رواية.. غريبة بين أهلها

[غبرة مشاعر]

اسلام عليكم
هاذي روايه قريته وعجبتني وحبين انقلها لكم
واتمناا انها تعجبكم
^^^^^^^^^^^^^^^^^^^^^^^^^^^^^^^^

الجزء الأول

في أرقى أحياء الكويت يسكن خليفة (أبو محمد ) تاجر كبير معروف وعنده عدة شركات ويسكن ويا زوجته شيخة (أم محمد) وعندهم عيال هم :
ابنهم الأكبر محمد ( أبو سعد ) وزوجته مزنه (أم سعد ) وعيالهم :
سعد (26) سنة متزوج هناء بنت عمه (24 ) وعيالهم : فيصل (5) سنوات وجاسر (سنتين ).
العنود (22) سنة معلمه رياضيات توها متخرجة .
بدر (20 ) سنة بالجامعة سنة ثانية تخصص تجارة واقتصاد . وأيام الإجازة يشتغل بشركة العايله .
نوف (18 ) سنة آخر سنة بالثانوية .
ابنهم الثاني صلاح (أبو سلمان ) وزوجته فاطمة (أم سلمان ) وعيالهم :
سلمان (25 ) سنة يشتغل بشركة العايلة .
أحمد (23)سنة بالجامعة آخر سنة تخصص تجارة واقتصاد .
سارة (21) سنة بالجامعة تخصص صيدلة سنة ثالثة .
ملاك (18 ) سنة آخر سنة بالثانوية .
ابنهم الثالث طارق (أبو طلال ) وزوجته نورة (أم طلال) وعيالهم :
طلال (25) سنة متزوج بنت خالته ( طيف ) وهي معلمه لغة عربية وعندهم عيال توائم هم : مشعل (3)سنوات وريما (3)سنوات.
بندر (22) سنة بالجامعة سنة ثالثة تخصص اقتصاد وتجارة ( كل الشباب بالعايله يدرسوا اقتصاد وتجارة هذا شرط جدهم عشان يحافظوا على شركات العايله)
نادر (19 )سنة بالجامعة تخصص تجارة واقتصاد أول سنة .
ريناد (15 ) سنة بالمدرسة .( بما إنها البنت الوحيدة فهي دلوعة البيت )

ابنهم الثالث سعود ( أبو فهد ) وزوجته شريفة ( أم فهد )و عيالهم :
هناء (24) متزوجه ولد عمها سعد وهي موظفة بالبنك و ولدهم جاسر (6)سنوات.
فهد (23) سنة تخصص تجارة واقتصاد آخر سنة ( وهو رفيج أحمد ومثل ما يجول توأم روحه ).
ليان (21) سنة بالجامعة تخصص آداب سنة ثالثة.
لجين (18 ) سنة آخر سنة بالمدرسة الثانوية .
وبنتهم فوز( أم جاسم ) وزوجها مشاري ( أبو جاسم ) وعيالهم :
جاسم (24) سنة يشتغل بشركة العايلة .
لبنى (19 ) سنة بالجامعة أول سنة تخصص هندسة كيميائية .
دانه (15 ) سنة بالمدرسة .
وابنهم عبدالله متزوج فرنسية بس أسلمت اسمها نادين وأمها لبنانية الأصل وعلاقته مع أهله منقطعة فهم ما يعرفوا عنه أي شي لأن أبوه ما كان راضي على زواجه .

^^^^^^^^^^^^^



مع رنت الجرس الي تعلن نهاية العام الدراسي طلعت الطالبات من الفصول
و من اخر امتحان لاخر سنه في الدراسه .
لجين : ها اشسويتي في الامتحان ؟!
غاده : تمام كان وايد يخوف بس الحمد لله.
( غاده رفيجة لجين من الابتدائية )
لجين : بالعكس كان الامتحان وايد سهل .!
و جات ملاك من و راهم و شكلها معصبه
لجين : خير اشفيج ملاك شكلج مو على بعضج
ملاك : و الله معصبه من قرادة حظي ما قدرت اطلع البراشيم من جيبي.
غاده :لييييش ؟
ملاك : كانت عندنا مراقبه عيونها مثل النسر و الله خساره دفعت دمي حج البراشيم .
لجين : خيرها بغيرها .
ملاك : شنو غيرها نحنا في اخر يوم دراسي و اخر سنه لنا ماكو يوم غيره !
لجين : يا حلوه لا تنسي اذ نجحنا ورانا جامعه .
غادة : أي صج لجين اشفيج مستعجله و جدامنا الصيف بكبره .
ملاك : أي لاحجين على الدراسه !
لجين : و الله ذكرتيني خلاص من اليوم وداعا للحصص و و داعا للمعلمات الملقوفات و لدفتر الدرجات المشؤوم
و الفرص و البنات و مكتب الناظرة الي حفظنا كل ركن منه من كثر ما ندشه و المقالب على المعلمات و التعهدات .
ملاك : أي و الله و الحفلات و البيبسي الي كنه نخشه عن المعلمات و العلج الي لصقناه في ملابس الابلوات .
و الفيران و الحشرات البلاستيكيه الي كنا نخرع الأبلوات بيها
غاده :صج كانت ايام و لا احلى كانت ونااااااااااسه
ملاك :أي بس اكيد ايامنا بعد الدراسه حلوه وايد
لجين :شنو تعرفي تتنبئي بالمستقبل و انا ما ادري
ملاك : أي و انا ما خبرتج عشان الحسد !
لجين : هههههههههههههههههههههه
غاده :هههههههه بس شنو تنبئتي حج حياتي .
ملاك :زواج و عيال و بيت و خدامه اندونيسيه اسمها تيفا .
لجين : لوووول حتى اسم الخدامه تعرفيه
غاده :يلا عاد خلينا الزواج لج
ملاك : أي عادي .
غاده : الله يسامحج يا ملاك هذا الدريول جاعد ينطرني من نص ساعة
يلا باي اشوفج على خير
ملاك و لجين : باااااااااااااااااااااااي
ملاك : اجول كاهو اخوي سلمان يالله باي اشوفج في بيت عمي بوسعد
لجين : زين بااااااااي
ملاك : بااايات

^^^^^^
ملاك و إهيه راكبه السيارة : هاي
سلمان : و عليكم الهاي
ملاك : طلبتك !!
سلمان : شنو تبين مني يالمصلحجيه
ملاك : انا مصلحجيه حرام عليك
سلمان: خلصيني قولي الي عندج
ملاك : ابي اروح المول .
سلمان : لا و الله شنو قالولج سايق ابوج انا ؟
ملاك : لا بس انته اخوي العزيز و بعدين اليوم كان اخر يوم دراسي في المدرسة .
سلمان : لا و الله و على طاري اخر يوم كيف كان الامتحان ؟
ملاك : زين لا بأس فيه
سلمان : اشوف كل الامتحانات كانت سهله عليج
ملاك : لا تستهين فيني انا عبقريه
سلمان : مادح نفسه جذاب
ملاك : و الله بنشوف لما تطلع النسبه .
سلمان : ماني خسران شي ننطر و نشوف
ملاك : و الموووول
سلمان خلى نفسه ما يسمعها و زيد على صوت الراديو
ملاك : اصلا انا هونت مابي منك شي اخلي اخوي العزيز احمد ياخذني
سلمان : كيفج بالطقاق الي يطقج
ملاك : يا ملقك
سلمان طنش ملاك إللي يكانت معصبه حييل

^^^^
و في الجامعه
كان احمد توه طالع من المحاضر و شاف فهد( توأم روحه)
فهد : واي حظهم البنات اخر يوم لهم في المدرسه .
احمد : زين نحن بعد ما باقي غير اسبوع
فهد : اشفيك سرحت
احمد : اصلا انا صابر لعيون بنات الجامعة
فهد : انا ادري انهم ما يقدرون يستغنوا عني
احمد : فهود تتحدى
فهد : اي اصلا ماكو بنت في الجامعه ما تعرفني .
احمد : انا اوريك شغلك
احمد و اهوه ماشي وقف بنت
احمد : لو سمحتي تعرفيني
البنت : أي انته احمد مو ؟!
احمد : أي ... و تعرفي هذا إلي وياي
البنت : لا اسفه ما اعرفه !
احمد انبط من الضحك على فهد الي كان معصب
البنت استغربت بس هي راحت
فهد : في شي يضحك ؟؟؟
احمد : ههههه بس هاذي وحده من البنات الي ما يقدرون ما يستغنون عنك مو ؟
فهدو هو معصب : روووح زين
احمد ما قادر يمسك نفسه و هم يمشون صوب الباركينج
فهد ركب سيارته و هو معصب
احمد حس انه زودها و ركب سيارته البورش و مشى
^^^^^^
في بيت ابو طلال
بندر دش البيت و هو معصب يطالع على امه و اخته ريناد و هم جالسين في الصالة.
ام طلال : خير فيك شي
بندر : لا بس انا اليوم رحت عند ابوي بالشركه و طلبته يشتريلي سياره يدية مثل سيارة الدعله أحمد
القديمه البورش
ام طلال : عيب تقول عن ولد عمك دعلة و بعدين اشفيها سيارتك وشزينها يديدة ما كملت سنه
بندر : ما ابيها و لي جا ابوي جوليله ما ابي اتغدى و ياكم
ام طلال : ليش ؟
ريناد : دلع صبيان
ام طلال : أي بس ما يصير
بندر : ما لي دخل !
ريناد : بندر خل عنك حركات اليهال !
بندر : جب انتي مالج شغل جاعد اتحجى مع أمي
ام طلال : و انا شكو لي في السالفه
بندر : انا تعبان بروح اريح .
ريناد : كيفك محد ماسكك !
بندر : احسن لج سكتي و لا اسلخ العجال في ظهرج .
ريناد : رووح زين
بندر : هين انا اوريج بس مو الحين لما تطلبين اوديج المول
ريناد الله يخلي ابوي و طلال ما يقصروا ياخذوني وين ما ابي
صعد بندر غرفته و سكر الباب بقوه
ريناد : صج ياهل .
ام طلال : خلي اخوج في حاله
ريناد : ما سويت له شي
و في وقت الغدى
ابو طلال : وينهم نادر و بندر
ام طلال : نادر طلع ويا ربعه يتغدون برع و بندر خذت حيلي زعلان في داره ما يبي يتغدى
ابو طلال : خير شصاير له بعد
ريناد: شنو بعد سالفة السياره
ابو طلال : هذي ثالث سياره اشتريله اياها بعد يبي سياره يديدة
ام طلال : شنو نسوي بعد راسه يابس
ريناد : بس ما يصير طلال الي هو البجر ما شراله ابوي غير سياره
ام طلال : شنو حل يا ابو طلال الولد ما شرب و لا حط لقمه في فمه من الصبح
ابو طلال : امري لله بشتريله و هذي بتكون آخر سياره
بندر سمع كلام ابوه وهو نازل من الدرج و كان طاير من الفرحة
بندر راح على طول و باس راس ابوه
ابو طلال : سمعت انك زعلان مني عشان السياره
بندر : افا انا ازعل من ابوي العزيز عشان سياره لا تودي و لا تجيب
ابو طلال : عيل خلاص ما دامك ما زعلان يعني ما تبي السياره
بندر : هونت ما ابي اكل و لا اشرب إلأ لما تجيب السياره الجديده
ابو طلال : عيل جوم تغدى و يانا
^^^^^^^^^
بعد يومين و في بيت ابو سعد
في الليل بعد العشى
الكل كان مجتمع الشباب و الرياييل في المجلس و الحريم في الصاله
الحريم جاعدين يسولفون مع الجده
هناء : جاسر بس خلاص اجعد مكان واحد
ملاك : خاليه يلعب على راحته
نوف : اووووف طفشت
لجين : حتى انا
العنود : أي صج اشرايكم نروح مكان ثاني مليت من كلام الحريم
ملاك : أي و الله ما عندهم سوالف الأ الحش و العيال
هناء : اها و انتي عن شنو تجعدين تتحجين غير الملابس والموضة
لجين :على الاقل مو طفش مثلكم
ريناد : أي صج سوالف عيايز
نوف : اشرايكم نروح داري
العنود : زين يلا
ليان : يلا
ملاك و لجين و نوف و ريناد والعنود راحوا فوق دار نوف
و في دار نوف
ملاك : شتبون تسون
نوف : نرقص
ريناد : إي و ناسه
ليان : نوف عندج استيريو ؟
نوف : لا بس بجيب من دار بدر من يروح وياي
لجين : انا بروح وياج
ملاك : انا بنادي جاسر ارسله يجيب شريط من أحمد
العنود : حلو
ملاك من فوق الدرج : جاسر حبيبي تعال شوي
هناء : شتبين فيه
ملاك : ارسله عند الرياييل
جاسر راح عند ملاك و هي فهمته شنو يجول حج احمد
ملاك : فاهم
جاسر : أي بث ابي حواوه
ملاك : ولا يهمك بس روح جيبه زيين
جاسر : ذييييين
نزل جاسر و راح مجلس الرياييل وراح لحظن أحمد
سعد : جاسر عيب جوم سلم على جدك و جدك العود و عمامك
جاسر : الثــــــلام عليكم
فهد : جاسر جول صرصور !!
جاسر: ثــرثــور ...
نادر : حرام عليك مو كأنك لما كنت صغير ما تعرف تنطق الحروف زين و كنت تقول حرف الغين بدال الراء
احمد : اشكره في وجهه !!
فهد : غووح زين يا نادغ .
بدر : و انته يا نادر شيذكرك بفهد خبري فيك كنت مو مولود هذيج الايام!
نادر : الله يخلي بندر يسولفلي عن ايام الطفوله .
فعد و هو عاقد حواجبه : بندر !!!!!!!!!!!!!
بندر بإستنكار : مالي شغل .
سلمان : ههههههههههههه ليش يا فهد كلام نادر مو صج ؟
فهد : صج عيال دجه .
ااحمد : شتبي جاسر ؟؟
جاسر : ملاك تبي شريط عشان يرقــثو ا.
نادر : و الله وناسه عندهم مو مثلنا !
فهد : شرايكم نروح لهم ؟؟
بدر : اضبط روحك خواتي مع البنات!
فهد : لا يا معود بس نروح نخرب عليهم
بندر : والله فكره حلوه
و لما وقفوا الشباب
الجد : على وين؟؟!!
احمد : نروح داخل عند الحريم
الجد : لييش ؟
بدر: نسلم على امي العوده
فهد : أي لو عرفت انا ما بنروح عندها من بيفكنا من لسانها
الجد : شنـــــــو ؟
احمد : لا بس قصده من بيراضيها علينا من زعلها ؟
الجد : اها على بالي بعد و لا كنت بقص لسانك قص
فهد "بخبث" :ليش ما ترضى عليها ؟؟
الجد : طبعا يالخديه هذي الاصل ام الكل .
بدر :عيل ما نزعلها نروح نسلم عليها نراضيها .
الجد : لو تبون تراضوها تعالوا جميع المزرعه باجر
فهد : مثل بعض الناس "يغمز حج بدر .
بندر بخبث : أي صج بدر خل عنك الجز و روح المزرعه بكره
بدر : انا اعوذ بالله انا من البيت للجامعه و من الجامعه للمسجد
بندر : ايش انته ما طايح جز في شارع الخليج ؟
بدر : اصلا انا ما دله شارع الخليج .
الجد : صج هالكلام يا بدور .
بدربإستنكار : لا يا يدي انا ما اسوي هالحركات
فهد : صج والله لا تسري نثل البنات لي قالوا ما ادل طريج السكه حتى
بدر :فهد " و يغمز له
الجد : أي جذيه ابيكم خلوا سلمان و بدر قدوتكم
نادر : والله يا يدي انته منخدع فيهم و لو تعرف مكالمات آخر الليل " يغمز لسلمان "
سلمان : عيب هالكلام يالقوطي
نادر : اقوللهم سوالفك
الجد : سلمان ما عنده هالسوالف البطاله هو طايح عندي يشتغل بالشركه مو مثلك مو قادر تخلص من المدرسه
ولا تجيب درجات مثل خلق الله فضحتنا .
نادر : احم احم .... بس انا ما ابرشم وايد مثل بعض الناس في الامتحانات ما خذيت الخبره الكافيه مو جذي يا بندر؟
( الي يسمع يقول مو مخسر كل فلوسه و اهو يشتري البراشيم من رفيجه حسون نونو )
احمد : يلا شباب نروح
و طلعوا من المجلس و راحوا عند الحريم و سلموا على الجدة
فهد : يلا بدر نروح غرفتك
ام سعد : ليش شعندكم
احمد : نصلح اللاب توب مال بدر و نقعد نسولف .
ام طلال : كلكم
نادر : أي
و لما ركبو الدرج سمعوا البنات يسولفوا في دار نوف
بندر : خذ لنا طريج نبي ندخل
بدر : زين
بدر طق الباب
نوف : منو ؟؟
بدر :انا .. ابي ادخل
نوف: .... زين ادخل
و لما دخل بدر دخلوا و ياه الشباب و احمد حط الشريط الشباب تلثموا و قعدوا يرقصوا
نوف بعصبية : طلعوا من داري
ملاك : احمد اطلع و يا هالهيلج الي وياك
ساره : صج ما عندكم سالفه
العنود قامت من مكانها و راحت قصرت على صوت المسجل
العنود طلعت موبايلها من جيب بنطلونها : طلعوا ولأ راح ادق على جدي واخليه يطلعكم
فهد قعد على السرير : ما بتقدرين تسوينها >>>> ما شاء الله الأخ ماخذ راحته
العنود تخلي نفسها تدق بالتلفون
بدرقرب منها لما حس بجديتها : اختي العزيزه تجفين لا تدقي بنطلع
لجين : زين طلعوا يلا
ليان : صج ملقوفين
نادر تحرك من مكانه وارح صوب الباب : حاضر عمتي
نوف :يلا برع
و لما نزلوا الشباب
ام سعد : خلصتوا ؟
احمد : نحن ما بدينا حتى
فهد واهوه متضايج : اللاب توب خربان حده .... لو يرسله حج التصليح ابرك
نادربطفش : كلش مضيعه للوقت
بعد نص ساعه نزلوا البنات
ام طلال : ها مليتوا ؟؟
ساره : سألي فهد و الشباب شسوا
فهد : ما سوينا شي
بندر بخبث : لوول ما سويت شي ومن زعج البنات فوق؟
بدر ببراءة : أي صج منو ؟
فهد يحاول يبرر موقفه : تقطونها على راسي
نادر : ليش نحنا سويا شي !
فهد : احمد انقذي با توأم روحي
احمد قاعد بعيد عنهم : لا تدخلني انا ما سويت شي!
فهد : هين يالقواطي .
البنات و هم منبطين ضحك على فهد
نوف بسخرية :هههههه شفت كيف كشتوا فيك !
الجده : خلكم من الهذره الزايده ... انا ابي اشوفكم بعد باجر في المزرعه
^^^^^^^
وفي ديوانية الرياييل رن تلفون بو سلمان
ابو سلمان : الوو
المتصل : ......
ابو سلمان : أي انا اهوه منو معاي
و ابو طلال الي جاعد جنب ابو سلمان ما سمع غير : محامي ... شركة .... فرنسا ... الورث

بعد ما خلص أبو سلمان من المكالمة وكانت تعبير الصدمة على وجهه (شنو إلي سمعه أبو سلمان عشان تصير حالته جذي )


نهاية البارت

[غبرة مشاعر]

اتمنى اشووووووف ردودكم عشان انزل الجزء الثاني
تحياتي: غبرة مشاعر

[احمد عواض]

كلنا غرباء عن هذه الدنيا
تسلم يمينك
نتمنى المزيد

[غبرة مشاعر]

مشكوووور على مرورك اخوي

[ليـتــﮛ ﻤـعـﻲ ..}]

تسلم يمناك على هالجزء من القصه كااان كثيير حلووووو..ننتظر الثااني .....


تحياااتي