المنتديات
المنتديات
| روابط إعلانية |
| ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 |
| | أدوات الموضوع |
21-08-08, 09:59 AM
| #6 |
| |[ عـضـو مــاسـي ]| الدولة:  |  رد: قصة: ×أطلالـي ملت وقوفـي× مواقف وأكشنات بعالم المراهقات ...أقرأوهااااااا الساعه 4 العصر صحت سحايب من النوم "قيلولة الظهر" وأتجهت للصاله اللي كان قاعد فيها أمها وياسر.. -: تعالي سحايب تقهوي معي قاعده لحالي .. ياسر: صار لي ساعه قاعد معك وتقولين لحالك؟ أم ياسر: أنت قاعد ساكت وتلعب بجوالك.. ياسر: لأ يمه أنتي شكلك ماتبيني أجلس معك أقوم أمشي أحسن لي.. أم ياسر: أقعد بس ياولدي صاير بسرعه تزعل..! "ياسر وهو يحب راسها": الله لايحرمنا من القعده معك.. بس أنا مواعد واحد من الربع بروح له فمان الله.. كانت سحايب واقفه قبال شباك الصاله وفاتحه عيونها عالآخر ومتفاجأه من المنظر اللي قاعده تشوفه..!!!!! هـنـادي صاعده السلم وباين راسها وهي تأشر لسحايب من ورى الجدار وكالعاده الضحك عندها متواصل.. سحايب: أنتظري كنوده ألبس الطرحه وأجيك.. أخذت سحايب السلم اللي بجنب باب السيب وصعدت عليه سلمت على هنادي_ كنوده: هاه وش رايك بالفكره أعجبتك صح.. ولا تلوميني شفت ياسر يتضايق من زياراتي لكم قلت أمسك كرامتي واجلس بالبيت بلا سحايب بلا هم بس وربي ماقدرت أصبر يوم واحد بدونك وحشـتـيـني,, سحايب: حتى أنا مشتاقه لك.. ولو أنها فكره غـبـيـه مره لكن ما أقدر أعارض أخاف تذبحيني.. بس ياكنوده افرضي على يوم وقفتي عالسلم وشافك ياسر وإنتي حاطه الطرحه على راسك وبدون ماتغطين وجهك؟ "قبل ماتتكلم كنوده كملت سحايب": أدري بتقولين خليه يشوفني عادي مجنونـه ماأشره عليك.. كنوده: ههههههههههههه وش رايك على هالوقفه الحلوه نتصل على البقاله ونطلب لنا شيبس وكولا وكاكاو.. سحايب: فكره بس أنا على الحديده مامعي ولا فلس.. كنوده: أنا معي أنتظري ثواني أجيب فلوس وأجي.. "جت كنوده وهي شايله بأيدها علبة (مـاكـنـتـوش).." سحايب: واااااااو مـفـاجـأه.. أنا أحب طعم اللي لونها أزرق وووو..أصفر.. "ضحكت كنوده": ههههههههه وش أزرق وأصفر؟ هذي حصالـة الـفـلـوس حقتي<<<<<<<< "سكتت سحايب وحست بإحراج.. فتحت كنوده العلبه وكانت مليانه ريالات وخمسات وعشرات.. أخذت 15 ريال".. سحايب: كنوده وين أهلك مالهم حس.. كنوده: فواز طالع مع أصدقاءه و أمي كالعاده تفرفر بين هالبيوت تقول أنها بتزور جارتنا أم شافي أمس طاحت من الدرج وأنكسرت رجلها هههههههههههههههههههه.. سحايب: كنوده لاتتشمتين بالحرمه لايصير فيك مثل اللي صار فيها... كنوده: لأ إنشاء الله فيك أنتي والأمتحانات على الأبواب والرجل او اليد(أترك حرية الإختيار لك) تنكسر وما تقدرين تمتحنين وترسبين ياسلااااام ونـاســه... سحايب: بـــس بـــس سويتيها قصه..فـالك ماقبلناه.. غيرانه مني يابطالـه إني بأتخرج من الثانويه وأنتي حتى ماعندك إلا شهادة ثالث متوسط.. وصار لك 3سنين قاعده بس حق شغل البيت مع إنك بعمري..!!! كنوده: على الأقل أنا مرتاحه من القعده من صباح الله خير ومن مغثة المدرسات وطفش الحصص.. وبعدين أنا أخــاف أدرس وأتخرج وأتوظــف ويطمع فيني عريس المستقبل.. سحايب: امحق خــوف قولي أن المدرسه ماتتحمل مشاكلك أصدقـك بدون لــف ودوران.. كنوده: كلش عاد يالمؤدبه!! أنتي وشلتك إذا ماتغنون وترقصون بالطلعه كل يوم ماترتاحون.. سحايب: أقوووول الشرهـه علي أنا اللي أسولف لك عن يومياتنا أول بأول.. وترى تعبت من الوقوف والطرحه خنقت وجهي والجو بـارد مرررره ياتجين عندي أو أنا اجيك.. كنوده: لأ أنتي تعالي عندي سحايب: Ok دقايق ألبس عباتي وأجيك.. بس أبتصل عالبقاله عشان أطلب لنا .. ;;;;;;;;;;;;;;;;;;;;;;;;;;;;;;;;;;;;;;; اليوم موعد وصول أم ميار وتحديدآ الساعه 8 ونص المساء.. تجهزت ميار لوصول أمها رتبت الشقه وبخرتها وجهزت الشاي والقهوه ولبست Top قطنيه مزينه بالرسومات مع تنوره من الجينز فوق التنوره حزام جلدي ورفعت شعرها الكستنائي بطريقه رائـعــه وكأن الأستعداد هذا مو لأمها وبس إلا لـولد خالتها يـزيـد حبهـا القديم المتجدد له وحنينها لأيام الطفوله الحلوه معه.. وقفت ميار تتأمل قـفــص العصافير اللي معلق بجنب باب المطبخ.. أبتسمت لما تذكرت أول موقف صار لها مع يزيد.. لما سافرت مع أمها وخالها وعائلته لزيارة خالاتها بالشرقيه_ وقتها كان عمرها11 سنه.. وكانوا عيال خالها وخالتها فوق السطح ماسكين عصفور صغير لونه أصفر وفرحانين فيه أعجب ميار وطلبت منهم تمسك بيدينها شوي لكنهم رفـضــوا.. زعلت وتمت واقفه تناظر فيهم بأنكـســار.. دخل يــزيـد (اللي يكبرها بثمان سنوات) وأنتبـه لميار وحس بتعاطف معها لأن هذي أول زيارة لها للشرقيه من بعد طلاق أمها.. قـرب منها ومسح على راسها وهـو مبتسم لها:- وش فيك ميار ليش ماتلعبين مع العيال بالعصفور..؟ "ميار ببراءه وهي تشد ثوبه": شفهم لزيز.. أبغى امسك العصفور بأيدي وما رضوا يعطوني.... مشى يـزيـد وهـو مـاسـك بأيدهـا وأخـذ منهم العصفور وحطه بين كفوفها.. وقال لها:- اللي ياخذ العصفور منك بس علميني (((أكـســر لـه أيـده)))!!! _________________ تنهدت ميار وهي تصب الماء بقفص العصافير اللي بشقتهم وهم عصفورين واحد سمته بأسمها "ميار" والثاني سمته "لزيز" لأنها وهي صغيره ماتعرف تنطق أسم يزيد وتقوله(لـزيــز) وكانت ميار كل ماتشوف العصفور تبتسم وتغني أغنية (الـغـالـي يـعـود) لأن تحب هالأغنية كثير_ تتعــذب وهي تشوف أحـلامـهـا تتراخى ومشاعرها تتجمد و الـجـفـا مستمر من اللي أعطته أغـلـى مـاتـمــلك (قـلـبـهـا الـنـابـض بكل أحـسـاس جميل تـجاهـه) ودايم تسأل نفسها 'لـيـه هو عاجز لا يدخل الفرحه لقلبي بــ"حـبــه وعـطـفـه وحـنـانــه" لـيــه..؟ الكل يتعاطف مع ميار لأن لمعة الحزن تبان بعيونها يمكن بسبب الظروف والمشاكل اللي مرت فيها.. ويمكن لسبب ثاني يجهلونه بس اللي يعرفه هو عــذاري بنت خالها طلال ومستودع أسرارها من بعد صديقاتها.. وعذاري اللي تكبر ميار بسنتين هي الوحيده اللي تعرف عن حــب ميار لـيزيـد (أصعب أنواع الحب من طرف واحد) وتحاول بكل الطرق إنها تقود هذا الحب للنجاح بأساليبها العجيبه لأن عذاري شخصيتها جدآ جريئه وقويه عكس ميار اللي هي ضعيفه وخجوله مررررره.. *[ قـالــوا نـسـاك وراااااااح قـلـت لـهـم يـعــود,, وبقـلـبـي يـالـمـحـبـوب بـس أنـت مـوجـود.. أرجـــع يــاضـي العين لاتـنـسـى الـوعــود,, لـيـلـه أريـد ويـاك نـقـعـد سـويــه واللـه صـعــب فـــرقـــاك لاتـصـدق يـهـون.. ولـشـوفـتـك واللـه حـضـرت الـعـيــون .....]* "كانت ميار تدندن بالأغنيه وقطع عليها صوت أمها تناديها,, وبعد الأحضان والصياح جلسوا بالصاله تقهوي أمها".. ميار: أنبسطتي يمه بالشرقيه؟ أم ميار: إيه والله تمنيتك معاي بنات خالتك مرام ولولو وبنت خالك عذاري يسألون عنك وتمنوك معهم.. سهرات للفجر وطلعات للكورنيش وللبر تدرين فيهن كلهن جامعيات ووقتهن أغلبه فاضي.. ميار: متى يرجع خالي طلال وبنته عذاري من الشرقيه؟ أم ميار: مطولين لآخر الأسبوع.. ميار: طيب وووو يـزيـد ويـنـه مو على أساس بيجلس عندنا هاليومين؟ أم ميار: مارضى عجزت وأنا أحاول فيه وحلف إلا يسكن بالفندق لين يسافر.. بس وعدني إنـه يزورنا بكره إنشاء الله.. "ميار أنقهرت": اممممم ok.. قومي يمه أرتاحي بغرفتك ونامي شكلك تعبانه بالمره.. *,,*,,*,,*,,*,,*,,*,,*,,*,,*,,*,,* يوم الأحـــــــــــــد... (11/7) فــي المدرســه.. حكت ميريـام للشله عن اللي صارلها مع عمها أمس_واللي معصبها زياده إنه ماجاء أعتذر منها.. راويه: ياخساره والله أنه مايستاهل عزيمتك أمس.. اليوم بتعزمينا بالطلعه وإلا خلاص بياخذك السايق مثل كل يوم..؟ ميريام: تتريقين!! لأ أكيد السايق.. تووووبه ماعاد أطلع معه .. قهرني عمي والله إني مانمت عدل بسبة تفكيري بهالموقف_لمحت له أمس إنه ضايقني بكلامه وضربتها زعله وماطلعت من غرفتي ولاأكلت شي آبدآ.. فوق هذا كله مافقدني ولا سأل عني وأنا اللي عادني (دلوعة البيت) شلون يزعلني ويضايقني..؟ سحايب: ميريام ترى مافيه شي يسوى تزعجين نفسك ولا تبالغين وتكبرين الموضوع يمكن كان راجع من الدوام تعبان ومرهق ومو مركز وأكيد مو ناقص لأزعاجك وهواشك أنتي ودحمون كافي عليه الطلاب بالمدرسه ولاتنسين أنه مدرس ويواجه ضغوط كثير بشغله.. سميه: عدل كلامك سحايب بعدين أنتي بكذا صغرتي نفسك قدامه بدون فايده_وبينتي له نقطة ضعفك وهي حساسيتك من أي كلمه تنقال لك ولو كان الواحد مايقصدها.. ميريام: طيب وش أسوي أنا طبعي كذا حـسـاســه أتأثر بأي شي تافه وأخلق من الصغيره كبيره! سميه: ماأدري ليه أحس دايم أحنا يالبنات نفكر بأنفسنا وبأحتياجاتنا وننتظر من الكل أنهم يهتمون فينا ويراعون مشاعرنا في المقابل تغلب على شخصياتنا الأنانيه مانهتم ولا نراعي مشاعر غيرنا سواء أهلنا أو قرايبنا ولا نتلمس لهم الأعذار لو بدر منهم أي تصرف يضايقنا وإللي أغلبه يكون بدووووون قصد.. معيضه: ياســـلااااام والله وصرتوا تحكون بالأخلاق ياشلة (خلك إيزي ياعزيزي).. لأ أنتوا بكذا خربتوا شعار الشله من الضحك والفرفشه الى الحزن والفلسفه.. راويه: والله صدق كلامك يا سميه.. بنات بأعمارنا المفروض يكونوا واعيات وفاهمات للي يدور حولنا إلى متى وحنا ثقافتنا 'رياضيه وفنيه وشعريه' بس والوحده فينا إذا صارت لها مشكله تافهه تحس الدنيا ضاقت فيها ولا تعرف تتصرف بشكل صحيح مافيه وعي ولا إدراك وللأسف صاروا الناس يتعاملون مع بعض بحساسيه.. ميريام: بنات أنتم كذا تخلوني أحس بتأنيب الضمير تجاه عمي.. سـؤال; مين اللي يعتذر للثاني أنا وإلا هو..؟ سحايب: هذي اللي ماتفهم عاد أحنا صار لنا ساعه وش نقولك.. أنتي وهي أنسوا الموضوعok |
|  |
|
21-08-08, 10:03 AM
| #7 |
| |[ عـضـو مــاسـي ]| الدولة: | رد: قصة: ×أطلالـي ملت وقوفـي× مواقف وأكشنات بعالم المراهقات ...أقرأوهااااااا كانوا درر ومـيـار في عالم ثاااااااااني.. كل وحده تناقش الثانيه بقصة حبها واللي كلها من طرف واحد.. حست ميار أنها وبرغم وجود يزيد قريب منها إلا أن قلبه بعيد عنها مسكت(بـدفـتـر الـصـراحـه) وكان هذا شعورها... *[دخيل الخطوه اللي تاخـذك يمي ولاتجيبـك.. تعــــال أكسر حواجز {الإنتـظـار} اللي على بابـك وإذا ترتاح.. أنا عــادي.. بجي لعيوووون ترحيبك أبي تضمن لي بـس ..! ان مـا تـرد تقول: وش جــابـك..؟ أنا تحرجني أشواقي،، وتجرحني أساليبك قبل ماأتصرف بشي! أنتظر وأحسبها بحسابك.. آخاف اللي أظنه صح ،، يغلطني وعلمي بك بدون أي شي.. يـاويـلـي إذا بغلط على أحبابك.. مع انه من خطاهـــم ماأحد غيري يراضي بك ومع أنك لو رضيت،، أظل أنا وحده من (أصـحـابـك).. وذي ما أشكلت عندي،، أنـا مشكلتي"تـعـذيـبــــك".. لـ قــلـبـي اللي يبي كلـمــه،، على تسبيله بأهدابـك.. من اللي فهمك أن الكفايه بـالـغـلا طـيـبـك..؟ من اللي لخبط الدنيــا ولعب في سالف عتابك.. دخيلك حــس ..! وش معنى ((تـحـبـك بــنـت)) وتحيي بك مشاعر وسط زحمة هالحيـــاة،، وهي تحيابك.. كذا تبغى تكون أحلى معك تمشي وتماري بك..؟ تعوضها بوجــودك لـو مجازآ حالة غيابـــك..؟ تخيل جيتها منهد حيلك لـو تهلي بك.. تخيل (راحتك) في لحظتين بكلمة: [هــلا بــك].. كلامـــك // آخ ياويلــي.. سكوتـــك // ليل يضوي بك يدينـــك // ريحة العود.. أحتوائي ملمس ثيابك حكي بدري عليك،، أدري وأنا والله توي بـك عـمـر..يـادوب مره قلت لـي: {شـكـرآ على إعجابـك}.. أمـــوت.. أمـــوت.. بــس أعرف وش اللي ينفع يجيبــك؟ بلاش امـــووووت.. أبـعـرف.. لـو بـجـي.. بتقول: وش جــابـك....؟! ]* ...(أحـبــك يـا لـزيـز) سحايب: بناااات بتداومون بكره؟ معيضه: أنا ماراح أداوم لأن وقتي قليل مايمدي أذاكر المناهج وأختمها.. سحايب: أحلى ياالــدافــوره الأسبوع الجاي كله سبع أيام و مايكفيك تذاكرين فيه؟ معيضه: أحسبي كل ماده لازم أجلس أذاكرها يومين والمواد كثيره مره.. إذا الرياضيات بس يبغاله أربع أيام ويمكن أكثر كيف بباقي المواد؟ راويه: معك حق أسبوع مايكفي عشان كذا من بكره لازم نغيب ونبدأ مذاكره.. سميه: وبعدين كل المدرسات أختموا المناهج ليه نتعب أنفسنا ونجي عالفاضي.. ميريام: لسه باقي مراجعة المواد قبل الأمتحانات.. سميه: أي مراجعه الله يهديك.. تدخل الأستاذه علينا تقول: بنات عندكم أي سؤال أي أستفسار بخصوص الماده.. ماتصدق خبر نقولها; لأ.. تسكر الباب وتجلس برا الفصل سواليف مع الأستاذات.. وإلا تغيب وماتداوم للمدرسه آبــدآ من تبدأ أيام المراجعه.. معيضه: وإنتي الصادقه عشان كذا أنا ماراح أداوم.. ميريام: يعني خلااااااااااص نختمها بيومنا هذا.. سحايب: أيه فـكــه.. وناســـه راح نشبع نـــوم من الــيـوم.. "فزت ميريام من مكانها بسرعه وأخطفت (دفـتـر الصراحـه) من درر ومـيـار": وش عندكم إنتوا الثنتين؟ درر: هيييه يـاأم كـشــه وش هالتصرف البايخ هذا..؟؟ ميار: هههههههههههههههههه "ميريام وهي تقرأ المكتوب بالدفتر": طـيــري...!!! "ألتفتت على ميار" إنتي ماتتوبين من لـزيــز؟ خلصتوا الورق إنتي ودرر تكتبون أشعار بناس مادروا عنكم.. درر: حتى لــو مادروا عنا.. بالعكس نحـس الدنيا حـلــوه بوجودهـم ولذيذه بصدودهــم.. ميريام: أنتي وحده مجنووونه وتفكيرك غريب.. ميار قومي عن درر لا تخرب أخلاقك.. ولا عاد أشوفك تمشين معها مفهوم..! درر: تكفيييييين ياأم الأخلاق! ميار: ههههههههههههههههه "معيضه وهي تضحك": ترى ميريام معصبه على عمها وحاطه حرتها فيكم.. درر: أيوه يعني السالفه كذا!! "قامت درر وأخذت شنطة ميريام وحطتها على كتفها": طــيـري لبيت أهلك وهاتي الدفتر يالله.. "ميريام وهي تقرأ بصوت عالي تبي تستفز درر": *( حـشــى مـاقـلـت حـظـي صـار مـيــت... هـو أنـا لـي حــظ حـتـى إنــه يـمـــوت...؟)* هههههههههههههههههه طـاح حظك زيـن..! "سحايب وهي تضحك": درر.. قولي هو أنا لي حـظ حتى إنه يطيح هههههههههههههههههههههههه __________________________ فتحت بوابة المدرسه وودعت ميريام الشله وشكرتهم على نصائحم لها.. توقعت أن السايق هو اللي راح ياخذها من المدرسه عشان كذا تأخرت كثير لكن تفاجأت لما شافت سيارة (عمها يوسف) كان مرتخي بجلسته ومرجع راسه ورا عالسيت وهو مغمض عيونه وباين عليه تعبان وطـفـشان من كثر الأنتظار.. ماحس يوسف إلا وباب السياره يتسكر.. أبتسم وألتفت جنبه: السلام لله مو لنا.. ميريام: ........ يوسف: وش رايك بالمفاجأه حلوه صح..؟! "سكتت ميريام وماردت عليه.. شغل يوسف المسجل وكان مجهز لها أغنية (أحـلــى وأحـلـى) لراشد الفارس... ويناظرها بطرف عين يبغى يعرف ردة فعلها ".. ~[ يـعـنـي زعــلان أنـت مني مـاتـبـي حتى تكلمنـي.. ومخاصم قلبي ياقلبي.. ياحـلـو اللي مخاصمني.. بعيـــوني تصير أحلى وأحلى لما تـصــد عنـي وتتغلــى وتسوي نفسك مـاهـمـك وأنـت مـيـت فيني تـحـبـني.. أتغلـى وعذب أشواقي ياكل أحبابي وعشاقي تحلى الدنيا بعيني لما بنظره تخاصمني.. هالزعـلــه الـحـلـوه كملها لاترضـى بـســرعـه وطـووووولهـا.. خلينا أترجـى خليني.. لـوعـنـي آكـثــر عـــانـــدنـــي ]~ ميريام ماتحملت رومانسية عمها اللي على قد شخصيته الصعبـــه!! وبسرعه نسيت الزعل لأنها تذكرت كلام الشله .. (يوسف عمره 25 سنه مدرس لغه أنجليزيه للمرحله المتوسطه ساكن مع أخوه أبو عبدالرحمن وعائلته من سنتين بسبب ظروف تعيينه وتغرب عن أهله وأحبابه بحائل ولقى صعوبه بالتأقلم في الرياض,, علاقته بميريام ولا أروع هي أقرب أنسانه من عيال أخوانه وخواته لقلبه وتفهمه من نظره وأكثر وحده تعرف شلون ترسم الإبتسامه على وجهه بخفة دمها ولقافتها ومقالبها).. ¿¿¿¿¿¿&i quest;¿¿¿¿¿&iqu est;¿¿¿¿¿&iques t;¿¿¿¿¿¿ ; |
|
| |
|
21-08-08, 10:22 AM
| #8 |
| |[ عـضـو مــاسـي ]| الدولة: | رد: قصة: ×أطلالـي ملت وقوفـي× مواقف وأكشنات بعالم المراهقات ...أقرأوهااااااا نزلت ميار من باصها الحكومي وحست بنشوه غريبه لما شافت سيارة يزيد الـ لـكـزس قدام باب بيتهم أتجهت للباب الصغير اللي بالزاويه ودخلت بخطوات مسرعه وهي ودها تطييييير للشقه عشان تشوفه أو بس تلمحه لمحه.. >>> فـــجـــــــــأه.....!!!!!! طررررررررررااااااااااااااااااخ ... -:"بـســم اللـــه عـلـيـك"..؟ ميار: آآآآآي رجلــــي آآآآآآآآه.. >>الصـوت مـو صـوت أخوها صـلاح >> ولا اليد اللي مسكت ذراعها ورفعتها من الأرض هي يـده..؟؟؟؟ "جت أمها مخترعه على صرختها": مـيـار حبيبتي وش فيك وش صارلها يـــا يــزيـد؟ " مستحيـــل..مستحيـــل يكون اللي ماسك أيدي هو يـزيـد.. ياربي ليــه أنا حظي منحرف مـايـتـسـنـع..؟ يوم حسيت أنه قريب مني وخططت أستغل الفرص عشان أبين لـه مشاعري ,,أتعثر وأطيح قدامه بشكل مخجل والسبب عباتي اللي تعلقت برجلي بطريقه غريبه.. مارحمني إلا الغشوه اللي غطت ملامح الأنكسار بوجهي آآآآآآآي".. كملت ميار طريقها للشقه وهي تتألم وتسحب شنطتها عالأرض ..ومن الأحراج مارفعت راسها وناظرت في يزيد مع إنها مشتاقه تشوفه لأن صارلها شهور ماشافته .. أم ميار: شكلك يا يزيد ضيعت بين شقتي وشقة صلاح.. يزيد: أيه والله ياخاله أنا صار لي ساعه واقف ومحتار تدرين إني أول مره أجي لبيتك هذا من سكنتوا فيه مازرتكم.. بس أذكر بيتكم الأولي اللي قبل سنتين .. أم ميار: كل شي تغير ياولدي حياك تفضل.. دخلت ميار غرفتها وما حست إلا بالدموع تملأ عيونها.. رمت حالها على السرير وهي تصيح.. "دخلت أم ميار ووقفت عند ميار": يابنتي وش فيك وش صار لك..؟ ليه طحتي عالدرج؟ "ميار وصوتها كله صياح": يمه أحس بصداااااع وجسمي متكسر وأبي أرتاح.. أم ميار: يزيد يسأل عنك ويحلفني إذا إنتي تعبانه بيوديك للمستشفى..!!! "سكتت ميار وهي تغطي رأسها بالبطانيه أشاره للرفض.. وبخاطرهــــــا": غريبـــه..! توقعت لو آمــوت قدامه ما أهتم ولا سأل.. ولو سأل شفقه وتعاطف لاأكثر ولا أقل.. آ آآآهـ تـعـبـت تـعـبـت من صــده.. اللي مايدري درى إني أحـبـه وأبـيـه .. عيوني تفضحني لما أشوفـه مـاأقدر أمنع شوقي لـه.. ولساني يخوني لما أفقده مـاأتردد أسأل عنه وأتطمن عليه.. لــيـه يتجاهل مشاعري ويستهين فيها؟ لــيـه يرخص دموعي وأنا مابكيت بحياتي إلا لـه؟ آآآآآهـ مـلـيـت مـلـيــت.. متى يحس فيني؟ متى يحن ويشتاق لي؟ متى يحبني ويهتم بمشاعري؟ متى.....؟ "مسحت ميار دموعي وغمضت جفونها وبسرعه غفت وراحت بسابع نومه بعد ماهلكها التفكير بحالها مع يزيد.".. ********************* كانت جالسه درر تكلم بنت عمها لطيفه وسوالف عن الدراسه وعن عــلـي<<<< .. لطيفه: إلا شخبار علـي عقب الموقف اللي صار بالعرس تهقين يفكر فيك ويسأل جدته عنك يقول من هي المزيونه اللي كانت قاعده بجنبك؟ هههههههههههههههههههههه تلاقينه يسوق السياره ويدور بشوارع الرياض كلها وهو (يشرب دخان) ويفكر فيك... درر: لأااااا طفطف كذا آذوووب أنا من الخجل.. لطيفه: أقووووول صدقتي عمرك أنتي_ أصلآ مـا درى عنك بس نصيحتي لا تتعلقين فيه بزياده ترى بكره بتحضرين عرسه مثل صـقـر اللي ما أمداك قلتي أحبه إلا والأخ مملك على بنت عمته.. درر: وجـــع طفطف تتريقين؟ "ضحكت لطيفه": هههههههههههههههههه الظاهر أنك بتدخلين موسوعه [غـينـيـس) بطيحة الحظ (كل ماتحبيـن واحـد يـتـزوج ويخليك).. هههههههههههههههه درر: طفطف لا تحطميني ترى بجد قلبي بيتقطع عليه.. لطيفه: هذاك اليوم بنات خالي خوات العروس يمدحونه يقولون أحـلـى واحد دخل بالزفة مع المعرس هو عـلــي !! وتعالي أسمعي تعليقاتهن عليه حمدت ربي إنك مانتي قاعده بينهن كان إنتحرتي... ووحده فيهن تقول أبي اخلي أختي تضبطه لي بس ترجع من شهر العسل,, لأنه يصير ولد عم زوج أختها وسهل أصطياده!!! "عصبت درر": صادوها شياطينها هالجريئه اللي مضيعه الحيا.. وين عايشين أحنا بغابه عشان تصيده.. ماااااالت على حظي? طيب أنا وش ذنبي إني أحب بشرف وأخلاق لايدري عني ولا شي ومدري وش عليه ذابحه عمري عليه بكره بسهوله يروح لغيري.. "و خنقتها العبره"بس وش أسوي أحـبــه...! لطيفه: هيه ياالخبله من جدك بتصيحين.. بنات خالي من يومهن وهن جريئات مره .. وأنا ياعمري ماقصرت بـ علي لعنت خامسه سبيت فيه وشوهت سمعته عشان بنت خالي تصرف نظرها عنه بس ماطلعت بنتيجه البنت وجهها متين وقويه مصره تآخذه.. درر: ليـــه تغلطين على علـي ترى ما أرضى عليه.. "وهي تهمس" نسيت أقولك الحين أخوي سلطان عنده عزيمه لضيف جاء من الكويت وعزم أصدقاءه كلهم تهقين علـي حاضر؟؟؟ لطيفه: وش الجديد بحضوره هو دايم مطيح عندكم 24 ساعه مع سلطان.. درر: قولي ماشاءالله لاتصكينه عين بعدين مايصير يزورنا.. لطيفه: ياشينها من زيارات بس معذب قلبك عالفاضي.. درر: طفطف_أسمع أمي تناديني أكيد تبغاني أنظف الحوسه اللي بمجلس الرجال أكلمك بوقت ثاني.. لطيفه: والشغاله وينها؟ درر: نايمه من الساعه 10ونص هذا وقتها ومستحيل تغيره.. لطيفه: أسألي أخوك الصغير راكان عن علي حضر..! درر: ok بـــاي.. ______________________ |
|
| |
|
21-08-08, 10:25 AM
| #9 |
| |[ عـضـو مــاسـي ]| الدولة: | رد: قصة: ×أطلالـي ملت وقوفـي× مواقف وأكشنات بعالم المراهقات ...أقرأوهااااااا دخلت درر مجلس الرجال ورائحة الدخان طاغيه على المكان وعلب الزقاير متناثره وكاسات الشاي وفناجين القهوه موزعه على أطراف المجلس وصوت معلق المباراه بالتلفزيون عالي... تضايقت درر من ريحة الدخان اللي ماتطيقها آبدآ وشالت صينية الشاي والقهوه وأخذتها للمطبخ ورجعت بالبخور عشان تبعد ريحة الدخان.. وبعد ماأنتهت من تنظيف المجلس تفاجأت بـ(كـبــك) موجود على طرف السجاده توقعت أن حق أخوها سلطان وأخذته عشان مايضيع وتعطيه أخوها بس يرجع بالليل.. ==-==-==-==-==-==-==-==-==-== يـــوم الأثنيــــــــــن... (11/8) "في بيت كانت لـجـيـن واقفه قدام الخزانه ومحتاره وش تلبس .. ألتفتت على راويه": ترى بعد ساعه بنروح بيت خالي عبدالعزيز نسلم عليه قومي تجهزي.. راويه : آســـفـــه أعذروني ماأقدر أروح الأمتحانات على الأبواب وأبغى أذاكـر.. لجين: حلوه ذي ماتروحين وإذا سأل عنك خالي وش نقوله تبي تذاكر والأمتحانات بعد أسبوع؟ والأسبوع الجاي عندك أجازه كلها تذاكرين فيه.. راويه: غصب هو.. مالي خلق لأزعاج بزرانهم ولا لثقالة دم غـالـيـه وسلـمـى ونرجسية خطيره! أأأأأأقصد نظيره .. لجين: راويه عــيـب عليك لاتسمعك أمي ترى بتزعل.. راويه: وأنا وش اللي مخليني أتحملهم غير أمي.. لجين: هذا وأنتي تزورينهم من شهر لشهر بس شلون لو كل أسبوع؟ راويه: آآآه كان مـا تلاقيني واقفه قدامك_مـا أطيق أخلاقهم.. لجين: أنتي يضيق خلقك إذا قابلوك "بأخلاق شينه" ترى أحيانآ مو كره لشوفتنا أو أنزعاج من زيارتنا بس تكون أسبابهم شخصيه.,.البــشـر يعصبون ويتضايقون ويواجهون مشاكل أو مصايب مالها حل ويبين هالشي من تصرفاتهم.. "عصبت راويه": إيــه لجين رقعي رقعي بشخصياتهم هذا أنتي قلبك طيب وحنونه وماتحقدين ولا تشيلين بقلبك على أحد.. يعني أبي أفهم هالأخلاق الشينه بس علينا إحنا ؟! بصراحه أنا"كرامتي محفوظه" وعند خوالي بالذات وما أتحملهم... غاليه من تشوفك أستلمتك "زوجي قال وزوجي راح..." تزوجت وهي صغيره وتشوف اللي أكبر منها عوانس وأولهم إنتي مع أنها أصغر منك بـ3 سنوات..وتكسر بمجاديفك على "قابليني إذا توظفتي ,,,وصدقيني ماحد يقبل يتزوج موظفه بمستشفى تختلط برجــال" .. وسلمى جريئه بوقاحـه بس تنتقد وتعيب على تصرفات غيرها وكلامها وألفاظها بعيده عن الذوق وتستهتر بمشاعر الناس وأحاسيسهم وتقط تعليقات على بالها خفة دم وهي مثل القنبله المتفجره!!! ماتقدر حساسية بعض الناس بتجارب مروا فيها ويحاولوا يتناسوها.. تذكرين بنت جيرانا بدرية عمرها تعدى الـ33 سنه من تشوفها سلمى تصير تتكلم عن أختها غاليه وزوجها وعلاقة الحب اللي جمعتهم وبدريه عانس حزينه فاتها قطار الزواج.. وإلا بنت عمتها نـجـود اللي صارلها 9سنين متزوجه وماعندها عيال وقلبها بيتقطع على حب الأطفال والأمومه وسلمى من تشوفها ماتسولف إلا عن الأطفال>> وهي ماتطيق أصواتهم ولقافتهم.. خصوصآ عيال غاليه تطيح فيهم طق لحد مايطفشون.. هذا من غير (مهايط) أبله نظيره اللي مو ناقصها إلا "تمسك دفتر حسابات وتكتب فيه المعروف اللي تفضلته على الناس وأن حاولت مجرد محاوله تخفي وتستر معروفها يبان بـسوالفها وهرجها".. تذكرين لما تسلفتي منها 700ريال عشان نشتري فيها فساتين لعرس ولد عمي..؟ لعنت خامسنا بالسوالف على"طلبتني وعطيتها وكسرت خاطري ورحمتها" مابقى أحد مادرى أنك متدينه منها! وأنتي اللي قويه ماتنزل لك دمعه بكيتي وقتها من القهر_ ماكان له داعي موقفها .. وتذكرين بعد لما........." "تقاطعها لجين": يا راويـه الله أمرنا بالتسامح ولا تظنين أنه تارك الناس اللي يأذونا إن ماتابوا وأستغفروا_ الله ينتقم لنا من غير لا ندري ولا نحتسب ودايم تكون العقوبه في شكل معاناة نفسيه تصيب هالظالم بدون لايبين شي قدام الناس وأحيانآ يكون العقاب من جنس العمل.. إذا على غاليه أمس خالي يشتكي لأمي يقول مهي متفاهمه مع زوجها وكل كلمه والثانيه تبي الطلاق وأغلب مشاكلها على موضوع دراستها تبي تكمل وهو رافض..! وإذا على سلمى صار لها سنتين بأولى ثانوي فاشله بدراستها وسمعتها شينه وعلى كل لسان من بعد مشكلتها وهوشتها مع عمتي على سالفة فستانها بعرس اخوها_ اللي شرت عمتي مثله بالصدفه عصبت سلمى وطردتها من القاعه.. وعمتي مسكينه ما كانت قاصده اللي صار وهذي هي نفسيتها متأزمه من ذاك اليوم مع أنه صار من8 شهور بس للحين مو راضيه تنسى الموقف وهالشي مأثر على دراستها وهي بتتخرج معك من الثانويه وشكلها ماراح تجمع نسبه عاليه.. وإذا على خالتي نظيره لاتعلييييييق...! يكفي علاقتها المتأزمه مع زوجها وأهله على مسألة راتب الـ9000 ريال اللي مايتركون لها مصروف إلا 1000ريال بس والباقي ياخذونه منها ودايم تشتكي لخالي وتطلبه يدور لها حل .. وهذا كله بجهه وشك وغيرة زوجها بجهه ثانيه معيشها بجحيم وإنتي تعرفين إذا الشك دخل حياة أي زوجين تخرج منها الراحه والسعاده.. أستغفر الله.. أنا ما أتكلم عنهم من باب الشماته.. لأ حرام.. لكن كل أنسان ياخذ جزاه بالدنيا اللي يأذي الناس اللي يسلط عليه من يأذيه.. ياراويه خليها على الله يامالك بتشوفين بهالدنيا من مصايب ومشاكل ..لأن الحزازات والحساسية بين الناس باقيه طول العمر.. والناس فيهم الحقود واللئيم والمتكبر والقاسي مثل هذولا شلون بيتسامحون ويغفرون لغيرهم زلاتهم..؟ الله سبحانه وتعالى يسامح ويغفر ويقبل التوبه,, والناس يتجاهلون الشي هذا مايجهلونه.. راويه: آآآه يالجين كلامك يجنن كله حكم والله إني فخوره فيك,, مو متصوره حياتي لو تزوجتي وتركتيني..! "ضحكت لجين": عن الدلع ويالله قومي بدلي ملابسك لا نتأخر على أمي ترى بتمشي وتتركنا... ¥¥¥¥¥¥¥¥¥¥¥¥¥¥¥¥¥¥¥¥¥¥¥ |
|
| |
|
21-08-08, 10:28 AM
| #10 |
| |[ عـضـو مــاسـي ]| الدولة: | رد: قصة: ×أطلالـي ملت وقوفـي× مواقف وأكشنات بعالم المراهقات ...أقرأوهااااااا وفي بيت درر .,. دخل سلطان الصاله وكانت جالسه زوجته سناء تبرد أظافرها.. ناظر فيها وأتجه للتليفون الثابت اللي أزعج البيت برنينه.. سلطان: هـــلا؟ : السلام عليكم.. سلطان: أهلين وعليكم السلام.. : ممكن أكلم درر؟ سلطان: درر.. طيب أبشري بس أنتظري دقيقه أناديها لك.. "سناء وهي تناظر سلطان بنظرات حاده": مين اللي تبغى درر؟ "سلطان بصوت هادي ومسموع": صديقتها.. روحي ناديها لا تطول البنت وهي تنتظر.. "سناء بصراخ": خــــــيــــــر إنت وياهــا؟؟ تهلي فيها وترحب وأبشري؟ والله على بالي إنك تكلم عمتك مو وحده من صديقات أختك.. "سلطان ببرود": قصري حسك ولا تصرخين.. كان رديتي على التليفون وهو يرن قدامك بدل ماتزعلين؟ وبعدين وش تبغيني أقولها.. أنثـبـري أنتظري أختي لما أناديها؟ "سناء وبصرخه أقوى": طيب ليش قلت هـلا وماقلت ألـو؟ بتطيـح البنت بأسلوبك الحلو.. سلطان: سناء عـيــب هالكلام أحترمي زوجك ok .. ولا تخلين هالعقال يرقص على جسمك لأن صار لك كم يوم ماأنطقيتي..!! "حطت سناء أيدينها على خصرها وهي تنافخ بعصبيه": إذا فيك خير ورني شطارتك أشوف وهنا بالصاله.. سلطان: أستغفر الله العظيم.. سناء: سبحان الله مو توك هلا وأبشري والحين تستغفر ليه شايفني (مجنونه) قدامك.. "فتح سلطان فمه بيرد على سناء ودخلت درر الصاله وهي ماسكه كتاب الكيمياء": وش فيكم أصواتكم واصله لآخر البيت..؟ "سناء وهي تأشر لدرر": تعالـي درر كلمي صديقتك تنتظرك عالتليفون.. وأسأليها وش رايها بصوت وبأسلوب سلطان عجبها وإلا..... "ماكملت كلامها إلا وسكتها كـــف سلطان...!!!! " صرخت درر وحاولت تهدي أخوها بس هو بعدها عنهم وسحب زوجته من شعرها للدور الثاني لشقتهم.. زعلت درر وتضايقت مع إن هالمشاكل روتين يومي بين سلطان وزوجته بس حمدت ربها إن بنتهم رهـــف اللي عمرها سـنــتيــن نايمه بغرفتها وماكدر نومها مشكلة أمها وأبوها".. أنتبهت درر لسماعة التليفون المرفوعه..رفعتها بتكلم لكن المتصله قفلت.. ناظرت بكاشف الرقم (رقم مـيـار).. رجعت أتصلت عليها وأنتظرت ماأحد رد_ أتصلت مره ثانيه وردت ميار . . درر: ياخايسه ليه ماتردين؟ ميار: خفت تكون زوجة أخوك هي اللي متصله علي بتخانقني؟ درر: لا عاد مو لهالدرجه هذي والله ماتلوم إلا نفسها لو سوت كذا وبدون سبب بعد.. ميار: أجل اللي تغلط على زوجها وتحاكيه بالطريقه هذي تستبعدين منها شي؟ درر: يؤيؤ.. أكيد سمعتي كل شي؟ ميار: لحد صوت الطراق هنا قفلت لا يرجعون لي ويحطون حرتهم فيني وأنا مو ناقصه مشاكل .. درر: الله يهديهم.. ميار: المهم خلينا منهم بقولك عن موقفي المصيبه والسخيف مع لـزيـز آآآآه يادرر بموت من القهر.. درر: أوف ليه مصيبه إنتي شفتيه_ صار بينكم شي؟ ميار: أنا وقفت قدامه بس ماشفته ولا ناظرت فيه؟ درر: مافهمت أحكي لي وش صار بالتفصيل .. " حكت ميار الموقف لدرر وخنقتها العبره وشوي وتصيح".. درر: هدي أعصباك وتعوذي من الشيطان.. ترى لو فكرتي بالموقف زياده بتحطم نفسيتك وبتعذبين قلبك.. أعتبري ولا شي صار وأستغلي فرص ثانيه تبيني له مشاعرك.. ميار: لأ خلاص طابت نفسي أتمنى إنه يرجع للشرقيه اليوم قبل بكره.. درر: أفــا ليه التشاؤوم ليه؟ أنتظري فرص..... ..... "يقاطعها صوت أمها وهي تتناقش مع سلطان بصوت عالي"... "درر بهمس": باي باي ميار أكلمك بوقت ثاني.. "بسرعه راحت لأمها وسلطان اللي واقفين قدام باب الدرج .. صرخ سلطان بوجه درر": روحي جيبي رهف عشان تآخذها أمها معها.. درر: وين بتروح سناء؟ سلطان: بتنقلع لأهلها.. "نفذت درر أوامر أخوها ودموعها تحجرت بعيونها لأنها تحب رهـف ومتعلقه فيها وزعلت لأنها مابتشوفها بعد اليوم"... * * * * * * * * * * * * * * * * |
|
| |
|
| الإشارات المرجعية |
| أدوات الموضوع | |
مواضيع مشابهة | ||||
| الموضوع | الكاتب | المنتدى | الردود | آخر مشاركة |
| مواقف محرجة، مواقف غريبة، مواقف مضحكة - صور | فرزداتشي | صور - كاريكاتير | 25 | 03-08-09 03:00 PM |
| أرجوكم أقرأوها | mohammed-n-o | اسلاميات عامة | 8 | 25-06-08 01:56 PM |
| هل تعامل اهل بيتك كما تعامل غيرهم | زهرة الشمس | نقاشات و حوارات | 8 | 17-05-07 05:50 AM |
