قصة: ×أطلالـي ملت وقوفـي× مواقف وأكشنات بعالم المراهقات ...أقرأوها

[برستيــــج]

---

[برستيــــج]

في بيـت سميـه الكل مجتمع على العشاء:

راشد: شلون إمتحاناتك سميه؟

سميه: تـمـام..الحمدللــه..

رنــا: سميه حريصه على أنها تجيب نسبه عاليه عشان تدخل الجامعه..

راشد: الله يوفقها أنشاءالله..

سعود: وش الفايده لو جابت نسبه ودخلت الجامعه آخرتها ماراح تتوظف الشباب مالقوا وهم شبـاب شلون البنات!!

رنـا: أنت لو نسبتك عاليه كان دخلت الجامعه وتخرجت وتوظفت وظيفه محترمه_ الشهاده الجامعيه هي اللي تعزز مركزك الوظيفي مو شهادة الثانويه؟
هذا أنت صار لك سنتين من تخرجت من المدرسه كل ماقدمت على وظيفه طلبوا منك شهاده جامعيه!!

سعود: إلا قولي لو عندي واسـطــه كان بسرعه قبلوني بدون شروط..

راشد: سعود أنت موقف حياتك على هالواسطه أشتغل بأي وظيفه بدل قعدتك بالبيت

سميه: أخو صديقتي يشتغل(سيكرتي) وهو ماعنده إلا شهاده ثانويه ومقتنع بوظيفته.. ليش ماتشتغل مثله أهم شي تقطع الحاجه بالعمل..

سعود: حكت الفيلسوفه! مو ناقص إلا أنا أشتغل سيكرتي راتب 1500ريال عشان أصير أضحوكه عند ربعي.. إلا وش رايك أشتغل حلاق بصالون وإلا ميكانيكي عشان أقطع الحاجه بالعمل على قولتك..

أم راشد: سعود الله يهداك صاير عصبي وما تتحمل أي نقاش_مافيه شي لو تكلمت مع أخوانك بموضوع شغلك ترى كلنا ندور مصلحتك..

"سعود بعصبيه": مصلحتي عند واسطة أخوك لافي ليه مايوظفني_وإلا بس يهتم بعيال الناس ويهمل عيال أخته...أنا أبتوظف زي وظيفة راشد بالأتصالات خليه يساعدني ..

راشد: أول شي أحترم أمي وش هالأسلوب الجديد(أخوك) ثاني شي أنا مهندس بالشركه معاي شهادة جامعيه وما جلست أنتظر واسطة أحد..

"سعود بأنفعال شديد": يوووووه أنا كل ماأجلس معكم تعيدون لي نفس الموال.. كرهتوني بنفسي كرهت البيت كرهت الشارع كرهت كل شي حولي.. عاجبكتم حالتي سنتين جالس بالبيت؟ أنا أبغى وظيفه ماأبغى أدرس.. أفهموني!!

طلع سعود وترك البيت وكالعاده المقهى هو متنفس الراحه بالنسبه له..
توتر راشد وتضايق من تصرفات أخوه الطايشه.. وزعلت أمـه وبكت على حالة ولدها اللي ماتسر ولا تريح!!

~..~..~..~..~..~..~..~..~..~..~..~..~..~

ومع صوت المطر وتمايل اوراق الأشجار و الهواء البارد تجلس مـيــار قدام المشب بمجلس الرجال مع أخوانها وهذي من أروع الأجواء اللي تعشقها ميار في الـشـتـاء....

فـيـصـل: يعني بكذا أنتي مركزه بالمذاكره عيونك بالكتاب وأذانيك مع سواليفنا أنا وصلاح..

ميـار: وش أسوي أشتقت للقعده معكم وبنفس الوقت أبي أذاكر وبعدين طفشت من غرفتي وبشم هواء
أنا أحب ريحة المطر مع دخان المشب أحسها 'لـزيـزه مرررره'..

"فيصل بإستياء": أييييييش.. لزيـزه؟ أنتي من وين تجيبين هالألفاظ هذي؟

"ميار حست بغصه لأنها تذكرت يزيد":
أأأأأ.. ممممن ... صديقاتي!!

"فيصل بدون نفس": طيب لـــيـــه أرتبكتي سؤالي عادي.. بعدين تعلمي ماتحكين زي صديقاتك..

ميار: مممااااا.. أأأ..

"صلاح وهو عاقد حواجبه": ياخي وش فيك على ميار أنت! خلها على راحتهــا..تحاسبها على كل كلمه تقولها ..؟
ماعليك منه ميار وذاكــري القعده بهالجو حلوه للمذاكره وعلى قولتك لزيزه..

"ميار بضيق": عن أذنكم بروح أذاكر بالشقه..

"حس فيصل أنه كسر بخاطرها": وين رايحه ميار أجلسي أنتي صايره زعول ماتتحملين المزح..

"قام صلاح ومسك بيدها وجلسها بجنبه": يعني بتراضيها عاقد حواجبك وتتكلم بدون نفس??
ماعليك منه هو دمه ثقيل لما يمزح.. وش عليك أمتحان بكره؟

ميار: حـــديـــث..

صلاح: ذاكرتي عدل؟

ميار: إيه بس قاعده أراجع المنهج سهله الماده..

صلاح: كويس.. طيب بأسألك متى آخـر مره سافرتي للشرقيه؟

"ميار تحاول تبتسم لأن بمجرد ماأحد يطري الشرقيه تتذكر يزيد ويضيق صدرها":
من 8 شهور تقريبآ يعني قبل الصيف..

صلاح: أووووه بعيده!!

ميار: ماحصلت لنا فرصه نروح أنا وأمي محد يودينا وماعندنا حق التذاكر عشان نسافر بالطياره..
ولا تنسى أن أبوي سمح لي بزيارة خوالي بالشرقيه مره بالسنه لأسبابه الخاصه اللي أجهلها..

صلاح: ماعليه ميار أدري اننا مقصرين معك وأنتي تدرين أن أبوي صعب وما نقدر نغير رأيه وظروف شغلي مو سهله عشان آخذك تشوفين خوالك هناك..

ميار: عارفه ظروفك ياخوي مايحتاج تتعذر..

صلاح: عالعموم أنا قدمت على إجازه لمدة أسبوعين وبسافر للشرقيه أغير جو مع زوجتي وعيالي وش رايك تجين معنا أنتي وخالتي عشان تشوفين خوالك وتستانسين معهم بعد هـم وتعب الأمتحانات..؟

"ميار وهي بتطير من الفرحه": أكـــيـــد موافقــه..

صلاح: خلاص يوم الأربعاء الجاي بعد أمتحاناتك راح نمشي إنشاءالله.. تجهزي من الحين وإذا ناقصك شيء أخلي فيصل يوديك للسوق يوم الخميس تسوقي على راحتك وبعطيك المبلغ اللي تبين..

"صلاح وهو يمسك خدها"
أهم شي تكونين مرتاحــه ومبسوطــه ..

ميار: ألف شكر لك ياصلاح صدقني ماراح أنسى لك معروفك.. الله لايحرمني من طيبتك وحنيتك علي..

فيصل: أنا ما أحب أدخل السوق خلي أحد غيري يآخذها..

"تضايقت ميار وتكلم صلاح بحده": تآخذها للسوق غصب عنك إنا لما أطلبك طلب ماتقول لأ فاهم...

"أخذ فيصل مفتاح سيارته وقام وهو متوتر": أبـشــر أوامر ثانيه..

[صلاح هو أكبر أخوان ميار عمره 27 (موظف بمستشفى حكومي)..
حـنـون على ميار ويحاول يداري خاطرها وما يزعلها لأنها حساسه وهادئه وخجوله وتتأثر بأي شي حولها_
فيصل عمره 21سنه عسكري.. شخصيته عكس صلاح عصبي وما يهتم بمشاعر أحد,, إتكالي و عـنـيـد ومتسرع في تصرفاتـه بدون مايفكر بالعواقب]..

@@@@@@@@@@@@@@@@

صــرخــه قـويـه تزلزل أركان مجلس الرجـال..
الكل فزع لمصدر الصوت ويـده على قـلـبـه..
الكل خـاف من أنها تكون مشكله أو مصيبـه ..

:ضـيـعـوووووووووووووووووووووووهـــا...!

"دخلت أم ياسر وهي مفزوعه":
وش هي اللي ضيعوها؟

"ياسر بهستيريا": الـهـجـمـــه!!!!
ضيعوا هجمات يايمه بشكل مو طبيعي قهـــر..

"أم ياسر وهي شوي وتطلع من طورها": يـــاســـر وبعدين معاك كل هالصراخ عشان مباراة.. حسبي الله عليك من ولد..
تطلع أم ياسر وهي في قمة غضبها من ياسر المهووس في حـبـه وتشجيعه لناديـه المفضل (الـنـصـــر) اللي تراجع مستواه في المواسم الأخيره بشكل ملحوظ وهذا الشي اللي سبب أزمـه لياسر..
وقفت سحايب مع أختها الكبيره هـاجـر يناظرون لشكل ياسر وهو يشجع بتوتر ويضحكون..

"هاجر أكبر خوات سحايب عمرها 27 متزوجه ولد عمتها وعندها (ولـيـد 7 سنوات ومـهـنـد 5 سنوات وديـمـه 3 سنوات) وجالسه عند أهلها اسبوع لسفر زوجها للخارج"...

هاجر: أنت الحين مجمع عيالي عشان يشجعون فريقك آخرتها خسروا..؟

"ياسر بعصبيه": ماخسروا باقي نص ساعه على نهاية المباراه وعندهم فرصه للفوز..

وليد: خالي ياسر متى بيجيبون هـدف عشان تعشينا بالمطعم أنت وعدتنا..؟

"ياسر بتوتر": الحين ياخالي الحين بيسجلون هدف..

"سحايب تناظر عيال هاجر وتسوي نفسها حاقده":
يــا غشاشين أنتم مـو تشجعون الــهـلال..؟

هاجر: عيالي يشجعون فريقين مع أبوهم هلالين ومع خالهم نصراويين مايحبون يزعلون أحد..
بسم الله عليهم وش حلاتهم وهم ماسكين أعلام النصـر ويشجعون مع خالهم يازينهم..

"سحايب وهي تضحك":
إلا قولي نـكـتـه أعصابهم بارده وكأنهم فرحانين بهدف الهلال..

"ياسر بإنفعال وتعصب": لااااااااااااا ظــلـــم ظــلــــم..

(كان صوت المعلق يؤكد قرار الحكم بأحتساب ركلة جزاء لنادي الهلال وسط فرحة جماهير النادي والمعارضه الشديده من لاعبين وجماهير النصر)..

"حط ياسر أيده على راسه وتنهد بضيق": وش هالمهزلـه هذي..حـــرام والله حرام..

(بدون شعور صـرخـوا عيال هاجر فرحانين بهدف الهلال وهم يلوحون بأعلام النصـر ببـراءه طفوليه وبشكل مضحك...
ضرب ياسر علبة البيبسي بالتلفزيون وهو يسب ويشتم حكم المباراه..
ومـا تحمل إزعاج وليد ومهند اللي قاعدين يرقصون مع ديمه وأمهم فرحانه تصفق وتشجع معهم,, مسك كل واحد بطرف قميصه وطلعهم برا وهاجـر تحاول تمسك نفسها من الضحك لايحط حرته وقهره فيها وهي تحضن ديمه لا يأذيها)

جلست سحايب تهدي أخوها و تدعي عالحكم,,
كسر خاطرها لأنه أرتفع ضغطه وشوي بيصيح من ظلم الحكم لنـاديـه!!

* * * * * * * * * * * * * * * *

[برستيــــج]

©[الـــجـــزء الـــرابــــــــــــــــــــــع]©..

يـوم الأثـنـيـــــــن...
(11/22)

^(إحـبــاط تراكم وتكدس بمرور كل هذه السنوات دون ذهـب يبرق ويلمع يشفي غليل جماهير عـطـشــى,,
إحـبــاط يعكر صفو كل فؤاد أصـفــر,,
هذا هو حال الفريق النصـراوي في السنوات الأخيره,,
حالة إحباط عارمـه.. سببها الأول والأخير البعد عن البطـولات ومحاولة العوده سريعآ,,
حالة تراكميه.. ولدها الجفاف الأصفـر والبعد عن اللمعان فيما الجار الأزرق يرفل في نعيم الألقاب وحصد البطولات......)^

كانت هذه كلمات مواســـآه كتبتها سحايب بدفتر الصراحـه بعد ماتأثرت بحالة أخوها المتعصب جدآ جدآ في عشق نادي{النـصـر}..

"مسكت ميريام الدفتر وقرأت الكلام اللي كتبته سحايب بصوت مسموع للشله وهي تضحك": حركاااااااات صايره زحـيـفـه!! تتابعين مباريات وتتأثرين بالخساره بعد؟

معيضه: كل البنات اللي بأعمارنا لهم ميول رياضيه ويشجعون فريقهم مـع المنتخـب طبعآ.. وانا عن نفسي هلاليه مـــوت!

درر: أنا نصراويـه..!

"سميه وهي تحضن معيضه":
أنا بعد هلاليـــه..!

"ضحكت ميار": أنا.. ولا شــي هههههههههههههههههه

"أتجهت سهام الإنتقاد من راويه لصاحبات الميول الرياضيه"..

راويه: خيييييير أنتي وياها وش خليتوا للشباب؟ وين الأنوثـه والرقـه.. مباريات وأنديه ولاعبيـن..!
وأنتي ياسحايب تاركه المذاكره وجالسه تشجعين مع أخوك؟

سحايب: وش أسوي كسر خاطري يشجع لحالـه..

معيضه: ليش ماحضر المباراه بالملعب أنا أخواني مايطوفون حظور مباريات الهلال بالملعب..

سحايب: ياقلبي عليه والله هو دايم يحظر مباريات نادي النصـــر بالملعب بس مشكلته "وهي تكتم ضحكتها" أنه كل مباراه يحضرها لهم بالملعب يـخـسـرون وجهــه نـحــس.. وأمس جرب يشجعهم بالبيت وخـســروا بعد..! آآآآه جـن جنونـه,, وانا اللي مالي دخل أنقهرت مره لما خسروا.. ظلمهم الحكم والله الظليمـه شينـه!!

معيضه: أحسن أحسن يستاهلون.. مايليق الفوز إلا للهلااااااااااال وبس..

راويه: هيييييه ياأبو الشباب قلنا شجع بس بدون تعصب الله يهديك لأن التعصب من سمات الجاهليه فهمت..؟

"الشله أنفجروا ضحك علي انتقادات وتعليقات راويه.."

درر: أحس كل الأنديه في السنوات الأخيره بس يخسر ناديهم في مباراه حطوها برأس الحكم وانه هو سبب الخساره وتعمده الفوز للفريق الخصم..
والمشكله حتى في حالة لــو فاز هذا النادي ماتتغير أقوالهم وتصريحاتهم يشتكون ويتذمرون من الحكم لأن ماأحتسب لهم ركلات جزاء أو هدف صحيح وألغاه بحجة التسلل مدري وش يرضيهم..؟

راويه: ياســـلام... أنتهينا من التعصب طلع لنا التحليل الرياضي.. باقي مناقشة الأحداث المؤسفه اللي يسببها الشباب في الشوارع بعد المباراه..
"وهي تحط أيدها على خدها" تفضلـــي سميه..؟!

سميه: هههههههههههههه راويه أنتي ليه معصبه مافيها شيء لو تناقشنا بمواضيع رياضيه.. أعتبريها ثقافه عامه أو إهتمامات سطحيه..

ميريام: أنا مع اني ماأهتم بالكوره ولا أشجع أي نادي بس أحيانآ لما أشوف عمي يوسف ودحمون يتابعون مباراه أجلس معهم عشان أضحــك على أشكالهم لما يعصبون وينفعلون' أنواع السب والشتم والدعوات على الحكــم واللاعبيـن والحـــارس' هذا بس لما يتابعون المباراه من غير إذا خسر الفريق..!

سميه: بعد؟ أستغفر الله حرام عليهم ليه يدعون عليهم..

معيضه: عادي كل الشباب كذا..

راويه: أخوك عبدالرحمن ماوراه مذاكره جالس عالمباراه؟ وعمك هذا اللي ينقال عنه مدرس قدوه لطلابه هذي أخلاقه وقت المباريات؟

ميريام: طـيـري أنتي!! أي قدوه إذا إنه لما يرجع من المدرسه يشتكي من الطلاب أنهم مستهترين وما يسمعون الكلام هذا وهم طلاب متوسطه شلون لو أنهم طلاب الثانويه..
ودحمون مافتح كتابه كل وقته عالمباراه حتى التحليل الرياضي اللي بعد المباراه تابعه بس عشان مايذاكـر.. وكلما سأله أحد ذاكرت يقول أيوه وهو يكــذب..

سحايب: ياحبيبتي الشباب ماينخاف عليهم إذا ماذاكروا تلاقين أساتذتهم يساعدونهم ويتعاونون معهم مو أحنا حسره علينا من تدخل الأبله وهي ماده البوز شبرين ومعصبـه.. الظاهر أشكالنا ماتعجبها هههههههههههههههه

ميريام: دحمون دايم يحكي لي عن أساتذتهم فـــلـــه..ودايم درجاته كامله وحلوه مع أنه مــو بمستوى ذكائي وعبقريتي بشهـادة عمي يوسـف طبعآ دايم يمدح عقليتي الذكيه..

"تقاطعها مـيــار":
بـــنـــاااااااات أسمعوا الخـبــر الحلـو.. بسافر بعد الأمتحانات للشرقيه مع صلاح وعائلته..!

درر: واااااااااو بتشوفين لزيز؟

"أبتسمت ميار بخجل": إيوه راح أشوفه بإذن الله..

"ميريام وهي تصفق": برافــــووو برافــــووو فيه تقدم ملحوظ ياشلة الإيزي هههههههههههههههههه

"أستانست سحايب لأن ميار راح تسافر وصارت تغني (من فينا) للجسمــي,, وتطبل على باب المعمل.. والشله تصفق وتغني معها بحماس":

*[ مــدري شاسـوي ياقلبـــي لما أشوفــك بكــره جنبــي ..
ودي أحكي لك غرامـي خايف عيونـي تخبـــي ..
بكره يــاااااعـمــري لقانـــا,, وحدنـــا ماحـد معانـــا,,
لو بكينـــا ياحبيبــي ماعلى اللهفــه مـــلام ]*...

¤¤¤¤¤¤¤¤¤¤¤¤¤¤¤¤¤¤¤

وفي المدرسه الثانويه للبنين وتحديدآ اللي يدرس فيها عبدالرحمـــن..
كانت القاعه فاضيه لأن كل الطلاب أمتحنوا وطلعوا مابقى غير عبدالرحمـن والمراقب الأستاذ السوري مصطفى..
حاول عبدالرحمن يغش من زملاءه يغير بياض الورقه إلا من الأسئله لكنه عـجــز بسبب الحصار القوي من المراقبين ولقاها فرصه بعد ماخلت القاعه أنه يطلب من أستاذ مصطفى يساعده أو بالأصح
(يـغــشـشــه)..!!!

"أستاذ مصطفى بملل":
خلصني ياأبني عجل الله يرضى عليك إتأخرت كتير هلأ بيخلص الوأت وأنت لساتك عم بتفكر..

عبدالرحمن: أستاد تكفى غششني!

"أ/مصطفى بأنفعال": لأ.. شـو بغششـك..حـــرااااام..

عبدالرحمن: تكفى تكفى ياأستاد والله إني متوهق وماني عارف شلون أحل الأسئله..

"أ/مصطفى": مستحيل أساعداك.. أنا عندي ذمـه وضمير مابعمل هيك..

عبدالرحمن: ذمــه وضمير هاه.. أجل أجلس وأنتظرني لمـا أفكر وأجاوب..

"جلس عبدالرحمن يطبل عالطاوله ويغني بأسلوب أستفز الأستاذ وعصبه زياده"..
[يـامـال فـرقا العين كان أحجزوني .. تضيق بي الدنيا وأنا مواعد أحـبـاب .. يـوم الخميس اللي يجي واعدوني .. أحبابي اللي دونهم ترخص أرقــاب........]

"يقاطعه أ/ مصطفى بعصبيه": صبرك ياأيوب..كــم عندك سؤال ماحليتوا؟

عبدالرحمن: كل الأسئله ماحليتها وهي 3 أسئله..

أ/مصطفى: بجاوب لك على سؤال واحــد بـــسok..

عبدالرحمن: لأ تكفى أستاد كل الأسئله عشان بسرعه اجاوب وأطلع..

"أ/مصطفى بحده": ألتلك سؤال واحد بس..

عبدالرحمن: اجل أنتظرني أفكر بعد..
(وكمل أغنيته وهو يطبل عالطاوله)..

"يقاطعه أ/ مصطفى بيأس": أمري لأللـه هات لشوف شو السؤال الأول..

عبدالرحمن: فقره أ '^استخرج مما يلي جموع التكسير وأذكر أنواعها وفقره ب ......^'

أ/مصطفى: ولك إخــراااااس.. أنا بجاوبك بدون ماتقرأ لي السؤال..

"جاوبه أ/ مصطفى وسأل عبدالرحمن عن السؤال الثاني"..

عبدالرحمن: فقره_أ_'^ ضع في المكان الخالي ضميرآ منفصلآ مناسبآ وأعـربه وفقره _ب_ عين العلم المفرد وأنواع المـ ....^'

أ/مصطفى: ولك العمى بألبك ألتلك ماتحكي ولا كلمي بتفهم علي..؟ أسكوووت أنا بجاوبك..

"عبدالرحمن وهو يحاول يمسك نفسه من الضحك":
طيب أنـت تسألنــي..

أ/مصطفى: شو السؤال الثالث,,أعـــرب فقره أ و ب..

"سكت عبدالرحمن هز براسه يعني نـعــم وكتوفه تهتز لانه كاتم ضحكته"..
قلب الأستاذ بأوراق أجابات الطلاب وماحصل ولا طالب حل هالسؤال..

"عقد حواجبه بأنفعال": لك العمــى شو هاد ولا جـحـش حــالـوا....!
. . . أيوااااه ليكو الجواب ..

(كتب عبدالرحمن الأجابه وطلع من القاعه وهو فرحان وبقى أستاذ مصطفى يجمع ويرتب أوراق اجابات الطلاب وهو معصب ومقهور من أستفزاز وشغب بعض الطلاب في ظل غياب او انعدام المسؤليه والرقابه من قبل إدارة المدرسه)..

^..^..^..^..^..^..^..^..^..^..^..^..^..^..^..^..^

[برستيــــج]

وفي ثانوية البنات الساعه 12 ونص فتحت بوابة المدرسه وكان ميكرفون الحارس بعد خربان..
طلعوا سميه وميار وسحايب وراويه من بدري عشان يلحقون على باصاتهم أما معيضه تتأخر لأنها تروح مشي بيتهم قريب من المدرسه وميريام تنتظر السايق ودرر على حسب موعد خروج أبوها أو أخوها من دواماتهم..
أنتظرت سحايب عند البوابه ربع ساعه والجو كان بارد مره
شافت أن باصها تأخر كثير دخلت داخل المدرسه عشان تتصل على أهلها..
حصلت ميريام ودرر ومعيضه جالسات يسولفون..
أبتسمت وهي رايحه لهم وتأشر بأيدها:
جـــيـــب ثـانــي ههههههههههههههههههههههههه

"ضحكوا البنات على حركتها وجلست معهم سحايب":
باصي شكله ماراح يجي أبتصل على أبوي أو ياسر ياخذوني..

معيضه: أستريحي بس المديره مقفله على تليفون المدرسه وش كثر بنات راحوا بيتصلون وصرفتهم الأداريه..

سحايب: يوووووه وش أسوي الحين أهلي بيقلقون لـو تأخرت..

معيضه: وين باقي البنات اللي معك في الباص..

سحايب: نص راحوا لبيوتهم على رجولهم والباقي جالسين في الساحه..

ميريام: خلاص تعالي معاي أوصلك لبيتك..

سحايب: لا والله عشان يذبحوني أهلي_ مايرضون أطلع مع أي أحد غريب..

ميريام: أنا بوصلك مع السايق مو مع أحد من أهلي.. يعني وش فرق سايقنا عن سايق باصك..

درر: سحايب روحي مع ميريام ترى مو من صالحك لو تأخرتي على أهلك وإنشاءالله ماراح يخانقونك..
"وهي تقوم" أنا بطلع أخاف أتأخر على أخوي أشوفكم بكره بـــاي..

"قامت معيضه وطلعت مع درر"..

ميريام: معيضه شوفي السايق إذا جاء أرجعي ناديني..

"طلعت معيضه ورجعت أشرت لميريام من بعيد تطلع..
تأخرت ميريام على السايق وهي تحاول مع سحايب تطلع معها لأن مابقى بالمدرسه إلا شوية بنات,, وبالأخير وافقت سحايب وركبت السياره مع ميريام وقلبها بيتجمد من الخوف"..!

___________________________


وقف السايق قدام بيت سحايب وكانت بتنهـــار وتصييييح لما شافت ياسر واقف عند باب الشارع بلباس الدوام مع فــواز وهو يتلفت حوله بتوتر توقعت إنه معصب عشانها..
نزلت سحايب وهي تسحب رجولها بالأرض وحاضنه شنطتها وأيدينها ترجف من الخوف..
ولما شافها فواز نزل راسه بالأرض ونزل الدرج وهو متجه لبيتهم..

"ياسر والشرر يتطاير من عيونه بعدما سحبها من عباتها لداخل": مع مـيـن راجـعـه بالسياره ذي ولـيــش تأخرتي..؟

"ماردت عليه سحايب وركضت لداخل وحصلت أمها واقفه بالصاله,,تخبت بسرعه وراها وهي تصيح": مع صديقتي مـريـم..

"ياسر وهو يصرخ بوجهها بدون مايحترم وجود أمـه اللي واقفـه بينهم":
طيب ليييييييييه تأخرتي لييييييه؟

"سحايب وصوتها كله صياح": والله أني كنت أنتظر باصي شفته تأخر جيت مع مريم عشان ما أتأخر عليكم أكثر..

ياسر: عذرك أوقح من ذنبك يالسافـلـه كان دقيتي من تليفون المدرسه علينا عشان نجي ناخذك.. فشلـــتيني قدام فواز الله لايوفقك راجعه مع سايق صديقتك؟

سحايب: المديره مقفله على التليفون ومـا.....

"ياسر وهي يتهدد عليها بيضربها بس أمه أمسكته": أسكتي ياكـذابـه..أعترفي وين كنتي وليه تأخرتي..؟؟؟

"صرخت أم ياسر وهي ترجعه على ورى": يااااســـر أستح على وجهك تشك بتربية أختك عــيـب عليك..

ياسر: يايمـه كان أنتظرت شوي بالمدرسه,,أنا كنت بروح آخذها لو تأخرت دقايق زياده بس هي ماصدقت خبر جت مع صديقتها ليــه البيت مافيه رجـــال عشان تتصرف على كيفها...؟

أم ياسر: خلاص ياسر ماصار إلا الخير خلي أختك ترتاح ترى وراها أمتحان بكره..

"ياسر وهو يصرخ": وش ترتاااااح أنا أبي أربيها هالحقيره عشان......

"قبل مايكمل كلامه هجم عليها فجــأه وضربها كـف على وجههـــا"..

"صرخت أم ياسر": يـااااااااســر لاتضرب أختك!! هذا وأنا عايشه تسوي بأختك كذا شلون لامــت؟؟؟؟

"خنقتها العبره أم ياسر لما نطقت آخر كلمه ومسكت طرف طرحتها وهي تمسح دمعه نزلت من عينها..
دخلت سحايب متجه لغرفتها وهي تشاهق من كثر الصياح..
ضعف ياسر لما شاف دمعة أمـه وهدأ بسرعه.. قرب منها وهي يحب على راسها ودموعه تحجرت بعيونـه": سامحيني يمــه والله مو قصدي أزعـلك..

"ام ياسر وهي تبعده عنها":
تشك بأخلاق أختك وتكذبها قدامي بدون ماتحترمني وتبغاني أسامحك؟
مـا أخذت شوي من حنية قـلـب أبوك على خواتك؟
أبوك اللي بحياته مامـد أيده على وحده من بناته تجي أنت تتهدد على سحايب وتضربها؟ هذي آخرة التربيه فيك..

"حاول ياسر يبرر لأمـه موقفه لكنها صدت عنه ورفضت تسمعه وهي رايحه لغرفة سحايب"..
طلع ياسر من البيت وهو يحس الدنيا ضاقت فيه وركب سيارته وهو مايدري وين يروح..
دخلت هاجر البيت مع أبوها واللي كانوا راجعين من الصيدليه دورت على أمها وهي تناديها عشان تعطيها الدواء اللي طلبته حصلتها واقفه عند باب غرفة سحايب..

هاجر: يمه وش عندك واقفه هنا بغيتي شي من سحايب..

أم ياسر: أطق عليها الباب أبغاها تجي تتغدى ومافتحت الظاهر نامـت..

"ماحكت أم ياسر لهاجر عن مشكلة ياسر مع سحايب خافت يزل لسان هاجر قدام أبوها ويتضايق ويعصب على ياسر"..

هاجر: تلاقينها تعبانه من الأمتحانات وماتشتهي الأكل زياده إلا أنتي وش فيك باين عليك متضايقه..

أم ياسر: مافيني شيء بس راسي مصدع بروح أرتاح..

هاجر: سلامتك يمه أنا بجيب لك كأس ماء مع الدواء لغرفتك..



**********************

[برستيــــج]

بعد الظهر كان جالس عبدالرحمن بالصاله يتفرج عـالـTV ‏..
دخل عليه يوسف وهو يناظر فيه..

يوسف: وش قاعد تسوي..

"عبدالرحمن وهو ياكل شيبس": أتفرج عالفيلم الاجنبي..

يوسف: ‎ you must be joking‎...?‎ ‎

عبدالرحمن: هااااااااه.. عمي الله يخليك لاتحكي معي أنجليزي تراني مدلخ ماأفهم شي باللغه ذي..

يوسف: إنت تمــزح..! جالس تتابع أفلام وتارك الدراسه على جنب؟

عبد الرحمن: مادة بكره سهله وماتحتاج لدراسه (تفسير) بس أحفظ معاني الكلمات والأسئله وخلاص..

"يوسف وهو يطفي الTV‏"‏:
أنت ذاكرت عشان تحكم على سهولة الماده..

"عبدالرحمن وهو يعفس وجهه": بالله عمي شغله أنا متابع الفيلم من بدايته باقي شوي وينتهي..

يوسف: لأ يعنـي لأ..
المهم قولي وش سويت بإمتحان القواعــد اليوم؟

عبدالرحمن: كل شي حليته ماتركت ولا سؤال أصلآ الأسئله سهله مره..

"يوسف وهو يخز عبدالرحمن يبغى يشككه بنفسه":
شلووووون حليت عدل وإنت ماذاكرت شي كل وقتك جالس على المباراه..؟

"أرتبك عبدالرحمن وبسرعه جاوب": واللــه ياعمي ماحد(غششني) أنا حليت الأسئله لحالي...

"أنفجر يوسف بالضحك وكان صوته عالي وواصل لآخر البيت":
هههههههههههههههههههههههه دحــمـووووووون!!! أحد جاب طاري الــغــش..إنت بكذا فضحت نفسك ههههههههههه.. أعترف من اللي غششك..؟

عبدالرحمن: هو مهوب غــش يعني تقدر تقول مساعده..

"يوسف يسايره": طيب ياشاطر مين اللي ساعدك؟

"عبدالرحمن بخوف": أقولك بس أوعدني إنك ماتعلم أبوي وأمي..

"صرخ يوسف عشان يخوفه": جاوبنــــــي بســـرعـــه..!!

عبدالرحمن: أأأأ.. أستاذ مصطفــى اللي يدرسنا إنجليزي كان هو المراقب علينا في القاعه..

"يوسف بأبتسامة خبث": واللـــه إني توقعت.. حركات العربجه والمرجله اللي عندك ماتطلع إلا على بزران الحاره وإلا على أساتذتك اللي من جنسيات عربيه..! حركاتكم يالطلاب ماهي خافيه علي..
هو غششك أقصد..هو ساعدك من نفسه وإلا أنت طلبت منه..؟

"عبدالرحمن يناظر للأرض": لأ هو من نفسه..

يوسف: ساعدك أستاذ مصطفى بدون ماتستفزه وتسوي حركات تقهره وتطلعه عن طوره؟؟ مستحيل..

عبدالرحمن: ..........

"يوسف وكأنه يكلم نفسه":
شاطر يابطل شاطـــر..

"عبدالرحمن بضيق": عمي تــكـفـــى لاتعلم أبوي..

"يوسف بصوت هادي ومسموع": إنت خايف من أبوك وماأنت خايف من ربـــك؟
ترضى إنك تبني مستقبلك على حـــرام؟
قال عليه الصلاة والسلام: [من غشنا فـ ليس مـنـا]..إشاره إلى إن الغش خارج عن أخلاق المسلمين..
وإنت بغض النظر إنك غشيت في الأمتحان أسأت الأدب مع أستاذك مصطفى وعيب هالحركات هذي إنت تروح للمدرسه عشان تتعلم وتستفيد وإلا عشان تسوي مشاكل..

"عبدالرحمن يناظر يوسف بذهول": وشلون عرفت؟

يوسف: من مصادري الخاصه وإلا أنا ليش أسألك عن أمتحانك؟

عبدالرحمن: أكيد قالك تركي؟

"يوسف وهو يعدل جلسته": تركي يقول إن أستاذك دخل غرفة المدرسين وعلمهم بحركاتك داخل القاعه وأنصدم تركي لما درى إنه ولد أخوي اللي هو إنت!!!

"عبدالرحمن وبخاطره": النشبه هذا تركي قاعد لي عالوحده بهالمدرسه كل حركه أسويها يخبر عمي وبالتفصيل.. متى ينقل لحايل وأفتك منه..

"قطع تفكيره يوسف": توعدني إن اللي صار اليوم مايتكرر..

"عبدالرحمن وعلى باله مسوي فيها ذكاء": عمي ترى الإسلام حـــرم الفتنـــه بعد.. وما يصلح يفتن علي تركـي عالطالعه والنازله........؟

"ضرب يوسف عبدالرحمن ضربه قويه على راسه زلزلت نظارته":
قـم أنقلع ذاكر يالله.. ومره ثانيه لو بتسوي حركتك اللي بالقاعه اليوم أنا بفتن مديرك عليك فاهــم.. وتأكد إن أبوك بيعرف بالموضوع وباخليه يأدبك بعد..

"عبدالرحمن بسخريه": من سكنت عندنا وإحنا كلما غلطنا قلت بتعلم أبوي علينا وما تسوي شـي بس كذا تخوفنا..

(قام يوسف بيسوي نفسه يبي ضرب عبدالرحمن ورجع جلس لما شافه هـــرب .. قعد يضحك على غبائـه مع إن دايم يعصب عليه بس عصبيته مو جــد لأن عبدالرحمن حنون وقلبـه أبيض ولو كذب تفضحه عيونه ويخونه أسلوبه)...



/,,/,,/,,/,,/,,/,,/,,/,,/,,/,,/,,/,,/,,/,,/,,/



وفي المغرب في بيت أبو ياسر كانوا قاعدين في الصاله..

"هاجر وهي توجه كلامها لأمها بوجود أبوها":
غريبه سحايب نايمه لهالوقت.. بالعادة تنام ساعتين بالكثير وتصحى بدري عشان تذاكــر..

أم ياسر: ........

"كملت هاجر": حتى ياسر من الصبح ماشفته لما رجع من دوامه الظهر أنا كنت بالصيدليه.. وهو مايطوف قهوة العصر واليوم ما جلس معنا نهائيآ..

أبو ياسر: أصلآ ماجاء للبيت أتصلت على جواله مقفل وسألت فواز عنه قال إنه ماشافه بس أكيد إنه مداوم الحين..

هاجر: عنده فتره ثانيه؟

أبو ياسر: أكيد ياسر دوامه على فترتين وأمس أستأذن من دوامه بالفتره الثانيه عشان يتابع المباراه..

"شهقت هاجر وهي تحط أيدها على صدرها": لايكون زعلان من خسارة النـصــــر بمباراتهم أمس عشان كذا معصب وماجاء البيت....!!

أبو ياسر: ليه هو أول مره يخسر فريقه اللي يشجعــه..

"ضحكت هاجر": هههههههههههه يـبــه لايسمعك ترى بيزعل.. أمس بغى يكفخ عيالي لما خسر فريقه بس الحمدلله لحقنا على أعمارنا وهربنا...

"أبو ياسر وهو قايم": ماعليك منه.. المهم أنا بروح أشوف أختك سحايب وش عندها نايمه لهالوقت..

"أستدرك كلامه وسأل أم ياسر" لايكون فيه أحد مزعلهـــا..؟؟

( أم ياسر ماقدرت تخفي ضيقتها على حالة سحايب واللي كدر خاطرها إنها بفترة أمتحانات ثانويه عامه والمشاكل بتأثر على نفسيتها ومعدلها وبنفس الوقت ماكانت تبغى أبو ياسر يعرف بالموضوع )..


"كانت سحايب في غرفتها وماكان لها نفس للأكل ولا المذاكره ولا لشيء عقب الموقف اللي صار لها مع ياسر.. حطت راسها عالمخده وهي تتلمس خدها ودموعها تنزل ومهي قادره توقفها..
سمعت صوت أبوها عند الباب يناديها يبغاها تفتح له..
قامت من السرير بكسل ووقفت عالتسريحه تعدل شكلها عشان ماتحسس أبوها إنها زعلانه.. وتدري أن أبوها لو عرف بالسالفه بيعصب على ياسر وماتستبعد يضربه"..

"سحايب بخاطرها": يا اللــه!!! شكلي مو طبيعي أبــدآ.. عيوني منتفخه من فوق وتحت ماتبيــن وخدودي بتنفجر من كثرة وحرقة الدمـوع عليها.. واضح على شكلي إني كنت أصيح وش أقول لأبوي؟
آآآآه.. بقوله زفتت بإمتحاني مع إن مادة الحديث سهلــه وكذبتي بايخه..
فتحت سحايب الباب وهي منزله راسها وتجيب شعرها على وجهها عشان ماينتبه أبوها..

"أبو ياسر وهو مبتسم": هلا بنتي حبيبتي وش هالنوم الثقيل ماوراك مذاكره بكره؟

سحايب: ........

"أختفت الأبتسامه من وجه أبو ياسر وهو حاط أيده ورا ظهرها ويجلسها عالسرير":
ليش زعلانه أحد مضايقك وإلا مخانقك..؟!

"سحايب وهي تشاهق من الصياح": .........

أبو ياسر: ليه تصيحين؟ أحد مزعلك بهالبيت قولي مين والله لأقلبها على راسه..

"سحايب تهز براسها يعني": لأ..

أبو ياسر: ماحليتي زين بالأختبار اليوم؟

"سحايب تهز براسها وهي تناظر بالأرض وتمسح دموعها": إيـه..

أبو ياسر: يابنتي خوفتيني عليك أحسب صاير لك شي يضرك.. وش كان أمتحانك اليوم؟

"سحايب بهمس": حــديـــث..

أبو ياسر: الحديث ماده سهلــه وإنشاءالله ماراح تأثر على النسبه.. خلاص أنسي مادة اليوم وشدي حيلك بالمواد الثانيه وذاكريها عدل.. طيب الأختبارات اللي فاتت حلوه؟

سحايب: إيـه..

أبو ياسر: تمام .. وبعدين بنيتي شاطــره وماينخاف عليها..صح وإلا أبوك غلطان؟

سحايب: صح..

"أبو ياسر وهو يمسح على رأسها": خلاص بابا قومي غسلي وجهك وتوضي وصلي لك ركعتين عشان تهدأ نفسيتك شوي وذاكري.. وش عليك أمتحان بكره؟

سحايب: جغرافيــا..

أبو ياسر: ركزي بالمذاكره وأنسي مادة اليوم وحطي ببالك إنك بتنجحين وشيلي من بالك مسألة هالرسوب خلاص بـابـا..

"حاولت سحايب ترسم أبتسامه على شفاها": أبشر يبــه..

طلع أبو ياسر وجلست سحايب ترتب مكتبها وتطلع كتاب الجغرافيا وكراسة الخرائط..
دخلت عليها هاجر وهي شايله بنتها ديمه ومبتسمه:
وش عنده الحلو زعلان يتدلــع!!

"حطت سحايب راسها عالمكتب وضمت أيدينها حوله وبخاطرها": راااااايــقــه!!!!

"هاجر وهي واقفه بجنبها": وش فيك يادبــا ماشبعتي نوم..؟

سحايب: هاجر تكفين خليني لحالي مالي خلق لك..

هاجر: بتذاكرين؟

سحايب:........

هاجر: أمي تقول تعالي أكلي حطينا العشاء..

سحايب: أووووف مــابــي أكل أطلعي برا..

هاجر: وجـع سحايب لاتتأففين .. إنتي وياسر ماتحترموني أبدآ الواحد لسانه وش طوله علي هذا وأنا أختكم الكبيره وقدوتكم..

سحايب: طيب ياقدوتنا أبغى أذاكر خليني على راحتي..

هاجر: أرفعي راسك وكلميني وش فيك كذا..

سحايب: أوووووووف وبعدين..

هاجر: بسم الله خلاص فهمنا.. عن أذنــك..



# # # # # # # # # # # # # # # #