وصلت الـ27 وما تزوجت
وفي منهم من قال اني اصرف على اخواني من حرام وفي منهم من قال اني اعرف شباب
وكلام كثير لو اعده راح يشيب الراس
في البدايه كنت اتضايق واحيانا توصل معي اني ابكي من القهر بس واقعي قساني واجبرني اكون قويه ما انهز ولا اتاثر واكون فولاذيه
واقعي علمني ان وقت الشده اكون حجر علمني اني ما اضعف وعلمني اني اتعايش في هالعالم بكل ما فيه وما اعتمد الا على نفسي ولا اثق الا بنفسي
من انا ؟ انا اميره )
:اميره تسمعيني
لفت لها وبتعب:نعم وش تبغين يا حلا
حلا اللي لابسه مريولها:وش فيك من ساعه وانا اناديك وانتي ما تردين
اميره وهي تمسح وجهها بيدها:ما سمعتك يا قلبي كنت سرحانه
حلا:ترى بيجي الباص بعد شوي
اميره وهي تطالع الساعه وتطالع حلا وتوها تستوعب ان حلا لابسه مريولها وقفت وبصربعه:ما سويت لكم شي تاكلونه قبل لا تروحون المدرسه
طلعت من الصاله وهي مسرعه للمطبخ
وبعد ثواني
دخلت عليها اختها الثانيه وهي تمشط شعرها:صباح الخير
اميره وهي تسخن الحليب:صباح النور
شافت اختها مبين عليها التعب والارهاق تنهدت وهي عارفه انها ما نامت طول الليل همست وهي تشوف اختها تجهز الفطور:لا تسوين شي اصلا ما يمدي
اميره اللي طالعتها وهي تلوم نفسها:والله ما انتبهت على الوقت يا ياسمين
ياسمين وهي تبتسم:مو مشكله انتي سوي شندويش جبن على السريع وبناخذهم المدرسه وبنفطر على الفسحه
اميره وهي تبتسم ابتسامه باهته:ماشي
بدت اميره تسوي السندويشات وتلفهم
دخلت عليهم وهي تتأفف وضربت كتف ياسمين:يا حماره وين الشباصه حقتي
ياسمين اللي انفجعت وحطت يدها على كتفها:وش فيك خوفتيني يا هويدا
هويدا بقرف:لا تكفين يا رقيقه ترى مو ضابط رقه وفقر ما يجتمعون
اميره اللي عصبها اسلوب هويدا:انتي هيه الناس من الصباح تقول يالله صباح خير وانتي جايه ولسانك وش طوله
هويدا وهي تتخصر:يالله صباح خير ها قلناها ...كملت وهي تلتفت على ياسمين:يا بقره وين شباصتي
ياسمين :والله ما اخذتها
هويدا بتحذير:لو اشوفك يا حيوانه ماخذه شي من اغراضي بوريك
مشت وهي تتحلطم وتسب واخر الكلمات اللي طلعت منها:فقر في فقر لا واذا قلنا شي قالت اصرف عليكم من زي الشغل عاد ....
اميره اللي حست ان اختها زودتها ولسانها طال ولا صارت تحترم احد مشت بتلحق هويدا الا ياسمين وقفتها:تكفين يا اميره لا تروحين لها
اميره بعصبيه:خليني اروح واربيها شكلها ما تربت زين
ياسمين:الله يخليك خليها تولي ولا تهتمين للكلام اللي تقوله
اميره سكتت وهي تحس انها لحد الحين خاطرها تعطي هويدا كم كف علشان تتعدل
ياسمين:علشان خاطري طنشيها
اميره طالعت ياسمين وتعوذت من الشيطان وزفرت وهي تحاول تهدي اعصابها
دخل عليهم وهو في يده بدلة الرياضه:اميره شوفي
ياسمين:عثومه قول صباح الخير بعدين قل اميره شوفي
عثمان:صح نسيت صباح الخير
اميره اللي حست انها بتضحك على عثمان اللي على نياته :صباح النور
عثمان وهو يمد تيشيرت البدله:شوفي مشقوقه كيف البسها
اميره وهي تتنهد:مو اخر مره خيطتها لك
عثمان:الا بس التيشرت صار قديم كم مره تخيطينه
اميره وهي تطالع التيشرت اللي مبين عليه قديم وحالته حاله:معاك حق
ياسمين:طيب وش بتسوي الحين
عثمان وهو يهز اكتافه:ما ادري ...طالع اميره وكأنه يقولها وش الحل
اميره وهي تفكر طرت على بالها منقذتها:لحظه شوي وراجعه
عثمان وياسمين:طيب
طلعت من المطبخ وراحت للصاله ومسكت التلفون واتصلت على الرقم الوحيد اللي حافظته وهي تدعي في قلبها انها ترد:الو
اميره:صباح الخير
ردت عليها بابتسامه:يا صباح الفل والياسمين اخبارك يا بطه
اميره بابتسامه:انا الحمد لله بخير وانتي
:انا الحمد لله تمام
اميره بإحراج:اقول نجلاء انا داخله على الله ثم عليك مو عارفه وش اسوي
نجلاء:افا وش صاير
اميره:ابد عثمان تيشيرته انشق وعنده اليوم حصة رياضه ومو عارفه وش اسوي قلت اتصل عليك يمكن يكون عندك حل
نجلاء وهي تفكر:صدق مشكله بس لحظه شوي
اميره:طيب
ثواني ورجعت نجلاء:اقولك عندي تيشيرت لاخوي حسان هو صحيح قديم بس هذا اللي عندي
اميره:مو مشكله اهم شي يلقى شي يروح به لحد ما اشتري له واحد جديد
نجلاء:خلاص برسله مع حسان عليكم
اميره:دائما تنقذيني في اصعب المواقف
نجلاء:هههههههههه ولا يهمك احنا خوات
اميره:اكيد الحين انا بصكر ووقت ثاني اتصل عليك
نجلاء:ماشي فمان الله
اميره:بحفظ الله
صكرت السماعه وهي تتنهد براحه لانها لقت شي يمشي عثمان به اموره لحد ما توفر فلوس بدله جديده له
رفعت يديها وهي تحسب احتمال سعر البدله الرياضيه وبهمس:65 مقدور عليها مو صعبه
لحظات ودخلت عليها ياسمين وهي لابسه عبايتها:اميره ترى الباص جاء
قامت اميره ولبست عبايتها على السريع وبرقعها
ووقفت لخواتها عند الباب علشان تتطمن انهم ركبوا الباص
طلعت اول وحده حلا باستها وودعتها وراحت للباص اللي يوقف في بداية الشارع لان شارع بيتهم ضيق
مرت هويدا ولا عبرة اميره اللي قعدت تتعوذ من الشيطان لا تمد يدها عليها
اخر وحده كانت ياسمين وقبل لا تطلع:اميره لا تنسين الاغراض اللي قلت لك نبغاها انا وحلا علشان مادة الفنيه
اميره اللي ما طرت على بالها الاغراض ردت بكذب:لا تخافين ما نسيت
باستها ياسمين وراحت وراء خواتها تلحق على الباص وقبل لا تصك اميره باب بيتهم شافت حسان جاي جهتهم وعطاها الكيس:هذا من نجلاء
خذت اميره الكيس ودخلت وصكت الباب وعطته لعثمان اللي بان على وجهه عدم الرضا بس رجع ابتسم لما وعدته تشتري له بدله جديده وهي بينها وبين نفسها تحسب كم ممكن تكون سعر كل الاغراض اللي تفكر تشتريها لعثمان ولخواتها
________________________________
مزوووونه غير متصل   الرد باقتباس
قديم(ـة) 29-03-12, 03:55 PM   #2
|[ عـضـو مـشـارك ]|

 
صورة مزوووونه الرمزية
 
الدولة: المملكة العربية السعودية
الافتراضي رد: أنا أميرة وهذي قصة حياتي / للكاتبة : نيران القهر


تـــــــــــــــــــابـــع

في مكان يختلف 180 درجه
جالسين والخدم يصبون الشاهي
جالسه مع زوجها وتفطر وبهدوء:اقول ابراهيم
ابراهيم:نعم
شربت من الشاهي شوي وبعدها كملت:وش فيك على الولد
طالعها وباستغراب:أي ولد فيهم تقصدين يا منيره
منيره:في غيره اقصد راشد
ابراهيم اللي تعكر مزاجه:لا تعكرين مزاجي من صباح الله خير
منيره:وليه الولد وش مسوي لك
ابراهيم:قولي وش ما سوى
منيره:الولد صار رجال وعمره 22 سنه يعني ما يصير اللي تسويه معاه
ابراهيم وهو يطالعها من طرف عينه:ووش مسوي انا
منيره:ما يصير تاخذ مفتاح السياره وجواله وبطاقة الصراف منه
ابراهيم وهو يوقف:يصير ونص هذا كله من حلالي
منيره توها بتتكلم الا قاطعها ابراهيم:منيره لا تعورين راسي وراسك انا عارف انك بتقولين رجع له كل شي اخذته منه وانا اقولك لا واغسلي يديك انتي وهو ...كمل وهو ياخذ شنطته:ما له شي عندي وخله يصرف على نفسه ويجيب سياره من عرق جبينه وبسه عاد جلسه في البيت كأنه بنت
طلع ابراهيم وهو يحس ان طاري راشد فعلا عكر له مزاجه
منيره بتافف:اوووووف كل كلمه والثانيه بنت وبنت اوووف صدق انك رجال تملل
كملت فطورها وهي تفكر كيف ترجع لراشد حبيب قلبها كل شي اخذه منه ابوه

_____________________

نزلت من التاكسي وهي تحمد ربها انها وصلت في كل مره تركب فيه تاكسي تحس بالخوف لا يصير فيها مثل ما يصير للناس اللي تسمع قصصهم مع اصحاب التكاسي
دخلت مكان شغلها وصعدت الدرج واول ماوصلت دخلت الغرفه للعاملات وفسخت عبايتها وحطت ابريق الشاهي على النار وبعد ما تسخن صبته في كاسات صغيره وحطته في صينيه وبدت تمر على موظفات البنك
دخلت على غرفته تحتوي على ثلاث مكاتب:السلام
الموظفات:وعليكم السلام
حطت الشاهي وهي تسمع الموظفات يسولفون
الموظفه الاولى :والله هالرجال كرهني في عيشتي ما ادري لمتى بصبر عليه
الموظفه الثانيه:ليه وش مسوي هالمره
الموظفه الاولى:يسهر ولا يرجع الا متاخر صايره العيشه معاه ما تنطاق
طلعت من الغرفه وبخاطرها:العيشه معاه ماتنطاق لانه يسهر هههه المسكينه ما تدري انه منحاش منها الله لا يبلانا
بعد ما خلصت توزيع الشاهي على الموظفات رجعت غرفة العاملات وخذت الممسحه وبدت تمسح الارضيه وبخاطرها:لو كملت دراسه كان انا وراء مكتب من هالمكاتب وكان مكاني وحده ثانيه .... كملت وهي تتنهد اااااه الحمد لله على كل حال الكلام في الماضي ما يغير شي
وقفت مسح وهي ترجع للماضي:
(:بس انا احبك ليه رفضتيني ليه يا اميره
تلفتت تتاكد ان ما في احد موجود وشدت عبايتها على نفسها:روح لاحد يشوفني واقفه معاك بعدين يألف علي كلام ولا يفهم غلط
طالعها وبقهر:انا ما يهمني الحين غير اعرف ليه رفضتيني
اميره وهي تلف وجهها:اااابغى اكمل دراستي وانا توني صغيره على الزواج
طالعها وبسخريه:هذا مو عذر انا قلت بخليك تسوين كل اللي في خاطرك و بحقق لك كل شي تتمنينه
اميره وهي تطالعه:بس انا ما ابغى
طالعها وباصرار:يعني مو سبب الرفض الدراسه
اميره بغرور وقسوه :اصلا لو انت تفهم كان فهمت من البدايه وما خطبتني مره ثانيه كان فهمت من اول مره رفضتك فيها اني ما ابغاك خلاص عاد اوووف
مشت من قدامه تاركته جسد بدون روح تاركته محطم تاركته يشوقف حلم وحب طفولته يتلاشي قدام عيونه)
رجعت لحاضرها:يا ترى انت الحين حي ولا ميت .... ابتسمت بخفه وهي تكمل:خسرت والسبب غروري يا ليت الندم ينفع اااااه ..رجعت تطالع الممسحه:اكمل شغل احسن لي

_____________________

في المدرسه نزلت من درج السطح وهي تعدل ازرار مريولها ولفت على البويا اللي وراها ومدت يدها:يله هاتي فلوسي
البويا وهي تطلع الفلوس من جيب مريولها وتحطها في يدها:اخذي يا عسل بس بكره مثل كذا يا حياتي
طالعتها وبوقاحه:انتي جهزي فلوسك وبعدها تعالي تكلمي
قبل لا تمشي مسكت يدها وبهمس:الفلوس بكره بتكون موجوده بس اهم شي انتي....كملت وهي تغمز:تكونين موجوده
بعدت يدها وبرفعة حاجب:مدام الفلوس موجوده انا موجوده
مشت وهي تحط الفلوس في جيبها وقابلتها سهام
سهام بهمس:ها خذيتي المقسوم
هويدا وهي تطلع الفلوس من جيبها:ايه
سعام وهي تشوف الفلوس اللي طلعتها هويدا:اوووف انتي اليوم مع مين
هويدا وهي تبتسم:حنان
سهام وهي تطالعها بتفاجا:قصدك اللي مسميه نفسها وليد
نجوي:يب
سهام:يا حظك طحتي على تجوري
هويدا:ههههه اكيد اطيح على تجوري انا هويدا مو حيا الله
سهام:حظك يكسر الصخر
هويدا وهي تشوف رقبة سهام ومبينه حمراء:ههههههههه انتي مع مين اللي مسوي فيك كذا
سهام اللي تعدل ياقة مريولها:اسكتي مع دحوم صدق حمار اقصد حماره
هويدا:ههههههههههههه عسى على هالالوان بس خذيتي شي يستاهل
سهام:خذيت شي مو بطال
هويدا:حلو
سمعوا الجرس يرن
هويدا:اوووووف الحين علينا هالعله ابلة الحديث
سهام:وش رايك نسحب عليها
هويدا:ليه لا نسحب عليها وعلى اللي خلفوها بعد
سهام وهي تمسك يدها:يله
هويدا:يله
مشوا وسحبوا على حصة الحديث وفرحانين بالكم قرش اللي يكسبونه بعد ما يغضبون ربهم

_________________________

نزل من الدرج ولقى امه جالسه:سلام
منيره:وعليكم السلام
شاف امه سرحانه:يمه وش فيك
منيره:وش فيني يعني يا سيف قاعده افكر
سيف بشك:باخوي ناصر
منيره:ايه افكر برجعته
سيف:تتوقعين ليه بيرجع الحين
منيره:ليه انت ما تبغى اخوك يرجع
سيف:لا يالغاليه اكيد ابغاه يرجع بس مستغرب من 6 سنين وهو مسافر وفجاه قرر يرجع
منيره:من يوم تزوج وهو مسافر وحارق قلوبنا ويا ليت على سبب يقنع
سيف اللي ما يحب امه تتكلم بفوقيه عن الناس:يمه ما يصلح تتكلمين عن الناس كذا
منيره بعصبيه :اذا مو عاجبك كلامي ارجع لغرفتك ...كملت منيره بقهر:حسبي الله عليها حرقت قلبي وقلب ولدي الله يزيد عليها اللي هي فيه ان شاء الله
سيف اللي حس انه تضايق من كلام امه ودعاويها قام من مكانه ورجع يصعد الدرج راجع لغرفته تارك منيره اللي تكمل دعائها:حوبتنا ما تتعداك ان شاء الله يا بنت الفقر

___________________________

انتهى البارت
_____________________________________

اتمنى من صميم قلبي ان ما خطته يداي ينال رقي اذواقكم
طبعا انا بمشي مع الكاتبه في تنزيل البارتات ولو لقيت تفاعل كملت ولو ما لقيت شليت قشي ووقفت
مزوووونه غير متصل   الرد باقتباس
قديم(ـة) 30-03-12, 12:21 AM   #3
|[ عـضـو ذهـبــي ]|

 
صورة حـلآ جـدة الرمزية
 
الدولة: المملكة العربية السعودية
الافتراضي رد: أنا أميرة وهذي قصة حياتي / للكاتبة : نيران القهر

مره حلو تسلمي انأتشرف اني اكون اول وحده اشجعك كملي الروايه فلاويه
حـلآ جـدة غير متصل   الرد باقتباس
قديم(ـة) 31-03-12, 03:29 AM   #4
|[ عـضـو مـبــدع ]|

 
صورة هنودة ارق بنوته الرمزية
 
الدولة: المملكة العربية السعودية
الافتراضي رد: أنا أميرة وهذي قصة حياتي - للكاتبة نيران القهر

حلوة مرة ارجو منك تكمليها باشرع وقت ترى والله تحمستنا يا مزونه
مزوووونه نالت إعجابه.
هنودة ارق بنوته غير متصل   الرد باقتباس
قديم(ـة) 31-03-12, 09:37 AM   #5
|[ عـضـو نـشـيـط ]|

 
صورة Mǿŗy Cǿǿl الرمزية
 
الدولة:
الافتراضي رد: أنا أميرة وهذي قصة حياتي - للكاتبة نيران القهر

ااااااااااااااااااااااااااه
حلوووووه القصه جدآ كمليها وبس مو عارف وش اقول
الله يوفقك
مزوووونه نالت إعجابه.
Mǿŗy Cǿǿl غير متصل   الرد باقتباس
قديم(ـة) 31-03-12, 11:26 AM   #6
|[ عـضـو مـشـارك ]|

 
صورة مزوووونه الرمزية
 
الدولة: المملكة العربية السعودية
الافتراضي رد: أنا أميرة وهذي قصة حياتي / للكاتبة : نيران القهر

اقتباس:
المشاركة الأساسية كتبها هنودة ارق بنوته مشاهدة المشاركة
حلوة مرة ارجو منك تكمليها باشرع وقت ترى والله تحمستنا يا مزونه
هلا وغلا
عيونك الحلوه ومن عيوني الحين انزل البارت الثاني
وان شاء الله دوم هالحماس
منوره يا غلاي
اقتباس:
المشاركة الأساسية كتبها omar almahdi مشاهدة المشاركة
ااااااااااااااااااااااااااه
حلوووووه القصه جدآ كمليها وبس مو عارف وش اقول
الله يوفقك
هلا وغلا
ما طلبت شي الحين اكملها ووياك في الدعوه
منور خيو
اقتباس:
المشاركة الأساسية كتبها جده بدوني مالها حلا مشاهدة المشاركة
مره حلو تسلمي انأتشرف اني اكون اول وحده اشجعك كملي الروايه فلاويه
هلا وغلا والله
انا اللي يشرفتي تكونين اول من يرد وتسلمين على التشجيع
منورتني يالغلا
مزوووونه غير متصل   الرد باقتباس
قديم(ـة) 31-03-12, 11:31 AM   #7
|[ عـضـو مـشـارك ]|

 
صورة مزوووونه الرمزية
 
الدولة: المملكة العربية السعودية
الافتراضي رد: أنا أميرة وهذي قصة حياتي - للكاتبة نيران القهر


____________________
أنا أميرة وهذي قصة حياتي
_______________________

البارت الثاني
___________________

طالعت اختها وهي حاسه بقهر
تكلمت صديقتها اللي لاحظت نظراتها:ياسمين لا تطالعينها بعدين تحس
ياسمين بقهر:احسن انا ابغاها تحس ولو ما حست بكلمها في البيت يا بسمه
بسمه بخوف:لا اخاف تدري اني انا اللي قلت لك
ياسمين:لا تخافين ما راح تدري وبعدين ما اقدر اسكت عن معصية الله
بسمه بخوف:اوووف يا ليتني ما قلت لك يا ليت يوم شفتها سكت كان احسن
ياسمين طالعت صديقتها وسكتت
بسمه بشك:وش بتقولين لها
ياسمين:بقول لها اني انا الي لمحتها نازله من الدرج ولو ما عقلت بهددها اني بقول لاميره
بسمه:اختك هذي مو صاحيه
ياسمين:الله لا يخفس فينا بسببها استغفر الله
بسمه سكتت وفي خاطرها :سبحان من خلق وفرق ياسمين طيبه وحبوبه وهاديه وعاقله وهالهويدا مقرفه وقليلة حيا ومو متربيه وراعية مشاكل سبحان الله من يصدق انهم خوات
صحت من شرودها على صوت ياسمين:نعم
ياسمين:وين رحتي قاعده اكلمك وما تردين
بسمه:معاك
ياسمين وهي تطالع اختها:خلينا نروح الفصل
بسمه وهي الثانيه تطالع هويدا اللي تضحك:يله
مشوا متوجهين لفصلهم وكل وحده بالها مو معاها
_____________________________

طقت الباب:طق طق طق
سمعت صوت:تفضلي
فتحت الباب ودخلت:نعم طلبتيني
الموظفه المسؤوله:ايه تفضلي اجلسي يا اميره
بعد ما جلست اميره:امري
الموظفه:ما يامر عليك انا بس بغيتك علشان سالفة الشغل الاضافي إلي قلتي لي ادور لك عليه
اميره بلهفه:لقيتي لي شغله اضافيه
الموظفه:هي مو شغله بالضبط بس فيها فلوس
اميره بشك:كيف يعني مو شغله لا يكون شي مو حلال
الموظفه بسرعه:لا لا استغفر الله اكيد ما راح ابغى لك الشين بس هي مقدمه ومضيفه
اميره :بعد ما فهمت كيف يعني
الموظفه:انا عندي صديقه عندها محل عاملات يعني أي حفله او عزيمه عند الناس الكبار يتصلون فيها ويطلبون عاملات يقدمون الشاهي والقهوه والحلويات لضيوفهم فهمتي وش معنى مضيفه يعني تضيفين الناس وترتبين الامور مع العاملات
اميره بعم اقتناع:لا ما ينفع اصلا اول مره اسمع بها الشغله
الموظفه:هي الفكره توها جديده بس مع الوقت بتصير معروفه وترى مكسبها حلو
اميره:بس صعبه ادخل بيوت الناس
الموظفه:مو انتي لحالك ترى معك 10 عاملات منهم من ينظف ومنهم من يقدم وانا قلت لصديقتي تخليك مسؤوله على العاملات و تساعدينهم بنفس الوقت
اميره سكتت وهي تفكر
الموظفه:اميره ترى ربحها حلو وترى كل إلي تقعدينه اربع او خمس ساعات وقت العزيمه او الحفله بس
اميره:والله ما ادري
الموظفه:ترى راتبها 2500 هذا غير الاكراميات
اميره بحيره:خليني افكر وبعدها ارد عليك
الموظفه:على راحتك بس لا تتاخرين بالرد
اميره وهي توقف:ان شاء الله ومشكوره لانك ما نسيتي موضوعي
الموظفه بابتسامه:ولا يهمك انا اعين واعاون
اميره:مشكوره ....طلعت من غرفة المكتب وهي تحسبها في راسها :وش فيك يا اميره الشغله حلوه واحسن واريح من المشغل الي انا فيه وبالمره ارتاح من صاحبة المشغل واسلوبها الزفت معاي وبعدين راتبها اكثر 2500 حلوين مع راتب الشغل في البنك مع تخييط الملابس يطلعون فلوس حلوين ونصير مرتاحين ..ابتسمت بضيق:أي مرتاحين يا حسره استغفر الله انا وش قاعده اقول الحمد لله على النعمه انا اتوكل على الله واوافق احسن لي بس لازم احسب حساب ان اخواني بيظلون لحالهم مو مشكله اقول لنجلاء تظل معاهم ولا اخليهم عندها ايه هذا احسن حل
_______________________

طلعت من المطبخ بعد ما تاكدت ان الخدم ضبطوا كل شي للغداء
شافته ينزل من الدرج ويتثاوب:صباح الخير يمه
منيره :أي صباح خير الا قول مساء الخير الناس صارت ظهر الحين
طالعها وبضيق:يمه مساء الخير او صباح الخير كله واحد وبعدين الواحد ما يمسي الا بنكد ولا يصبح الا بنكد
منيره اللي تعاطفت مع حبيب قلبها: مو قصدي انكد عليك يا يمه بس ابوك ذابحني يا راشد
راشد:اووووهووووو ما خلصنا من زمان وانا كذا نظامي ما تعب ابوي من اسطوانته المشروخه
منيره وهي تمشي للصاله وراشد معاها ويجلسون :لا ولا ظنتي بيتعب الا ما دريت ان اخوك بيرجع
راشد:الا بس غريبه بعد هالمده كلها يرجع
منيره بعصبيه:وش فيك انت واخوك كأنكم ما تبغونه يرجع بينا
راشد:لا والله مو كذا بس مستغربين ...قام من مكانه وجلس جنبها وباس راسها:لا تعصبين يا بعد عمر راشد بس انا قلت مستغرب
منيره اللي رق قلبها لراشد لانه حبيب قلبها:يقول بيرجع هنا وبينقل كل شغله هنا مل من الغربه
راشد:حلو الا صدق يمه مو غريبه زوجته ما حملت
منيره وهي تميل فمها:اكيد البلاء من اخوك انت تدري انه ما خذاها الا مغصوب علشان كذا ما وده بالعيال
راشد بتفاجا:وانتي وش عرفك انه ما يبغى منها عيال
منيره:ذاك اليوم كلمته وسألته قال بدري على عوار الراس ومو مستعجلين عليهم فانا فهمت انه ما يبغاهم
راشد وهو يحك دقنه:مدري كيف هالهنادي صابره عليه
منيره:تبغاها تترك هالخير إلي عند ناصر ما اتوقع حتى لو تعيش طول عمرها ما عندها عيال ما تتركه كانت في القاع وطلعها ناصر للسطح
راشد:معاك حق بس ما قلتي لي متى بيرجع يا يمه
منيره :بعد يومين ان شاء الله
راشد:يوصل بالسلامه الا صدق ما خذيتي من ابوي المفاتيح والبطاقه
منيره:لا والله ما قدرت معاند هالمره
راشد وهو يوقف:اوووووف من هالرجال اوووف
مشى تارك امه وراه إلي تناديه ولا رد عليها ورددت بقهر:حسبي الله ونعم وكيل ما يخلون هالولد يتهنى بشي دائما معذبينه وخانقينه
_______________________

نزلت من الباص هي وخواتها
ياسمين جنب حلا اما هويدا فكانت تمشي قدامهم ومعاها مفتاح البيت
ياسمين وهي تشوفه يطالعهم:هذا وش فيه واقف هنا
حلا:وانا وش عرفني يا كرهي له
ياسمين:لا تطالعينه بعدين يفكرنا مهتمين
حلا:وووووع اكرهه
ياسمين:ههههه يله ندخل البيت احسن
حلا:يله
دخلوا البيت بعد ما فتحت هويدا الباب ودخلت
اول ما دخلوا فسخوا عباياتهم
ياسمين وهي تمسك التلفون وتتصل :الو السلام عليكم – اخبارك يا نجلاء – احنا الحمد لله بخير – ايه وصلنا خلي عثمان يجي البيت – تسلمين والله يا نجلاء متعبينك معانا – مشكوره حبيبتي - طيب – فمان الله
صكت السماعه والتفتت على هويدا اللي متوجه للمطبخ توها بتروح لها الا رن التلفون
رفعت السماعه:الو
:الو ها وصلتوا
ياسمين:ههههه بالله عليك يا اميره لو ما وصلنا كيف برد عليك
اميره:هههههه ما تقدرين تقولين ايه وخلاص
ياسمين:ايه وصلنا
اميره:طيب وعثومه
ياسمين:الحين بيجي اتصلت في نجلاء وقلت لها تخليه يجي البيت
اميره:زين يلا انا الحين بصكر اكمل شغل تبغون شي
ياسمين:لا سلامتك
اميره:مع السلامه
ياسمين:فمان الله
صكرت السماعه وشافت هويدا طالعه من المطبخ وفي يدها كاس مويه :هويدا
لفت عليها:خير
ياسمين وهي تقرب:ابغى اقولك كلام
هويدا بملل:قولي
ياسمين:لا مو هنا خلينا نروح الغرفه
هويدا بسخريه:تكفين من كبر هالعشه علشان نتنقل فيه ترى الصوت يوصل
ياسمين:ماشي نتكلم هنا ...كتفت يديها على صدرها وهي تكمل:ابغى اعرف وش كنتي تسوين في السطح مع ذيك البويا
هويدا اللي طالعت ياسمين وتوترت:نعم انتي وش تخرفين وش بسوي في السطح
ياسمين:لا تقولين انك ما كنتي هناك لاني شفتك وانتي نازله
هويدا بعصبيه:لا تكذبين انتي ما شفتيني اكيد صديقتك المعفنه هي اللي قالت لك
ياسمين:انا ولا هي قالت لي هذا مو موضوعنا انا قاعده اسالك وش كنتي تسوين
هويدا وهي تقرب:ترى انا الكبيره مو انتي علشان تحاسبيني
ياسمين بعصبيه:المعصيه ما فيها كبير وصغير وحتى لو انتي كبيره واشوفك تسوين شي غلط بحاسبك وبعلمك ان الغلط راكبك من ساسك لراسك وان إلي تسوينه قلة ادب ويدل على انك ما تربيتي
صدى في المكان صوت الكف
حلا اللي توها طالعه من الغرفه لما سمعت صوت ياسمين شهقت وهي تشوف هويدا تضرب ياسمين كف
هويدا :هذا كف علشان تستوعبين نفسك ولو فكرتي تحاسبيني او تتدخلين في شي ما يعنيك مره ثانيه بيجيك شي اقوى منه فاهمه
مشت ودخلت الغرفه وضربت الباب وراها
حلا قربت من ياسمين اللي حاطه يدها على خدها وماسكه نفسها لا تبكي
حلا وهي تحظن ياسمين:كسر ان شاء الله في يديها حسبي الله عليها
ياسمين:اهئ اهئ اهئ
حلا اللي عيونها دمعت على ياسمين:والله لاعلم عليها اميره لاخليها تربيها هالحمار اللي ما تحط قدر لاحد
ياسمين وهي توخر عن حلا:لا تكفين اميره مو ناقصه عوار راس كافي اللي فيها
حلا وهي تحط يدها على خد ياسمين:بس...
قاطعها ياسمين:خلاص يا حلا قلت لا
سمعوا طق على الباب
ياسمين:روحي افتحي اكيد هذا عثوم
حلا وقلبها يعور على ياسمين باست راسها ومشت للباب تفتحه وياسمين راحت للحمام(اكرمكم الله) تغسل وجهها


بعد ساعه ونص
نزلت من التاكسي ودفعت الفلوس ومشت داخله الحاره
ولفت ودخلت في شارعهم وفتحت الشنطه تطلع مفتاح البيت بس رجعت على وراء بسرعه لما تفاجات بوجوده قدامها وبعصبيه ممزوجه بكتمان:خير
طالعها بنظرات هي تشمئز منها وتنقرف بمجرد التفكير في اللي يدور في باله عنها وبهمس:أبد بس حبيت اسلم
طالعتها من فوق لتحت:خير انت محرم لي ولا من بقية اهلي علشان تسلم علي واسلم عليك
طالعها من فوق لتحت:لو تبغين نكون اهل
بقرف جاوبته:اقول بس وخر عن طريقي
تجاوزته وسمعته يقول:الزمن بينا
طالعته بقرف واشمئزاز ومشت وهي تتحلطم:الله ياخذك والله ياخذ الساعه الي صرتوا فيها جيرانا
فتحت الباب ودخلت وفسخت عبايتها ودخلت للغرفه اللي بينها وبين حلا وعثمان:السلام عليكم
حلا:وعليكم السلام
اميره وهي تشوف عثمان نايم على الارض مكان ما تنام هي:تغديتوا
حلا:ايه..نزلت عيونها وهي تكمل:ياسمين غدتنا
اميره الي حست ان في حلا شي :وش فيك في شي مو تمام بالمدرسه
حلا عيونها امتلت دموع وهي تتذكر خد ياسمين الاحمر وهزت راسها بلا
اميره بخوف قربت وجلست جنبها على السرير الصغير :حبيبتي وش فيك
حلا وهي تمسح دموعها:مافي شي
اميره وهي ترفع وجهها بيديها:وش فيك تكلمي حبيبتي
حلا:بس انا وعدت ياسمين ما اقول لك
اميره الي خافت وحست في مصيبه:حلا بتقولين ولا كيف ترى خوفتيني
حلا:بس ما تقولين لياسمين اني علمتك
اميره بخوف:طيب بس قولي ياسمين وش فيها
حلا:تهاوشت مع هويدا وهويدا ضربتها كف وخلت ياسمين تبكي
اميره وهي متفاجاه:نعم وش قلتي
حلا وهي تبكي وقلبها يعورها على ياسمين الي شايلتهم شيل :والله كف يعور وخلتها تبكي
اميره وقفت وقبل لا تطلع من الغرفه:اميره تكفين لا تقولين ان انا اللي قلت لك والله تزعل مني ياسمين
اميره هزت راسها بطيب وطلعت من الغرفه وهي ناويه تأدب هويدا إلي تجاوزت حدودها
اميره بخاطرها:هالبنت زودتها كثير طوالت لسان وقلنا ماشي بس توصل انها تمد يدها لهنا وحدها
فتحت باب غرفتهم إلي كانت صغيره وما فيها الا سريرين صغار وشافت هويدا تحط في اظافيرها مناكير بعكس ياسمين إلي بان انها توترت من وجودها ولفت وجهها
اميره وهي تتظاهر بانها مو عارفه وش صاير:اخباركم مع المدرسه اليوم
ياسمين بهمس:الحمد لله
هويدا وهي تطالعها وتميل فمها:يعني وش بيكون زي كل يوم
اميره وهي تطالع هويدا:ياسمين تعالي ابغاك شوي
ياسمين اللي ما تبغى تقوم من مكانها واختها تشوف خدها ردت وهي في مكانها:وش بغيتي
اميره وهي ترفع حواجبها:قلت ابغاك تعالي
ياسمين وهي منزله راسها :انا تعبانه وبنام
اميره قربت منها ووقفت قدامها وهويدا صارت تطالعهم وبدا التوتر يبين عليها
اميره وهي تشوف ياسمين تنزل راسها:من الاحترام لما اكلمك تطالعيني ولا انا غلطانه
ياسمين وهي ترفع راسها:لا
اميره وهي تعقد حواجبها من اللي تشوفه وتمد يدها وتمسك ذقن ياسمين وتميل وجهها وتشوف خدها الاحمر ضغطت على اسنانها وتحاول تمسك اعصابها وتكمل تمثيل:وش فيه خدك من ضاربك
يا سمين سكتت وهي ما تبغى تزيد هموم اختها هموم وطالعت هويدا ونزلت عيونها
هويدا وهي توقف وبكذب:قلة الحياء والادب هي إلي سواء فيها كذا
لفت عليها اميره :وشو
هويدا:متهاوشه من بنت والبنت ضربتها ومنزلينها الادراه
طالعت اميره ياسمين وشافت الدموع تتجمع في عيونها وتنزل راسها وهالشي زاد قهرها
طالعت هويدا وبهمس:بجاحه وقوات عين بعد
هويدا:ها و.....
قاطعها الكف الي عطتها اياه اميره
ياسمين وهي تقوم من محلها وتوقف بين اميره وهويدا:اميره الله يخليك
هويدا بعصبيه وبصوت باكي:تضربيني
اميره بعصبيه: واكسر راسك بعد والله يا هويدا وهذاني حلفت لو اشوفك ماده يدك على احد من اخوانك بوريك شي عمرك ما شفتيه
هويدا سكتت وهي تمسك نفسها لا تبكي
ياسمين وهي واقفه بوجه اميره:خلاص هي ما..
اميره بعصبيه:بس انا قاعده اكلمها هي فاسكتي
ياسمين سكتت وصارت متفرجه
اميره وهي تبعد ياسمين وتقرب وتمسك بجامة هويدا وبتهديد:لو ادري بس انك مسويه شي ولا فصل من فصولك الناقصه بتشوفين شي بيخليك تكرهين نفسك
تركت هويدا ولفت على ياسمين:وانتي تعالي وراي
طلعت اميره وياسمين طالعت هويدا ومشت وراء اميره
اول ما دخلت للصاله البسيطه طالعتها اميره وبعتب: ليه تخلينها تضربك ليه تقولين لحلا ما تعلمني
ياسمين صارت تشاهق ونزلت راسها
اميره تنهدت وياسمين كاسره خاطرها ...قربت منها ورفعت وجهها:ليه حبيبتي ما بغيتي اعرف
ياسمين بصوت باكي:ما بغيت ازيد همك هم
اميره :ومن قال اني مهمومه
ياسمين وهي تشاهق:كافي انك تشتغلين ثلاث شغلات وكافي انك تسهرين وتحاولين تلبين لنا طلباتنا ما ابغى نزيد وجع راسك وجع قلب
اميره وهي تاخذها بحظنها:يا روحي انتي بالعكس انا لما اسوي كل هذا اكون مبسوطه لاني اشوفكم مبسوطين ولا تحطين في بالك انك لما تشتكين لي تزيديني هموم شيلي هالفكره من بالك لانها غلط فاهمه
ياسمين هزت راسها وهي تمسح دموعها
اميره:خليني اشوف خدك
ياسمين:ما يعور
اميره وهي تمسح على خدها:وش سبب هوشتكم
ياسمين طالعتها وبكذب:على شباصتها الي كانت تدورها الصباح
اميره إلي ما صدقتها:اها طيب حطي عليها ثلج علشان ما يورم خدك
ياسمين:طيب
طلعت ياسمين من الصاله واميره مشت لحد الكنبتين وجلست وهي تطالع خيال ياسمين وتهز راسها وتتنهد :مهما اقول ترجع وتخبي علي ااااه انا كنت جايه اقولهم على الشغل بس بعدين اقولهم اهم شي ارتب اموري مع نجلاء ...رفعت راسها وبهمس:يارب يكون هالشغل فاتحة خير علي يا رب
مزوووونه غير متصل   الرد باقتباس
قديم(ـة) 31-03-12, 11:34 AM   #8
|[ عـضـو مـشـارك ]|

 
صورة مزوووونه الرمزية
 
الدولة: المملكة العربية السعودية
الافتراضي رد: أنا أميرة وهذي قصة حياتي - للكاتبة نيران القهر


تــــــــــــابع

في مكان ثاني
منسدحه على سريرها وماسكه جوالها:هههههه ايه هالهويدا تكيف المزاج مضبوط انت كيف شفت نفسك مع هالسهام يا دحوم
دحوم(عاليه):لا تمام بس انت اللي طحت على صاروخ يا وليد
وليد (حنان):ههههه اقول قل ما شاء الله لا تصكني بعين إلا صدق بكره ليه ما راح تداوم
دحوم (علياء):والله احس اني تعبان شوي
وليد (حنان):طيب رح المستشفى ولا المستوصف
دحوم(عاليه):تعرفني ما احب المستشفيات وهالخرابيط
وليد(حنان):اعرفك بس ارتاح زين
دحوم(عاليه)طيب الا صدق بكره مع هويدا ولا في غيرها
وليد(حنان):لا معاها هالبنت ...كملت وهي تأشر على راسها:هي دخلت المزاج وبقوه
دحوم(عاليه):هههههه ما ألومك
_______________________

جالس في الصاله وماسك الجريده ويقرا أخر الأخبار
سمع صوت نزوله من الدرج نزل الجريده وشافه لابس وبيطلع وبصوت عالي:راشد
لف له وبملل:نعم
ابراهيم:نعامه ترفسك على وين
راشد وهو يطالع ابوه:طالع
طلعت منيره من المطبخ وهي تسمع ابراهيم:ما في طلعه
راشد وهو يطالع ابوه ورافع حواجبه:نعم وش قلت
ابراهيم:ما تسمع اقولك مافي طلعه
منيره وهي تدافع عن ولدها:ابراهيم وش فيك تراه رجال مو صغير علشان تمنعه من الطلعه
ابراهيم:لما يثبت لي انه كبر وترك عنه حركات المراهقات والمشاكل ذاك الوقت اقول انه صار رجال
راشد:لا تقول بزر انا رجال وسيد الرجاجيل بعد
ابراهيم بسخريه:لا والله ويالرجال وش سويت لابوك علشان تنفعه
راشد بتأفف:يعني الواحد ما يصير رجال الا اذا سوى لابوه شي خلاص هالافكار القديمه انتهى عصرها
ابراهيم وهو ضغطه بدا يرتفع من ولده:لا والله الحين نفعة الولد لابوه صارت موضه صدق عيال اخر زمن
راشد وهو يعطي ابوه ظهره وبملل:اااوه انا طالع
فتح الباب وطلع تارك وراه ابوه اللي ينده باسمه
ابراهيم بعد ما طنشه راشد وطلع لف على منيره:هذي اخر دلعك وتربية المايعه له حتى ابوه ما يقدره
طلع للدرج وهو يكلم نفسه بعصبيه
منيره وهي تشوف ابراهيم يصعد الدرج:اوووف منك يا انك رجال تحب الحنه والنكد اروح اكلم ام محمد ابرك لي
____________________

جالسه في الارض وتشرب شاهي
بعد ما حطت بيالة الشاهي:والله فرحت لك من كل قلبي واذا على اخوانك ولا يهمك انا اجلس عندهم
اميره:تسلمي لي والله مدري وش اسوي من دونك يا نجول
نجلاء:ولا يهمك بس انتي قلتي لهذي اللي جابت لك الوظيفه انك موافقه
اميره:ايه خفت اتاخر بالرد ويدورون غيري
نجلاء:ايه احسن خير البر عاجله
اميره:بس مو صعبه ادخل بيوت الناس
نجلاء:انتي مو لحالك معاك 10 عاملات يعني مافي شي يخوف وبعدين الراتب يستاهل على الاقل ترتاحين من ام خليل هالملسونه
اميره:هههههه ايه والله و بكره بروح وبقولها اني ما عاد ابغى اشتغل عندها بالمشغل
نجلاء:الحمد لله ربي بدا يفرجها من عنده
اميره:الحمد لله وانا بعد ما اضبط اموري في الشغله اسال لك راعية المحل اذا ممكن تخليك تشتغلين معانا
نجلاء بفرحه :تقدرين
اميره:مدري احاول وان شاء الله توافق وتجين تشتغلين معاي
نجلاء:ان شاء الله ....كملت وهي تشرب الشاهي:الا صدق انتي وش فيك
اميره باستغراب :وش فيني
نجلاء وهي تهمس لها:اول ما دخلت وانا احس ان فيك شي مو مضبوط
اميره تنهدت:ابد اليوم بغيت انجلط
نجلاء:بسم الله عليك لا يكون من هالحمار الي يوقف لك
اميره:منه ومن غيره
نجلاء باستغراب:غيره يا ويلي انتي ناقصه غيره من بعد ناشب لك غيره
اميره:هههه لا انا اقصد هويدا اختي
نجلاء وهي تميل فمها:وش مسويه هالعله هالمره
اميره بقهر:تخيلي ضاربه ياسمين كف
نجلاء وهي تشهق:حسبي الله وكسر ما لقت لا تضرب هالفقيره المسكينه
اميره:قهرتني لا ويوم سالت ياسمين جاتني هي وكذبت علي وتقول ياسمين متهاوشه
نجلاء بقهر:وبعدين
اميره:ابد ضربتها نفس الكف
نجلاء:احسن تستاهل ولو انا مكانك اكسر راسها بعد اختك هذي مو صاحيه يا مفشلتك في المدرسه يا مع حريم الحاره يا تضرب اخوانها
اميره:بس عورني قلبي يوم ضربتها والله ما كان ودي اضربها بس ابغى اعلمها ان كل شي وله عقاب
نجلاء وهي تحط يدها على يد اميره:الله يعينك عليها انا لو مكانك ما اتحملها وكان من زمان منومتها في المستشفى
اميره:ههههههههههه وش هالاجرام اقول اشربي شاهيك احسن من هالكلام ترى مو قاعده تعدلين حالي
نجلاء:ههههههههههه ما عرفت وش اقول لك
اميره: هههههه يا حبي لك
______________________

انتهى البارت
____________________

اتمنى ان ما خطتاه يداي يرقى لمستوى اذواقكم
واتمنى لكم قراءه ممتعه
مزوووونه غير متصل   الرد باقتباس
قديم(ـة) 31-03-12, 03:20 PM   #9
|[ عـضـو مـشـارك ]|

 
الدولة: المملكة العربية السعودية
الافتراضي رد: أنا أميرة وهذي قصة حياتي - للكاتبة نيران القهر

روووووعه تسلمين و ننتظر البارت الثالث
مزوووونه نالت إعجابه.
sh&n غير متصل   الرد باقتباس
قديم(ـة) 01-04-12, 01:59 PM   #10
|[ عـضـو مـشـارك ]|

 
صورة مجررد مرآهقــ الرمزية
 
الدولة: المملكة العربية السعودية
الافتراضي رد: أنا أميرة وهذي قصة حياتي - للكاتبة نيران القهر

قصصة رآآآآئععة

Like it
مزوووونه نالت إعجابه.
مجررد مرآهقــ غير متصل   الرد باقتباس
إضافة رد

الإشارات المرجعية

أدوات الموضوع

قوانين المشاركة
لا يمكنك إضافة مواضيع
لا يمكنك إضافة ردود
لا يمكنك إضافة مرفقات
لا يمكنك تعديل مشاركاتك

رمز [IMG] متاح
رموز HTML مغلق
Trackbacks are مغلق
Pingbacks are مغلق
Refbacks are مغلق


مواضيع مشابهة
الموضوع الكاتب المنتدى الردود آخر مشاركة
هذي صوٍرتي . . وهذي سآلفتهآ Ṁṁᴌσσ7н ♥ صور - كاريكاتير 34 07-10-11 02:55 PM
ذق نيران القهر يالغلا مثل ما ذاقها غيرك المهند الطيب خواطر - عذب الكلام 16 18-01-11 10:09 AM
صور مسن - القهر مـآذكرني عقبكْ إلاّ القهر ЗŷổổήҚ Đηiti صور و رمزيات واتساب WhatsApp - بلاكبيري blackberry - سكاي بي Skype – فيسبوك – تويتر – انستقرام 21 02-05-09 04:52 AM
وهذي هي نهاية حكايتها انا كلي لجل عينك رسائل الجوال – وتساب WhatsApp – برودكاست 9 11-08-08 03:23 PM
رجعه للحرب للحرب من جديد الـ ـحـ ـسـ ـاسـ نكت × نكت ضحك 16 10-07-07 03:56 AM


الساعة الآن +3: 02:46 AM.