المنتديات
المنتديات
| روابط إعلانية |
| ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 |
| | أدوات الموضوع |
26-11-08, 07:34 AM
| #1 |
| |[ عـضـو مــاسـي ]| الدولة:  روابط إعلانية |  أنفاس الأنين ،، قصة من كتابتي بسم الله الرحمن الرحيم كتبت هذه القصة وربطتها ببعض الاحداث الحقيقية ولو مضمونا ،، وللعلم هذه ثاني محاولة لكتابتي القصة واعترف انها بسيطة .. فأنا مازلت في البداية ..،، الاشعار المكتوبة منقولة وليست من كتابتي ،، حين النقل او النسخ لا اسمح الا بذكر المصدر اسمي واسم المنتدى .. في انتظار آراءكم ( وشوي شوي علي ) :) محبتكم ميعاد ،،، عبد الاله رجل متزوج من فاطمة انجب منها : ابراهيم ، ميعاد ، منال ، مرام ... ولم ينجب غيرهم لمرض فاطمه المتكرر ،، وكانوا مقتنعين حامدين الله على كل حال ،، مرام الابنة الصغرى مقعده تتنقل بكرسي متحرك ،، شلت ارجلها اثناء ولاده امها لها ،، ابراهيم تخرج من الجامعة ويعمل بشركة في مدينه الجبيل ،، بعيد عن مكان اهله الرياض ،، منال طالبه جامعية ،، مرام في المرحلة الابتدائية ميعاد خريجة جامعة ولكنها لم تجد الوظيفة المناسبة ،، وجالسة في البيت ... طق طق طق طق ميعاد: ياربيه وش هالازعاج ابي انااااااااااااام الخادمة : يالله كله قوم ماما قول كفاية نوم وبعدين عور راس ،، ميعاد: اذا عورني راسي باخذ بنادول اطلعي بس منال : اليوم خميس ياناس ارحمونا خلونا ننام الخادمة : ماما تقول الحين الساعة اهدحس ميعاد : طيب خلاص بنقووووم اطلعي بس منال : ميعاد خوذي لك نومة خمس دقايق بدخل الحمام اول ميعاد : لاياشيخة ،، انتي اللي تحبين النوم وخمس دقايق تفرق معك نامي وانا بدخل الحمام اول يركضون بسرعة كل وحده بتلحق الحمام اول منال : ميعاد بعدي انا قلت اول ميعاد : والله ماصارت انا الكبيرة ادخل اول منال : اول مره اسمع بهالقانون ان الكبير يدخل الحمام اول !!!!!!!!!!!! ميعاد : لايكثر بس انا اول يعني انا اول منال : واذا قلت لا ميعاد : مو بكيفك اصلا مااستأذنتك مرام تنادي من غرفتها المجاوره ،، لها غرفة خاصة بإعاقتها مرام : ياناس وحده تجي لحمامي بس خلصوا امي تنتظرنا تحت تراي جهزت وبنزل منال :يالله روحي لحمام المعوقين ميعاد ترفع يدها وتضرب منال على وجهها ميعاد : ياقليلة الادب هذا حمام اختك ،، خليك هنا وانا بروح هناك منال : ميعاد استغفر الله والله اسفة ماكان قصدي بس انتي عصبتيني ماردت عليها ميعاد وراحت للحمام الثاني ... مرام : ميعاد وينك ابي انزل يالله ماخلصتي ؟؟ ميعاد : ثواني حبيبتي بس شوي خلصت ميعاد بسرعة وراحت تدف مرام بكرسيها المتحرك وينزلون تحت من جهة خاصة بالكرسي ميعاد ومرام : السلام عليكم يااحلى ام واب بالدنيا الوالده : وعليكم السلام هلا بالحلوات .. يالله ترى القهوة ماتزين الامعكم ،، وين منال ؟؟ ميعاد : نابته بالحمام مرام : ههههههههههههههههههههههههه الوالده : وشفيكم عسى ماتهاوشتوا كالعاده على الحمام منال كانت نازلة وتسمع ... منال : ايه يمى ادبي بنتك العاطلة مالقت لها وظيفة ومسويه سكيورتي على الحمامات الوالده : ههههههههههههههههههههه الله يهديكم يالله بس تقهووا وخلوا عنكم الهواش نفسي يوم يمر بدون هواش ميعاد : هههههههههههههه ياحبيلك يمى مافيه امل دام منال على قيد الحياة منال : بسم الله علي وش قصدك ؟؟؟ ميعاد : لا مااقصد شي بس صبي القهوه عن امي منال وهي تصب القهوة : يبى وراك ساكت ؟؟ كل هذا انسجام بالجريده !!! ميعاد : اكيد ابوي يناظر الاسهم هههههههههههههه الوالد : ايه والله يابناتي راح اللي عندي كله بهالاسهم عسى الله يعوض علينا ،، ميعاد : ماعليك يبى اهم شي صحتك وحنا بخير الحمدلله بهالوقت دخل ابراهيم : السلام عليكم الجميع : وعليكم السلا م ورحمة الله وبركاته الوالده : هلا بالطش والرش منال : ايه عشانه الولد الوحيد له الدلع ابراهيم : اشتغلت الغيره منال : على ايش ياحسره جلس ابراهيم يتقهوى معهم ويسولفون مبسوطين ،، قام عبدالاله ابو ابراهيم وطلع قال عنده كم مشوار .. الوالده : الا وين طلعت ياابراهيم من بدري ابراهيم : والله يمى ماجد ولد عمي قال ابيك بموضوع ورحتله الوالده : عسى ماشر ياوليدي ؟؟ ابراهيم : لاابدا يمى موضوع بسيط ،، يمى ابي اتكلم معك لحالنا شوي وش رايك نروح للمجلس ؟؟ ميعاد : يوووووووووووه بدت الوشوشه لا خليك مرتاح حنا بنطلع يالله بنات نطلع فوق بوريكم وش شريت امس دفت ميعاد الكرسي المتحرك لمرام وطلعوا كلهم فوق ... الوالده : ابراهيم خير تراي قلقت ؟؟ عسى بيت عمك مافيهم شي ؟؟؟ ابراهيم : لا والله يمى وشفيك كذا ؟ مافيهم الا العافية بس ماجد كان .... كان يبي يتقدم لميعاد وقال وش رايك ؟؟ الوالده : ماجد !!! ابراهيم : ايه يمىماجد انتي تعرفينه مشاءالله عليه متخرج حاسب آلي وتوظف على طول بالجبيل بشركه راتب حلو وسكن والرجال مرتاح غير انه قريبنا ونعرفه زين رجال الا قالوا رجال ،، وشفيك يمى ساكته ؟؟ الوالده : والله مدري ياولدي بس ميعاد اخبرها دايم تقول انا مااحب زواج الاقارب ابراهيم : لا هين بيتغير كل شي الا جاء الصدق ،، انتي يمى شاوري الوالد اول وبعدين شاوريها وعلميني الوالده : خير ان شاءالله،،،، الله يكتب اللي فيه خير يارب ابراهيم : حاولي تقنعينها يمى ترى الزواج احسن لها من قعده هالبيت طقت من النوم ميعاد من فوق الدرج .. هاه خلصتوا الاجتماع ؟؟ ابراهيم : بصوت خافت ( الله يخلف هاذي اللي بتعرس )...... ايه خلصنا تعالوا جاء الليل ودخلت الام على ميعاد بغرفتها هي ومنال ،، الام : وش تسوون يابنات ؟؟ منال : ابدا يمى نسولف ميعاد : تبين شي يمى !!! الأم : ابي اتكلم معك ميعاد شوي منال : وش السالفة اليوم ؟؟؟ فهمونا !!!!!!!!! الأم : معليش منال خلينا نشوي منال : يمى فيه عريس ؟؟؟؟ الام : بسم الله علي ومين قالك ؟؟ منال : هذا انتم يالحريم اعرفكم ،، ميعاد حبيبتي تكفين وافقي عشان تصير الغرفة غرفتي لحالي والحمام لي لحالي تكفين ميعاد ميعاد بعصبية : منال اطلعي برااااااااا منال : طيب وش قلت عاد اعصابك الأم : منال ماصارت اطلعي منال : عشانك بس يااحلى ام بالدنيا طلعت منال وقربت الام من ميعاد .. الام : ميعاد حبيبتي تعرفين كل وحده اذا جاها نصيبها وكان رجال دين واخلاق لازم تستغل الفرصة وتوافق ميعاد : يعني عريس يمى مثل ماقالت منال ؟؟؟ الام : ايه والله يابنتي بس من جد رجال ميعاد : آآآآآآآه ........ ومين هو يمى ؟؟ اسمه ،، عمله ،، حالته الاجتماعية .. الام قاطعتها : تعرفين كل شي عنه ميعاد : وش قصدك يمى ،، ؟؟؟ الام : اقصد هذا ماجد ولد عمك ،، ميعاد تغير وجهها : يمى انتي بالذات تعرفين وجهة نظري من عيال عمي حنا متربين سوى وكلهم بمثابة اخواني الام : ايه يابنتي صح بس هذا اول ،، الحين كبرتوا والوضع اختلف ماجد طلبك مخصوص من ابراهيم ميعاد : آآآآآآآه فهمت عشان كذا ابراهيم راحله الصبح وعشان كذا قعدتوا اسرار انتي واياه لا يمى انا ماابيه ولا يمكن افكر فيه كزوج ماادري كذا احساسي ،، الام : يابنتي استخيري الله وفكري لا تستعجلين ميعاد : يايمى هذا الكلام من زمان وانتي عارفة وجهة نظري فيه مايبي تفكير الام : براحتك يابنتي الله يهديك ويكتب لك اللي فيه خير طق طق طق طق منال : ماخلصتوا ؟؟؟ الام: ادخلي يامنال خلاص تعالي دخلت منال بسرعة منال : لو لو لو لو لو لي اخيرا ميعاد بتطلع ميعاد : طلعت روح ابليس ماني طالعة قاعده على قلبك منال : افااااااااااااااا ليش الام : البنت يروح عمرها وانتي بكيفك طلعت الام وتركت ميعاد وعندها امل انها توافق لانها شايفة ماجد فرصة في يوم من الايام مرضت الام مرض شديد ... ميعاد : يمى ترى قلت للسواق يجهز السيارة الام : على وين يابنتي وانا تعبانة مااقدر اتحرك ميعاد : على المستشفى طبعا يمى مستحيل اتركك كذا ،، انا اتصلت على ابوي بالدوام وقلتله يالله يمى الله يشفيك يارب الام : يالله يابنتي والله ماادري وشفيني احس بتعب والم شديد في بطني وظهري وصلت ميعاد وامها للمستشفى وقرر الطبيب تنويم الام .. بعدها بكم يوم .. الدكتور :وش تقربين لها انتي ؟؟ ميعاد : انا بنتها يادكتور ومرافقة معها خير ان شاءالله الدكتور : والله الوالده عندها فشل كلوي ولابد تغسل ... ميعاد : كيف يادكتور وشلون ليش كذا ؟؟ الدكتور : الحمدلله على كل حال هدي نفسك ان شاءالله بتخف كثير ،، وين الوالد هو موجود ؟؟ ميعاد : والله الوالد مره مشغول بعمله يجي وقت الزيارة بس الدكتور : نبيه يطلع على بعض الاشياء بلغيه يمرنا ميعاد : ان شاءالله دكتور ميعاد انهارت وجلست تبكي بصمت عشان ماتحس فيها امها الأم : ميعاد وش قال الدكتور ؟؟ ميعاد : هاه امممممممممممم لا قال بس امممممممممممممممممم الام : خير ياميعاد وش قال ؟؟ ميعاد وهي خانقتها العبره : يقول يقول تحتاجين ......... غسيل كلى ،، الام : الحمدلله على مااخذ وعلى مااعطى الحمدلله على كل حال لاتبكين ياميعاد انا بخير ان شاءالله واحسن من غيري بكثير احمدي الله واشكريه ميعاد والدموع تملا عيونها : الحمدلله الحمدلله طلعت الام من المستشفى وصارت تتردد يوم ورى يوم عشان الغسيل وميعاد تروح معها ،، في البيت : منال : ميعاد منتي ملاحظة شي غريب ؟؟ ميعاد : خير يامباحث ؟؟ منال : تكفين ميعاد لاتطنزين والله اتكلم جد ،، ميعاد : طيب يالله قولي والله مافيني حيل اتكلم توني جايه من المستشفى مع امي الله يشفيها ،، منال : اممممممممم ابوي ميعاد : خير وشفيه ؟؟ منال : مدري احس طلعاته كثيره في الفتره الاخيره وسهراته والمفروض يكون بجنب امي اكثر بهالفتره ميعاد عدلت جلستها : وش قصدك ؟؟؟ منال : مااقصد شي ،، بس انا اقول ابوي وراه شي ،، ميعاد : يابنت الحلال ابوي بلشان بالاسهم وقاعد يدور له مخرج منها منال : يمكن !!! بعد مرور شهر على مرض الام .. الام على السرير : ميعاد ميعاد وينك ؟؟ ميعاد جت بسرعة : سمي يمى الام : ميعاد انا تعبانة مره ميعاد : بسم الله عليك يمى بوديك المستشفى الام : مااقدر اتحرك ميعاد : يمى بسم الله عليك اجيب لك الاسعاف طلبت ميعاد الاسعاف وراحت مع امها للمستشفى وبلغت منال انها تتصل بأبوها وتقوله .. وصلوا للمستشفى وبسرعة دخلوا الام العناية المركزة وعندها الاطباء ومنعوا ميعاد من الدخول .. ميعاد من برى العناية تنتظر اتصلت على منال على تيلفون البيت : الوووو منال ... بلغتي ابوي .. ترى امي تعبانة مره قوليله بسرعة يجي انا الجوال مايوصل داخل المستشفى قاعده اكلمك من الثابت منال : والله ياميعاد اتصلت مره وقطعها بوجهي ومره ثانية لقيته مغلق ،، تكفين طمنيني عن امي من يوم ماطلعتوا ومرام ماسكتت من الصياح ميعاد : آآآآآآآه الله يسمعنا خير الله يسمعنا خير ببلغكم عن أي شي ولو جاء ابوي والا اتصل علميه بسرعة يجي منال : ميعاد مانتصل على ابراهيم بالجبيل يجي ميعاد : اتصلي عليه امي تعبانة مره وانا ماادري وش اسوي لحالي خليه يجي بسرعة انتظرت ميعاد قدام العناية تقريبا ست ساعات وبعدها طلع الدكتور ولحقته ميعاد ميعاد : دكتور دكتور الدكتور : نعم ميعاد : تكفى دكتور طمني عن امي اسمها فاطمة ،، وعندها فشل كلوي ،، اليوم جت ... الدكتور : هي امك ؟؟؟ ميعاد : ايه دكتور بشرني ،، سكت الدكتور شوي وبعدين قال وين الوالد ؟؟ او احد الاخوان ؟؟ ميعاد : ليش يادكتور قولي انا وشفيها امي ؟؟ ابوي مالقيناه واخوي بالجبيل جاي بالطريق الدكتور : عظم الله اجرك بالوالده ميعاد تنهار : ايش وش تقول يادكتور ؟؟ لا لا وشلون انا جبت لكم امي صاحية وموتوها ابي امي يادكتور ابي امي وراحت تركض لغرفة العناية ورجعوها الممرضات وجلسوا معها وكانت بوضع نفسي سئ .. بعد نص ساعة جاء ابراهيم مع منال يركض ابراهيم : خير ميعاد وينها امي وشفيها ميعاد بصوت مليان عبرات : امي امي تطلبك الحل ياابراهيم ابراهيم يصرخ : وش هالكلام وش تقولين انتي ؟؟ وين الدكتور .. جلست منال مع ميعاد يبكون وابراهيم دخل عند الدكتور وبعدين طلع لهم ووقف معهم دفنوها وصلوا عليها رحمها الله ،، حالة البنات كانت مره صعبة وميعاد تحملت المسؤولية بدري ،، ابراهيم اخذ اجازة وجلس مع اخواته .. بعد مرور شهرين على وفاة والدتهم ... ابراهيم : والله ماجد ماقصر معنا اخذ اجازة هو بعد وكان مثل الاخو لي ميعاد : هو فعلا اخو لنا الله يجزاه خير ... ابوي اللي مدري وش سالفته ابراهيم : ابوي الحين بتكلم معه .. ميعاد : وش تبي تقوله ؟؟ ابراهيم : بقوله وش عنده كل وقته برى البيت اذا رحت انا دوامي مين يقعد عندكم وقتها دخل ابوهم عليهم ،، الوالد : السلام عليكم ابراهيم وميعاد : وعليكم السلام هلا يبى ابراهيم : خير يبى وينك الوالد : ماشاءالله وتبي تحاسبني ويني بعد ؟؟ ابراهيم : لا ابدا يبى مو قصدي بس قلت اخاف انك تزوجت والا شي ( يقولها بصيغة ضحك ) ميعاد شهقت وتطالع ابراهيم استغربت كلامه .... الوالد لقاهافرصة : ايه انا متزوج ميعاد : ايش يبى متزوج ؟؟ الوالد : ايه متزوج حرام بعد :: ابراهيم : لا يبى ماقلنا حرام بس هذا مو وقت زواج الوالد : ومين قالك اني توني متزوج انا متزوج بحياة امك الله يرحمها انت عارف هي مريضة ولا بغيت ازود عليها ،، عشان كذا ماعلمتكم .. ميعاد طلعت فوق وهي تبكي .. الوالد : عاد يوم عرفتوا اني متزوج تراي بجيبها هنا عند خواتك هي عارفة انه عندي بنات وانا مشترط عليها من اول ،، ابراهيم : يبى اخواتي ماراح يتحملون يشوفون وحده مكان امي بهالسرعة الوالد : وصعب بخلي بنات لحالهم بالبيت حتى انت دوامك بعيد ابراهيم : يبى نا مستعد اخذ خواتي عندي الوالد : ومرام ومراجعاتها بالمتستشفى انت عارف انها تحتاج رعاية خاصة ابراهيم : بحاول ادور عمل هنا اجل الوالد : ابراهيم امسك وظيفتك لاتضيع عليك ترى الناس الحين تتمنى وظيفة بألف ريال طلع الوالد لغرفته وترك ابراهيم .. طلع ابراهيم عند اخواته ولقاهم يبكون .. يتبع ***************** انتظر الردود عشان اكمل ولا لا !!! آخر من قام بالتعديل ميعاااد; بتاريخ 26-11-08 الساعة 01:05 PM. |
|  |
|
26-11-08, 01:30 PM
| #2 |
| |[ عـضـو مـشـارك ]| الدولة: | رد: أنفاس الأنين ،، قصة من كتابتي بصراحه القصه حلوه ننتظر كمالتها تحياتي ............. |
|
| |
|
26-11-08, 04:05 PM
| #3 |
| |[ عـضـو مــاسـي ]| الدولة: | رد: أنفاس الأنين ،، قصة من كتابتي يعطيك العاااااااافيه |
|
| |
|
27-11-08, 12:35 PM
| #4 |
| |[ عـضـو مــاسـي ]| الدولة: | رد: أنفاس الأنين ،، قصة من كتابتي طلع ابراهيم عند اخواته ولقاهم يبكون .. ابراهيم : خلاص تكفون لا تضيقون صدري وانا مابيدي حيله ميعاد وهي تبكي : الله يرحمها امي كانت ،، كل شي الا ابوكم الا ابوكم ،،، وهو الله يسامحه منال : والله اني ملاحظة عليه حتى قلت لميعاد كم مره ابوي مره متغير مرام : ابي امي ماابي غيرها مااحب غيرها وبدت تبكي بكاء شديد ابراهيم: بس مرام حبيبتي يالله وين تبين نطلع ؟؟؟ مرام : ماابي اطلع وديني غرفة امي ابي انسدح على فراشها ابراهيم : مرام خلاص تكفين قطعتي قلبي يالله حبيبتي نطلع كلنا نتمشى ميعاد حست بمرام انها مره زعلانة وخافت عليها : يالله مرام انا ابي اطلع بعد يالله حبيبتي وطلعوا تمشوا وضحكوا شوي مع انه كل واحد كان يجامل ويصبر الثاني بينماكلهم كانوا متضايقين ،، عدت الايام ،،وانتهت اجازة ابراهيم واضطر انه يسافر عشان دوامه ابراهيم : ميعاد انتي الحين كل شي بالبيت انتبهي لخواتي واي شي اتصلي علي زين ؟؟؟ ميعاد : ماعليك ابراهيم خليك مرتاح ان شاءالله حنا بخير ... ابراهيم : مع السلامة ميعاد ميعاد : مع السلامة وبعد روحة ابراهيم باسبوع دخل الوالد البيت وجايب معاه زوجته ... هو كان ينتظر روحة ابراهيم عشان مايصطدم معاه بمشاكل ،، دخل ابو ابراهيم البيت .. ابو ابراهيم :نور البيت ياهلا وغلا هدى زوجة عبدالاله : بس بيتكم حار ابوعبدالاله : عاد توك داخلة اصبري فصخي عباتك وارتاحي الين يجون البنات يسلمون عليك الوالد : ميعاااااااااااد ،،،منااااااااااااااااااال ،،،، مراااااااااااااااااااااام منال : كنه صوت ابوي ينادينا غريبة وش عنده ،،، ميعاد : مدري ....... سم يبى الحين جايين نزلوا لبنات بسرررررررررررعة من الدرج وشافوا الحرمة ،، الوالد : سلموا على خالتكم هدى تراها بمقام امكم منال : الله يرحمها امي ميعاد : لايمكن احد يكون بمكان امي مرام : يبى انا ماابي غير امي الوالد خاف زوجته تزعل : عاد بلاقلة ادب كلكم يالله سلموا على خالتكم سلموا عليها من غير نفس وطلعوا بسرعة على فوق وتركوها هدى : واضح بناتك قويات ابو ابراهيم : لا تلومينهم يابنت الحلال امهم مالها شهرين متوفيه هدى : حتى كاس المويه ماجابولي ابو ابراهيم : الله يهديك هذا بيتك انا بدخل الشناط وانتي تفرجي على البيت خذي راحتك ترى مافيه الا البنات دخل ابوابراهيم الشناط الخاصة بزوجته هدى وفرجها على البيت ،، ابوابراهيم : هاه هدى عسى اعجبك البيت ؟؟ هدى : معقول .. ابوابراهيم : معقول ؟؟؟ غريبه البيت كان عاجب ام ابراهيم الله يرحمها مره هدى : بدينا بالمقارنة ابو ابراهيم : لا موقصدي يابنت الناس بس يعني البيت اشوفه مناسب وعموما الناس اذواق ان شاءالله اغيرلك اللي اقدر عليه ،، الحين بنام عشان بكره عندي دوام .. وفي الصباح ..طلع ابو ابراهيم للدوام .. وطلعت منال للجامعة ومرام للمدرسة .. صارت الساعة عشره الصباح وقامت ميعاد ..... ميعاد تكلم نفسها : الله يعين على هالدنيا ... وينك يمى تشوفين اللي يصير .. الله يرحمك وين القهوه وين الضحكات .. نزلت من عيونها دموع دخلت عليها بهالوقت هدى .. هدى : اخيرا قمتي ميعاد : نعم وشتبين ؟؟ هدى : انا مااعرف شي في بيتكم المفروض تسوين لي الفطور وتجهزين الشاهي على الاقل ميعاد : والله البيت عندك والمفروض انه بيتك والشغالة بالمطبخ اسأليها عن أي شي ماتعرفينه هدى : لايكون ناوية مشاكل على هالصبح ميعاد : انا ماقلت شي ولا نويت شي انتي اللي داخلة غرفتي حتى بدون استئذان هدى : خير ان شاءالله استأذن ،، انا ببيتي وادخل أي غرفة ابيها ميعاد : هذا بيت ابوي يعني لنا كلنا .. هدى : ماشاءالله اشوف اللسان طويل ميعاد : مو اطول من لسانك هدى عصبت : ياقليلة الادب انا لساني طويل ؟؟ ياللي ماتربيتي ميعاد : احترمي نفسك انا متربية احسن منك هدى : خلي ابوك يجي اذا ماوراك شغلك ميعاد : اصبحنا واصبح الملك لله ... من اول يوم مسويه زحمة ومشاكل هدى : والا تبيني اسكت عشان تاكلون حقي وطلعت هدى من الغرفة ونزلت تحت .. ميعاد طلعت جوالها ترسل رسالة لابراهيم .. ميعاد : ابراهيم انت فاضي الحين اقدر اكلمك ؟؟؟؟؟ انتظرت شوي مارد عليها ... جلست ميعاد بغرفتها الين رجع ابوها من الدوام عشان ماتحتك بزوجة ابوها وتسوي مشاكل الين سمعت الباب وانه ابوها جاء ..... نزلت بسرعة ميعاد لابوها وطبعا كانت زوجة ابوها تستقبله تحت ميعاد : هلا يبى وشلونك ؟؟ ابوابراهيم: هلا بنتي كيف الحال ان شاءالله بخير ؟؟ ميعاد : الحمدلله يبى على كل حال هدى : وش يعني على كل حال ؟؟ ميعاد : افففففففففففف ابو ابراهيم : خير ان شاءالله عسى ماشر !!! هدى : قولي لابوك اني طويلة لسان قوليله ،، ابو ابراهيم : افاااااااااااااا مين يقول كذا هدى : اسأل بنتك ابو ابراهيم : ميعاد بدينا مشاكل تكفين تراي ماني ناقص حاولت ميعاد تقاطعه : يبى اسمعني ........ ابو ابراهيم واصل كلامه : حرام عليكم اجي من دوامي ابي ارتاح والقى مشاكل مايصير ياميعاد هذا وانتي الكبيره .. وطلع غرفته وترك ميعاد بالصالة ... دخلوا البنات من المدارس منال : سلامات ميعاد وشفيه ابوي اسمع صوته من الحوش ؟؟ ميعاد نزلت دموعها : مافيه شي منال : ميعاد تصيحين ؟؟؟ وشفيك ؟؟ لا يكون هالسعلوه سوت لك شي ؟؟ انا من شفتها ماارتحت لها .. ميعاد : ماقاهرني الا ابوي مايبي يسمع لي يسمع لها بس منال : ميعاد ماعليك والله مااكون بنت امي اذا ماطفشتها من الدنيا كلها مو من البيت بس ميعاد : منال تكفين مانبي مشاكل زيادة ابوي تعبان من كل شي منال : قومي ميعاد لغرفتنا تلاقيها قاطه آذانها تتسمع قبل مايطلعون سمعوا زوجة ابوهم تنادي ميعاد هدى : ميعااااااااااااااااااااااااااد ميعاد : نعم هدى : ابوك يقول حطي الغداء ميعاد : ( اف منها ) ....... ان شاءالله احطه الحين .. منال : وبس تقولين ان شاءالله وبس ميعاد : منال ابوي عنده سكر وضغط ومشاكل بسبب القروض اللي اخذها للأسهم مااقدر ازود عليه لازم نتحملها بالطول والا بالعرض هذه بلوى والله يعين عليها منال : يالله ميعاد بساعدك ياحلالات من حط سم بحافتها ميعاد : ههههههههههههههههههههههه ياحبيلك منال ضحكتيني من زمان ما ضحكت بعد الغداء كل واحد راح لغرفته انتبهت ميعاد انه فيه بجوالها مكالمات لم يتم الرد عليها ميعاد : ياعمري ياابراهيم مكلمني ثلاث مكالمات ولا انتبهت يمكن كنت تحت منال : خير وش عنده ؟؟ ميعاد : ابدا انا كنت متضايقة وارسلت له رسالة ولا رد شكله اتصل بعدها وانا تحت .. اتصلت عليه ورد عليها .. يتبع ********* |
|
| |
|
27-11-08, 01:20 PM
| #5 |
| |[ عـضـو مــاسـي ]| الدولة: | رد: أنفاس الأنين ،، قصة من كتابتي قصة جميله جدآ ياميعاد ... *ــ* كمليها أنا معك من المتابعيـــــــــــــن وأشجعكــ بقوه بس البطله ميعاد اللي فيها هي نفسها أنتي؟؟؟؟>>>>>>> سؤال محرج.. ههههههههههه أمزج معكــ.......... |
|
| |
|
| الإشارات المرجعية |
| أدوات الموضوع | |
مواضيع مشابهة | ||||
| الموضوع | الكاتب | المنتدى | الردود | آخر مشاركة |
| خطر الاشعاع المؤين | مــ الروح ــلاك | طب و صحة | 5 | 22-12-09 04:03 PM |
| فيديو كليب "أنفاس الأنين"..من أداء (محمد السلمان) | مجنون بكيفي | اناشيد اسلاميه و صوتيات و فلاشات | 23 | 04-05-09 09:21 PM |
| المنيو الإلكتروني في المطاعم | عالم خيال | صور غريبة - صور نادرة | 15 | 13-11-08 11:10 PM |
| لا تسئلوني من كتابتي | miss dalooah | شعر و شعراء | 2 | 01-05-07 01:19 AM |
| إلى متى يستمر هذا الأنين ؟ | ^_^ ملكه بلا مملكه ^_^ | خواطر - عذب الكلام | 5 | 27-11-05 06:58 PM |
