المنتديات
المنتديات
| روابط إعلانية |
| ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 |
| | أدوات الموضوع |
10-05-08, 02:11 PM
| #26 |
| |[ عـضـو مـشـارك ]| الدولة:  |  رد : روايتي رواية ملاك الروح..غرقانه في بحر الذكريات..رواية من تأليفي.. قرب من باب غرفة منال ع اساس انه بيدخل عند منال لان ملاك طلعت وهو متعود يقعد مع منال ويسولف معاها.....مد يده بيفتح الباب ..هجد صوت الاستشوار وسمع صوت الي تغني كان صوت ملائكي وعذب ..وماكان صوت المسجل..بعد يده.. داخل الغرفه..ملاك وقفت من الغناء: هييييييه منال طيب عطيني انذار ..والله صوتي كان عالي وانا مدري.. منال: هههههههههه لو تشوفين شكلك وانتي تغنين ...يعني لازم اسمع صوتك.. (عرف خالد ان ملاك كانت هي الي تغني من كلام منال باين) ملاك:انتي الي قايله لي غني مو صح.. منال: ايه بس غيرت كلامي في اللحظه الاخيره وانتي عاندتي.. قربت ملاك من منال وبدت تمسك شعرها خصله خصله بشكل ناعم.. ملاك: طيب اهم شي ان صوتي اعجبك.. منال وهي تطالعها من المرايه: مين لعب عليك وقال صوتك حلو اصلا عشان يعجبني.. ملاك عصبت وحاسة شعر منال ومعطت لها كم خصله.. منال: ياتبن.. ملاك انحاشت منها وجلست تدور بالغرفه ومنال تلحقها....خالد حس انهم فلله وأعجبه صوت ملاك بس حس انه يتلقف في خصوصيات اخته وصاحبتها فقال خلني ابعد عن الشر واغني له..وراح لغرفته...وكانت منال لسا تلحق ملاك تبي ترد لها الدين.. ملاك وتعبت من التسحيبات: منالوه ترا غرفتك صغيره ..مافيه مكان انحاش منك فيه.. منال: احسن شي.. ملاك: خلاص ..انتي الي بديتي.. منال: اصلا مليت منك ..مافيه امل امسكك.. ملاك:شيء طيب انك عارفه... منال: الا تدرين مره شفت فيلم امريكي اكشن الحرمه كانت تنحاش من واحد ماادري وش سالفته ..وهو يلحقها وهو جنبها ..بقره لو انها متعوده تلعب حبشه.. ولاكان ظغطت فرامل والاخ طبعاً يكون مسيد على قدام ..الا وهو مظيعها..وفي امه خير يمسكها.. ملاك وهي تظحك على منال: بقره..امريكيه..هههههههه.ماعندهم لا حبشه ولا واحد طش.. منال: اسماء الالعاب غبيه ..واحد طش..بس تحسسك بالوناسه وايام الطفوله.. ملاك: ههههههه ياحليلك.. منال: شوفي القهر ماطلعت الوناسه الا يوم جيتي بتروحين... ملاك: ههههههه ولا يهمك شكلي بسوي الخطه بس موو اكيد بكلم امي في الليل واشوف رايها..اوكيه.. منال :وناااااسه ..اوكيه .. ملاك: ودي اعزمك على الغدى اليوم .. منال: زين سويتي.. ملاك : طيب السواق رجع.. منال: والله مدري ..اصبري اشوف بسأل خالد.. ملاك :طيب .. منال طلعت من غرفتها ودخلت على خالد الي كان يغني نفس الاغنيه الي كانت ملاك تغنيها بس ماكان يغني كان يدندن..بس.. منال فتحت الباب وتسندت عليه وهي تطالع الاخ الطربان.. خالد كان جالس يحوس في درجه يدور شي بس شكله مالقاه ويأس وقام ..يوم لف لقا منال رافعه حواجبها وتطالعه وهي متكتفه... خالد : بسم الله الرحمن الرحيم ..روعتيني.. منال: لا روعتك.. خالد : نعم ..وش عنك.. منال: انت الي وش عندك ..طربان ..(تسوي نفسها فاهيه)..الا من وين سمعت هالاغنيه.. خالد بيرقعها: ماادري سمعتها ..في التلفزيون ولا مدري وين ..وجت على بالي وغنيتها.. منال بخبث: اهاا علينا.. خالد : حتى الاغنيه ماسلمت منك ...وبعدين ليه وش فيها هالاغنيه عشان تسوين لي سالفه.. منال:لا بس اسأل..الا اقول السواق موجود... خالد: لا مو موجود ليه.. منال: لابس كنا بنطلع انا وملاك ..وحبينا نشييك.. خالد: وانتوا ماتعيشون بدون ماتطلعون...وبعدين ماوراكم دوام بكره ليه ماراحت ملاك لبيتهم.. منال: وش دخلك لو تبي تنام عندي حلال لها..مالك شغل وبلا لقافه... خالد: طيب ..وين بتروحون.. منال: مدري بروح اسأل ملاك.. خالد: منال وش فيك اليوم علي.. منال: لابس الحماره حاست شعري ومعطته.. خالد: ههههههه..احول .. منال: يالله بروح بقول لها ان السواق مو موجود..خلودي تقدر توصلنا طيب .. خالد عرف حركات المصالح: شوفي خلودي على حسب المشوار بيوافق.. منال : طيب بروح اسأل ملاك واشوف وش عندها.. خالد : طيب.. طلعت منال وراحت لملاك..منال: اقول ملاك السواق مو موجود بس خالد موجود ..اذا انتي موافقه نروح معه اوكي.. ملاك مستغربه: وليه مااوافق والله ..وش دخلني انا.. منال: اوكيه طيب وين بنروح.. ملاك :مدري أي مكان على ذوقك.. منال: ابي مطعم صيني.. ملاك: خلاص جبتيها... منال: بروح اقول لخالد... راحت منال لعند خالد.. منال: خالد ودنا بمطعم صيني.. خالد تذكر:يووووووووه صح ذكرتيني..عبدالله وحمد عازميني على الغدى..اصبري بدق عليهم وبـأشاورهم على المطعم الصيني يمكن يوافقون.. منال هنا مارفضت على طول الفكره دخلت في بالها (الله حمودي بيجي معانا في نفس المطعم): لحظه يعني بتقعدون معانا؟؟.. خالد: لا وش تبين انتي انتوا في مكان واحنا في مكان ثاني في نفس المطعم.. منال بيأس وخيبة امل: اهاا.. خالد : لايكون تبين نقعد معاكم.. منال لحقت على عمرها: لاااااا ..خير.. وش تبون..انا وملاك والكل يتسند.. خالد : هههههه حلوه المقوله هاذي مين مطلعها.. منال : توها جديده ..طازجه بقراطيسها..هههههه خالد: طيب الحين بدق عليهم .. رفع الجوال ودق على حمد لانه هن الي مسوي العزيمه بالاساس.. خالد:منال اطلعي بكلمه.. منال: ليه ابي اعرف السالفه.. خالد :اقول اطلعي لاا...(سكت لان حمد رد عليه)..هلا والله بحمد..كيف الحال.. منال كانت مستمعه لطرف واحد الا وهو خالد.. خالد: تمام الحمدلله... حمد: عسى مانسيت الغدى اليوم.. خالد: والله كنت بانسى بس لولا الله ثم اختي منوله الي ذكرتني بالطلعه.. حمد: ليه هي عارفه عن الطلعه.. خالد : لا بس طلبة مني اني اوصلها وذكرتني اننا بنطلع سوا.. حمد: طيب وش كان طلبها.. خالد: تبي تروح هي وصاحبتها للمطعم يتغدون.. حمد: طيب هم بيروحون أي مطعم.. خالد وهو يطالع منال الي متحمسه مع خالد لانه يكلم حمد: غريبه الاخ مهتم بروحة منال؟؟.. منال حست انها كانت ماخذه راحتها وهي مفهيه فعدلت جلستها وسوت لي ثقل.. حمد انحرج من سؤال خالد:لا بس عشان نسهل عليك الطلعه ونروح كلنا لنفس المكان ..وتعرف ذوق منال زيين في المطاعم.. خالد:هههههه عرفت تكحلها في البدايه بس خربت على نفسك بالجمله الاخيره.. حمد : ياشيخ ..طيب ريحنا وقل لنا وين وخلصنا ..واصلا انت داق تبي تقول لي نغير المكان.. خالد:ههههه كاشفني..والله الاخوات بيروحون مطعم صيني.. حمد: خلاص اوكيه..تعبت يوم قلتلي.. خالد:لا ..بس لاتستانس ترا الحريم في مكان واحنا في مكان ثاني.. منال عصبت منه ومن معلومته الخايسه مسوي لي .. حمد: لا احلف ..اكيد مايبي لها ذكاء.. خالد : لابس حبيت اعطيك خلفيه.. حمد: خلاص طيب ..بقول لعبدالله عن المطعم طيب.. خالد: اوكيه..يالله مع السلامه.. حمد:مع السلامه.. صك خالد وهو يطالع منال:يعني عاندتيني وقعدتي.. منال: وشو حشى مكالمة المخابرات السريه وانا مدري.. خالد: لابس لما اقول لك شي اسمعي كلامي بسرعه.. منال:اقول تسند بس..وتمسك ولاتطيح بعد.. خالد: طيب روحي يالله ببدل ملابسي ولا تبين تشوفين عضلاتي.. منال: امحق عضلات..بطلع .. خالد: لا اقعدي الله يخليك عطيني رايك بعضلاتي .. منال وهي لافه بتطلع: الله من ثقالة الدم.. يوم دخلت منال لغرفتها لقت ملاك الي كانت تكلم ساره الي تتوعدها اذا ماجت بكره للجامعه... ملاك: والله بنجي بكره وعد مني..اذا ماجيت سوي بي الي تبين.. ساره: ماينوثق فيك ..لا انت ولامنال..مير انتي تنبلعين منال مره ترفع الظغط.. ملاك:هههههه مو شي جديد..لو تشوفيني وانا عندها زايد طقاقها معي...بس احسن شي تو معطت لي كم خصله من شعرها وحست لها شعرها..ههههههههه ساره : زين سويتي..ههه منال: خيير انشاءالله تحشون فيني.. ملاك: لا انا وسوير نحش فيك..لا الا نمدحك وانتي الصادقه.. منال: عطيني طيب ابي اكلم سوير.. ملاك عطتها الجوال.. منال:الوو هلا بسوير الدبه.. ساره: هلا بمنالوه الشينه.. منال: ساره انتي فاضيه .. ساره: بقووووه ملانه ماعندي شي اسويه.. منال: طيب تعالي انا وملاك بنطلع للمطعم.. ساره: ايا الخاينه توك تقولين لي.. منال : طيب يعني بتجين.. ساره : ايه بس مين بيوصلكم.. منال: اخوي خالد.. ساره: طيب عادي تمروني.. منال: اكييد انتي بس اجهزي من الحين لاننا بنطلع الحين.. ساره: كالعاده انتي تجيبين لي الخبر في وقت شين ومتأخر.... منال:طيب يالله روحي البسي مافيه وقت ..بعد لك من واحد الى عشره واذا ماخلصتي ياويلك يالله 1..2..3..4.اها خلص الوقت..خلاص لاتتعبين نفسك.. ساره: الله يقطع بليسك شوي شوي علي ..ترا بيتنا مو بعيد عنكم مره عشان تتثيقلين.. منال: هههه لا بس احمسك.. ساره: طيب يالله باي بروح اتجهز.. منال: يالله ماوصيك..تكشخي ..الله الله بالرجل الصالح.. ساره: يالله عاد..ماصخه..يالله باي.. منال:هههه باي.. صكرت منال ولفت على ملاك.. منال: طيب ملوكي ..انتي جاهزه.. ملاك : من زماااااان.. منال: احسن موو البارده سوير..الا اقول الله يستر اذا قلت لخالد يمر عليها وش بيقول.. ملاك: ليه هو موو موافق.. منال: مدري عنه.. انتبهوا على صوت طق الباب.. خالد: يالله ترا بمشي الحين بسرعه ..عجلوا.. منال: طيب طيب.. استنانا.. الحين بنجي... لبسوا عباياتهم ونزلوا.. منال تكلم امها الي كانت قاعده في الصاله: ماما وين خالد..لايكون راح بس.. ام خالد: لا لا ماراح يستناكم في السياره.. منال:طيب يالله ماما باي.. ملاك: باي خالتي.. ام خالد: في أمان الله... ركبوا السياره وهم هاجدين منال كانت خايفه يلاغيها خالد لانهم تأخروا شوي ..بس من اعجب العجب انه كان ساكت وهادي.... وهم في الطريق مروا على لفه نفس اللفه الي توصل لبيت ساره..نست انها بتوصل ساره.. منال بسرعه وبصوت عالي: وقف وقف وقف.. خالد ارتاع وظغط فرامل على جنب.. خالد مرتاع وشبه معصب:وش فيك خير انشاءالله.. منال(والله اني ملقوفه وماعندي اسلوب الحين اتحداه يوافق): خالد الله يخليك اول شي لاتعصب علي.. خالد بعصبيه: خيير.. منال: والله اني وعدت صديقتي امر عليها وناخذها معنا .. خالد واضح على ملامحه انه معصب بس ماحب يوضح مايبغى يفشل اخته عند صاحبتها: ميين صاحبتك هاذي.. منال استغربت انه مانفخ عليها:هاه ..هاذي ساره ال........ خالد مستغرب:اخت محمد ال...... منال: ايه ..ليه تعرفه... خالد: ايه هاذا واحد اعرفه كان معي من ايام الجامعه ... منال : طيب يعني تعرف بيتهم.. خالد: ايه خلاص الحين بروح له ..قولي لها تعجل.. منال مستانسه: اوكيه ..شكرررررراً..الله يوفقك ويجيب لك المره الصالحه.. خالد:طيب دقي وخلصينا.. منال: ابشر... طلعت الجوال ودقت على ساره.. منال : الوو هلا سارونه ..خلصتي ترا احنا برا نستناك.. ساره مرتاعه: لاااا احلفي... منال: يعني ماخلصتي.. ساره :الا بس بلبس جزمتي وعبايتي وانا برا... منال بتلحق عليها: لا لا لا ..لا تطلعين العب عليك تونا ماوصلنا... ساره: داريه ..بس صدق الحين انا جاهزه بسرعه.. منال: طرار ويتشرط.. ساره: خلااص لاتمروني الشرها مو عليك الشرها على الي موافق يجي معاكم.. منال :هههههههه لا امزح حياك الله...اصلا احنا ماطلعنا الا لانك بتجين انتي حلاوة الطلعات.. ساره عطتها ظحكه ثقه:هههه اصلا انا داريه ياماما.. منال: ياللله زود ثقه على خالي بلاش.. ساره: اخلصي يالله ... منال: يالله طيب ..باي... جلسوا شوي في السياره ملاك ومنال يسولفون وخالد كان هاجد معنى الكلمه....وصلوا لبيت ساره.. منال: اصبر ياخالد بانزل انا وملاك وبناديها.. خالد: بسرعه طيب.. منال وملاك نزلوا يبغون يفاجؤونها..ماعندهم ماعند جدتي.. دقوا الجرس فتح لهم بزر الباب...منال وملاك دخلوا وروعوا البنت الي خلصت مابقا الا تلبس الجزمه والعبايه الله العالم... (البزر هذا يصير ولد اخت ساره الكبيره سحر واسمه فهد) فهد: ساره فوق ... منال وملاك: طيب عادي نطلع فوق.. فهد : ايه مافيه لا محمد ولا بابا .. منال وملاك على طول طلعوا لغرفة ساره وروعوها.. ساره: الله يحوسكم انشاءالله روعتوني.. منال:هههههه اشوا احمدي ربك انك جاهزه ولا كان كليتك.. ملاك: يالله ترا اخو منال بياكلنا.. منال: لا تخافين ماياكل تلعب عليك.. ساره: انتوا الثنتين ماتعرفون شي اسمه احترام الخصوصيه.. ملاك: اخس ..ياأحترام الخصوصيه... منال: بلا خصوصيه بلا كلام فاضي يالله ترا خالد بيعصب علي ويحرمني من الطلعات.. ساره :يالله مشينا.. لبست ساره عبايتها وتغطوا منال وملاك وركبوا السياره وعلى طول من بيت ساره للمطعم وهم طول الطريق سوالف والحش شي اساسي بس حشهم بريء يحشون على سياره ولاواحد هندي بسيكل <<كثري منها ههههه.. يوم وقفوا عند المطعم كانوا عبدالله وحمد توهم واصلين ...في نفس الوقت..نزل خالد من السياره وسلم عليهم.. ملاك ارتاعت (هاه وش جايبهم): اقول منال ..خالد ماقال لك انهم بيجون.. منال: الا قال لي...ليه ماقلت لك.. ملاك خبطت راس منال: يالله ..الواحد مايقدر يعتمد عليك.. ساره ماأنتبهت لهم..الا بعد لحظات.. ساره : اقول منال ..مين هاذولي الي يسلمون على اخوك.. منال: هذولي الله يسلمك ..اخويان اخوي.. ساره : طيب..ماتعرفين تقولين لي انه فيه احد من اخويان اخوك بيجون..وش خسرانه.. منال: واعليا نسيت.. ساره: يالله مليحة الوصايف.. ملاك:هههههههه .. عبدالله كان متابع البنات يبي يعرف أي وحده فيهم ملاك ..وعرف أي وحده فيهم ملاك من صوت ظحكتها..مايدري ليه يعذب نفسه مع ملاك الي ما عطته وجه خير شر..وهو اصلا بيسارفر خلاص مايبي يضايقها ويخليها تحبه بعدين يروح..يوم تجمعت هالافكار في باله نزل عينه عنها..وفي نفس اللحظه انتبهت ملاك انه كان يطالعها ..وحست انه ضايق صدره بس ماتدري ليه تضايقت حست انه ودها تجي تعطيه ابتسامه وتروح ..هذا اقل شي تقدر تسويه.......اما حمد دايخ على البنت والي هي منال صايره ثقل معاه..ماتدري انه خاق على ثقلها... اشر لهم خالد الي مرتاع اثنين قدامه جثه بلا عقل وبلا قلب...نادا منال ودخلوا جوا المطعم البنات ورا ستاره والشباب في الستاره الي على طول وراهم..يعني جنب بعض متلاصقه... منال: اقول ساره جبتي فلوس.. ملاك: يالله ماتمل من اسألتها الغبيه.. منال لفت على ملاك: عفواً الاخت محد كلمها اتوقع..الا اذا كان اسمك ساره واحنا ماندري.. ساره: صح عليها سؤالك غبي ..وأيه جايبه فلوس اجل كذا مهويه.. منال: اوكيه ..طيب لاتطلعينها لان ملاك هي الي عازمتنا..(ولفت على ملاك)..الا اذا كانت سحبت كلامها.. ملاك: لا تخافين ..خلي فلوسك في جيبك.. انا على وعدي.. منال: لا انا اصلا عادي عندي ..احس الفلوس وصخ دنيا... ملاك: توك هالحين تحسين.. ساره: صح الفلوس وصخ دنيا.. ملاك: يالله بارده ون(1) وبارده تو(2) واجتمعوا.. منال: انتي تتكلمين عنا.. ملاك : يالله يامنال الله يصبرني عليك.. منال :لا لاتخافين كلها كم يوم ومتغيره مصيري.. ساره: لا لاتتغيرين ..ياحليلك بثقالة دمي.. منال كانت بترد عليها بس سكتها نغمة جوالها وكان خالد:الوو منال طلبتوا وش تبون.. منال : ايه ...(وقالت طلباتهم).. خالد: اوكيه... يوم صكرت الجوال سمعت صوت حمد كان يتكلم مع عبدالله....سكتت لسببين واحد تبي تسمع صوته ..اثنين ماودها يسمع صوتها مسويه ثقل....ومن الصدفه جلس في مكان على طول وراها بس الستاره هي الي مفرقه بينهم....وخالد برى موو جالس معا حمد وعبدالله.. كانت ملاك وساره متابعين منال الي سكتت يوم جوا العيال وماتدري وين الله حاطها.. ساره بهمس عشان ماتسمعهم منال: سبحان الله ..اقول أي واح فيهم.. ملاك بهمس: شفتي الي لابس بلوزه صفرا ..هذا هو اسمه حمد.. ساره: ساحليلها منقيه ..بعد ..والله ماعليه..الا لايكون انتي تحبين الي لابس تيشيرت ابيض مع بنطلون جنز(تقصد عبدالله).. ملاك :لا لالا. انا مع الهوا..وعلى فكره ترا موغصب الواحد يحب.. ساره: اكيد ..اقول شوفي منال.. التفتوا عليها وهي فاقه فمها ..وهم ميتين على شكلها كان تحفففه.. منال انتبهت لهم: خير انتي وياها مااتوقع فيه شي يظحك.. ملاك: انتي مالحقتي على السالفه عشان تعرفين.. منال: لا.. طيب ظحكيني ..ابي اعرف السالفه.. ملاك :متأكده ..ماخبرتك تظحكين على نكتي.. منال : لا وعد بأظحك.. ملاك دبرت لها نكته: طيب اسمعي ..فيه حمار جالس مع خطيبته الحماره..الحمار قال لها"ياحماره متى بنتزوج" قالت له" لما تحسن الفاظك"ههههه منال و ساره:هههههههههه.. ساره قربت من منال وقالت بهمس: هذا واقع ملاك ورجلها.. ملاك سمعتهم وصارخت:هييييييه.. منال وهي تظحك : ياحمار اسكتي الي في المطعم الثاني سمعوك.. ملاك استحت: اوبس..طيب اعقلي.. منال:آسفه سامحيني.. ملاك: لا بجد ياحليلك في الجامعه انتي زعلتيني اليوم بصراحه.. منال: لا لا تتغلين يالبايخه ..بلا زعل بلا هم..الزعيم هو الاهم.. ملاك: لا تكملين..خلاص انا زعلانه تنكت بعد.. ساره: ليه انا مامليت عينك.. ملاك: انتي عيوني اصلا..وش لون تملينها اجل.. ساره: ياحليلك الله يسلمك.. منال: يالله بدينا بحركات المغازل.. ملاك: عفواً مااتوقع اننا كلمنا الاخت..(لفت على ساره)ايوه وش كنت اقول!!.. منال سكتت وتكتفت..وهي تناظرهم باستحقار.. ملاك ظحكت على شكلها: غريبه مارديتي ..تعالي انتي على عيني وعلى راسي.. وقربت وباستها على خدها:ياحليلهم يتزعلون بعد.. منال تطالع ساره وهي رافعه حواجبها: وانتي ... ساره وهي تظحك: هاه بس على شانك انتي الي بتوصليني لبيتنا...(وباستها على خدها).. منال: الله من المصالح....الله لا يخلينا منكم... تنهدت منال وتسندت على الستاره <<مصدقه.. يوم تسندت على الستار خبط راسها خبطه محترمه براس الي وراها..ومييين الي وراها؟؟؟هو حمد... ملاك وساره ماتوا ظحك على منال ..وحسوا ان الخبطه قويه..لان منال مسكت راسها من الطقه.. ومن الطرف الثاني حمد عورررره راسه بجد الخبطه محترمه...وعبدالله قدامه يظحك عليه ... من جهة البنات منال كانت متعوره.. منال: اييييي.. ملاك وساره:هههههههههههه.. منال : الله يقلع بليسه راسه يابس... البنات خلاص بدت دموعهم تطلع من شدة الظحك... عبدالله سمعها:ههههههههههههههه.. حمد سمعها: انا راسي يابس ..شيكي على راسك اول.. منال: الله يقلع بليسك ..باخ راسك بسبريه.. ملاك من بين ظحكاتها: خلاااص يابنت..اعقلي.. حمد:ااه ياراسي ..تصدقين اشك انه من خبطتك بصير نابغه... منال تبي تفهم يسب ولا يمدح : عفواً الاخ يسب.. حمد: تقريباً.. منال: اعوذ بالله... حمد وهو لسا ماسك راسه:ههههههه.. ساره وملاك فاقين فمهم ..باين على منال وحمد نسوا الي حولهم..وخذوا راحتهم.. جاء خالد ونادى منال: منال تعالي خذي الاكل.. منال :اصبر بتغطى.. تغطت وخذت الاكل وشافت حمد لسا ماسك راسه..ياحليله محشش... بدوا البنات ياكلون وهم يتكلمون عن الجامعه والبنات الي في الجامعه...<<حتسي حريم فاضي>>.... بعدها مرت لحظة صمت بين البنات والشباب كانوا يتكلمون .. ملاك انتبهت لخالد يوم سأل عبدالله السؤال الي حطمها بلا سبب... خالد:اقول عبدالله متى انشاءالله بتسافر.. عبدالله: انشاء الله بكره الساعه 11.. خالد: يوه الرحله متأخره مره.. عبدالله: لا عادي اذا وصلت هناك بريح.. ملاك في عقلها(يالله بيسافر انشاءالله مايتأخر..ويوصل بالسلامه ويرد بالسلامه). خالد: طيب تقريبا متى بترجع.. عبدالله:والله مادري ع الاقل بعد سنتين.. ملاك انصدمت تحطمت ارتاعت ماتدري وش صار لها....من ردات فعلها المتضاربه شرقت... منال وهي ماسكه ملاك: بسم الله عليك...(وعطتها مويه).. ملاك وهي تكح: شكراً ... عبدالله انتبه لها يوم شرقت سمع صوتها وهي تكح..بس ماحب يوضح انه مهتم.. خالد:طيب مااوصيك اول ماتوصل بيتنا مفتوح لك.. عبدالله: ترا انا مااصدق..هههههههه.. خالد:هههههه لا وانا ماامزح من جدي خلاص توعدني.. عبدالله: ان الله احيانا .. ملاك ماتدري ليه انسدت نفسها وجلست على الكرسي وهي متكتفه ... منال انتبهت لملاك الي كانت ساهيه وانقلبت حالتها :ملاك وش فيك؟؟. ملاك انتبهت :لا مافيني شي بس شبعت ... ساره: طيب وش هالكتمه وش فيكم سكتم اصلا..اذا كنت انا عبست ..ملوكي وش بتسوي اجل.. ملاك ابتسمت لساره وقالت بصوت واضح انها ضايق صدرها: تسلمين يالغاليه... عبدالله ضاق صدره لانه حس ان ملاك منتبهه له وملاحظته وعكس الي كان يظن..وحس انه سوا الي ماكان يبيه انه خلاها تحبه والحين هو بيروح ويخليها ........... وخلصوا من العشاء وكل واحد راح لبيته وملاك تعذرت من منال وراحت لبيتها ..حست انها بعد الخبر الي سمعته ..انها خلاص كأيبه..تسأل نفسها(يالله انا احبه ولا وش ها مشاعر الشاعر الي القيها له ..هل هي حب ولا معزه...ياربيه لايكون عذابي بيبدا..بس مو على طول ماعطاني فرصه اعبر عن حبي) وبدون ماتحس وهي على سريرها نزلت من عينها دمعه..تبي تحلل سبب نزولها..بس مالقت لها تحليل...والي كان تحليلها الحب.. نهاية الجزء الثاني.. |
|  |
|
10-05-08, 02:32 PM
| #27 |
| |[ عـضـو مـشـارك ]| الدولة: | رد : روايتي رواية ملاك الروح..غرقانه في بحر الذكريات..رواية من تأليفي.. ويالله عاد ..مااوصيكم ردو بلييييييز.. |
|
| |
|
21-05-08, 06:08 PM
| #28 |
| |[ عـضـو مـشـارك ]| الدولة: | رد : روايتي رواية ملاك الروح..غرقانه في بحر الذكريات..رواية من تأليفي.. يالله مشكورين ع الردود .. بس انا حابه اكملها لان يمكن ويمكن في احد مر ولاحب يرد علي.. بس هذا الجزء الثالث.. ومااوصيكم هالمره ابي ردود اقدر اقراها مو رد مادريت عنه حتى.. |
|
| |
|
21-05-08, 06:10 PM
| #29 |
| |[ عـضـو مـشـارك ]| الدولة: | رد : روايتي رواية ملاك الروح..غرقانه في بحر الذكريات..رواية من تأليفي.. هذا الجزء الثالث.. مني لكم.. الجزء الثالث مرر اسبوع على سفرة عبدالله ..ومن ذاك اليوم ملاك ماقدرت تشيل صورة عبدالله من عقلها.....اما منال من بعد ماراحت ملاك من عندها...وهي حاسه ان اليوم يمر عليها كأنها سنه... لانها كانت مرره مستانسه ومرت عليها اليومين بطيييييئه...وحمد كان حتى الان يكلم منال ..بس ماكانوا يعترفون بحبهم لبعض كانوا يسولفون ويظحكون ويتطاقون..ماخذين الدنيا ايزي.....اما مشاري الي دق على نواره في الليل اعترف لها بكل الي في خاطره ...قال لها انه يحبها بس ماكان يبي يوضح لها لانه خاف اهله مايوافقون عليها لانهم يبونه ياخذ وحده من العايله.....بس نواره تقبلت الوضع وخلته يتفائل ..وقالت له "ان كل شي بيد الله بس انت ماعليك ادعي وبأذن الله كل شي بينحل"...كانت نواره فرحانه لان مشاري كان يحبها واعترف لها ..بس ظاق صدرها لان اهله ممكن يعارضون على زواجه منها ..وهي تحبه وممكن تضحي باي شي عشانه....... ويوم الثلاثاء ملاك بتدخل ال20 ..ويوم الاربعاء الي بعده بالظبط بتكون ملكة نورة...... يوم الاثنين في الجامعه كانت ملاك مع منال وساره جالسين في الكافيتريا...منال كانت تسولف مع ساره وكانت ملاك ساكته وساهيه ... منال لفت على ملاك: ملوكي وش فيك...من زمان ماسمعنا صوتك...ليكون صايره لك مشكله... ملاك انتبهت لمنال: هلا....لا ماصار شي بس ..شوي مصدعه.. ساره: لك كم يوم مصدعه ..لا مو صداع هذا... ملاك وهي شوي مكتومه: لا بس ..افكر اذا راحت نوره وش بسوي بالبيت بلحالي... منال: متأكده.. ملاك: ايه ..وزياده على كذا الاختبارات قربت... ساره: اهاا..بس لا تشيلين هم استانسي الحين وارتاحي ..وكل شي بيمر مرور الكرام.. ملاك: انشاء الله... منال ذكرت ان ملاك بكره بتدخل ال20: اقول ملاك انتي تحتفلين بعيد الميلاد... ملاك: لا مااهتم... منال: طيب تقبلين هدايا.. ساره تطالع منال وبهمس: فضحتي عمرك يابقره... ملاك: والله سؤال مال امه داعي... منال: داريه..هههههههه.. ملاك تشوف ساعتها: اقول بنات يالله بتبدى المحاظره..انا بقوم قبلكم انتوا باردات... منال: طيب ..شوي وبنجي.. قامت ملاك وبعدت عنهم.. ساره: مالاحظتي ان ملاك متغيره... منال: بقوه ..من يوم ماراحت من عندنا وهي مررررره متغيره..بس مدري وش عندها.. ساره: والله ودي اعرف وش فيها يمكن نقدر نساعدها... منال: لا لاتقولين لها ولا شي لانها بتتضايق ..واذا كان الموضوع مره مضايقها ..مصيرها يوم بتتكلم.. ساره: اوكيه..بس ماتلاحظين اننا مره تأخرنا.. منال: ايه والله يالله بسرعه...ركض ..هههههه.. ساره : لا والله بجد يالله ركض.. منال :تخيلي شكلنا.. ساره: ترا على فكره انتي تسبيني.. منال:ههههههه.. دخلوا منال وساره للقاعه وهم يظحكون ماخذين راحتهم نسوا انهم متأخرين خلقه.. لقوا الدكتوره تطالعهم من طرف عينها...ملاك كانت تظحك على اشكالهم انقلبت احوالهم 180 درجه...وطردتهم الدكتوره من القاعه... المشكله ان منال وساره ماضاقت صدورهم لا بالعكس حسوا انهم افتكوا من هالمحاضره.. ملاك كانت مللانه منال وتعليقاتها مو موجودين معاها هنا... ====================================== نوره كانت بالبيت تكلم نواره بالجوال وتسولف معاها ..وكانوا يبغون يطلعون يشترون هديه لملاك بمناسبة دخولها العشرين...قرروا انهم يطلعون بعد صلاة العشاء مع بعض...منها يشترون لملاك الهديه ومنها نوره تشتري لها كم من شغله.... نوره: نوير انا مرررررررره خايفه بعد بكره ملكتي.. نواره: يالله ..هذا وتونا الملكه وش بصير اجل اذا جاء زواجك.. نوره وهي تتخيل الموقف:يمممممممممه .. نواره:هههههههههه ياحليلك.. نوره وهي مغمضه عينها ورافعه راسها: توني اتخيل الوقف....امشي وكل الناس بياكلوني بعيونهم...والي متحسف اني ضعت عن ولده...ههههههه واثقه.. نواره: بقووه لاحظت...بس لاتخافين بمر انا وبيرتاحون بيقولون فيه امل... نوره فتحت عينها ولفت على نوره: يعني بزعمك بتكحلينها...الا انشاءالله بيحضرون عرسك من مشاري وبتظيق صدورهم بجد... نواره: الله يسمع منك... نوره: والله انك شريره.. نواره:ههههه لا اقصد يعني انا اتزوج مشاري...بس اهله معاندين ... نوره: الله يوفقكم ..ويجمعكم مع بعض... نواره:آآآآآآمين... نواره تكمل كلامها: الانوره قلتي لملاك انها بتسافر عشان تكمل الدراسه السنه الجايه.... نوره: لا لسا هذي من ضمن المفاجأه الي ناويه افاجئ بها ملاك... نواره: تتوقعين بتخربها ..وتطنش الاختبارات اذا درت... نوره: لا مااتوقع..هذي دفرفر..(دافوره=شاطره).. نواره: طيب...نوره مابتشتاقين لي اذا رحتي... نوره: الابشتاق لك موووت.. نواره: ياشينك من اولها مرخيه مع رجلك ..شدي عليه.. نوره: توه ماصار رجلي ولا كان شاده عليه من زمان.. نواره: الله العالم... نوره: الي مايعرف الصقر يشويه...ولو اني ماادري وش جاب هذا لهذاك.... نواره:ههههههه عادي موجديده علي.. نوره: يابنت... نواره: هلا..عيون البنت... نوره:هههه ماتجي ..المهم ..اقول نواره ماتلاحظين ان ملاك صايره كأيبه ها الايام..؟؟ نواره: طيب اسمعي 1- انا مااجي عندكم كثير ومااشوفها الانادرا 2-ايه لاحظت شوي.. نوره: طيب يوم انك ملاحظه ليه طاقه مشوار وتحسبين... نواره: اقووول روقينا...الا ليه السؤال... نوره: ماادري ..بس ..ابي اعرف وش عندها ..احس اني اذا جيت ابي اكلمها ودها تنهار علي وتبكي.. نواره: لا مو لها الدرجه عاد... نوره: طيب ..المهم.. بكره بااكلها .. نواره: وشلون.. نوره: اولا بقول لها الخبر وبتستانس..اثنين باجيب لها هديه تدوخها.. نواره: ايه سنعه نعم الاخت مالت على الي عندي... نوره: ايه..(وهي تتنهد)آآآآآه ..ياليت كل الناس زيي.. نواره: يمممممممه تخيلي.. نوره: الله من ثقالة الدم... نواره: ههههههههه لا شوفي انا خفت لان نوره وحده ومكفيتنا وشلون اذا كثرت الناس بيموتون ..يعني قمر موجود بالارض ...هههه رقعتها.. نوره:مالاحظتي ان الترقيع طويل...؟؟ نواره: لاني سبيت وابتلشت وصلحتها.. نوره: طيب اسمعي يالدبه..انا الحين بصكر بروح اجلس مع مماتي.. نواره: اوكيه طيب سلميني على مماتك والعيله كوللها..—لهجه مصريه--- نوره: اعقلي.. نواره: ههههه اوتسي..(اوكيه).. نوره: تزود باي..(غود باي)... صكروا نوره ونواره...نوره راحت لامها تبي تجلس معها لانها عن قريب راح تسافر وتبتعد عنهم.. ==================================== طلعت ملاك من المحاضره وهي متحسفه انها دخلتها كانت ملل معنا الكلمه ..يوم طلعت لقت منال وساره في الكافيتريا..الي فاقه خشتها وتطالع كل من هب ودب والي مركيه راسها على الطاوله...اشكالهم تجيب النوم.... قربت ملاك عندهم وهي تظحك:سلامات..وش عندكم.. ساره رفعت راسها: اخيرا..ماصارت.. ملاك: فاتتكم الدكتوره طاحت قدامنا والبنات ماتوا ظحك عليها... منال متحمسه: امااااااانه..حسافه راح علي الموقف... ملاك: هذا الي نشطك... ساره: والله بجد طاحت... ملاك: لا بس ابي اصحيكم..ههههههههه.. منال: اشوا ماابي موقف زي هذا يروح علي.. ساره: يالللله شر... منال: لا مو شر ..هذا يسمونه حب استطلاع... ملاك: كفو حب استطلاع... منال: على قدي... ساره جتها رساله بجوالها..فتحتها لقتها من اخوها محمد مكتوب فيها((سارونه مااقدر اجي ااخذك اليوم من الجامعه..عندي اجتماع مهمم ..شوفي أي وحده من صديقاتك توصلك او شي..)) منال عصبت من محمد وكشرت..الحين ابتلشت ماقال لها من قبل ..وحست ان حركته باايخه ... منال انتبهت لساره: وش في الحلو معصب... ساره :لا ولا شي ..بس اخوي يستثقل دم ودي اخنقه.. ملاك : اوف ..ليه وش عنده.. ساره ماحبت تقول لهم ولا تبي تتشرط: لا ابد سلامتك... منال: اقول بنات قولوا تم.... ملاك تكلم ساره: ياساتر... منال: قولوا تم وبس... ملاك: بسم الله الرحمن الرحيم..(بلعت ريقها) تم..وش عندك.. منال: ساره ماقالت تم...قولي تم.. ساره :هااااه ...تم ..تم..تم..اخلصي وش عندك... منال: تتغدون عندي اليوم... ملاك:يووووووووووووووووووه... منال: خييييير انتي قلتي تم ..خلاص مافيه نقاش... ساره: انتي بتخلينا بيبان واقفه من هاالعزايم... منال: اصلا مافضيت لكم عشان اهزمكم ..اليوم مكرمه ..وماما قايلة لي تبي تشوف صحباتي لايكونون مو شي علي...... ملاك وساره بطريقة استهزاء: يالللللللللللله.. ملاك: مااقدر انا لا مستحيل... ساره:ابي امي ابي ابوي ابي .أأأأ..شغلتنا... ملاك:ههههههه وش تبين بالشغاله.. ساره: لابس الحلقه الاخيره مانزلوها عندنا...ههههههه.. منال: خلاص بنات لا للنقاش ..جايين يعني جايين..وعقاباً لكم على ردة فعلكم انا بوصلكم بعد... ساره في عقلها (جابها الله)... ملاك: اصلا انتي بتوصليني لسببين .. منال: الا وهما؟؟... ملاك: الاسباب هي 1- ابي ازعجك وااخرك..2- ابي احوسك في السياره..3- ابي اشوف لا تكونين تلفين يمين ولا يسار... منال: يالدبه حرام عليك انا الف يمين ولا يسار... ملاك بكل برائه: لا اقصد يعني تضيعين الطريق.. منال: لا لا تخافين علي..وبعدين السواق دال الطريق.. ملاك: يحمد ربه...كل شي ولا يزعل حمودي... منال: ممكن اسألك وش جاب طاريه... ملاك: ليه انشاء الله.. ساره: لايكون متطاقه معاه..؟؟ منال: مو شي جديد ..صح؟؟.. ساره: ايه صح ..بس هالمره كأنك زعلتي.. منال:ايه..خير وش تبي تنادينه حمودي... ملاك وساره ظحكوا عليها: حركااااااااات تغار عليه... منال: يالله انا جالسه مع بايخين.....شوفي انتي وياها ..بتجون معي يعني بيتجون معي... ملاك: اوكيه..عشان عيونك... ساره:اوكيه..كأنك حاسه في البقره ..اخوي .. منال: وش في اخوك... ساره: حمار مرسل لي رساله يقول"ماراح اوصلك اليوم دبري حالك".. منال: عيال..و انتي مسويه ..مستحيه قولي تكلمي هذي خيره من ربي سوسو بتجي معي الللللله... ملاك: ياسلام ومين الي قال انك انتي الي بتوصلينها يماما ..انا الي بوصلها ..وأشيلها بعيوني... ساره في الاخير صارت تخبط راسها على الطاوله... ساره: اقول لمن شوي شوي علي.. منال: وانتي مصدقه الكلام.. ساره: حددي موقفك..ياتشقق ..ياتحطم...انتي ماعندك حل وسط... منال: شوفي اقول لك نصيحه.... ملاك دشت عرض: خذوا النصيحة من افواه المجانين.. منال لفت عليها وعطتها نظره ساحقه ...ساره ماتت ظحك على رد ملاك... منال تكلم ملاك: انتي انا ماادري وش عندك اليوم... ملاك: والله ماعندي شي... منال : طيب اسمعي وانتي ساكته..دقي على الي بيوصلك وقولي له لا يجي لانك بتجيين معي..فاهمه.. ملاك: انشاءالله طال عمرك.. منال: ويالله مشينا...لان السواق بالطريق.. قاموا ثلاثتهم وطلعوا ..ركبوا السياره وخبال واستهبال في الطريق يوم وصلوا لبيت منال كل وحده تاكل من طرف خشمها ماتبي تاكل..<<مو غصب بس منال واقفه فوق روسهم.. ملاك يوم خلصت دقت على السواق يجي ياخذها وراحت ..اما ساره قعدت عند منال ... وهم يسولفون دخل خالد( طبعاً ساره فالتها تتحجب اذا خربتها وهي بالعاده تتلثم وبس)..يوم دخل خالد هو يعرف منال مره تخربها وتفتش ومره تتلثم ...واليوم مخربتها ومتحجبه بس... خالد: السلام.. منال وساره: وعليكم السلام.. منال لا حظت شي في خالد: اووه ..خالد وش فيك مطول شعرك عسى ماشر(طبعاً ماكان شعره طويل مره كان طويل شوي ..واشين شي عند منال وملاك اذا فيه ولد مطول شعره).. خالد: مايجيك الشر..نيو ستايل.. منال: الله على النيو ستايل.. خالد: طيب ..بروح آسف اشغلتكم.. منال: خالد انت فاضي.. خالد استغرب: ايه... منال: تعال اجلس ..ابي العب بشعرك..(تتهزى عليه).. ساره فهمتها وظحكت.. خالد: لا شكرا ..انا مو فاضي لك.. منال: توك تقول ايه فاضي..ترا عادي ارقى لغرفتي زاجيب الشباصات.. خالد: ترا مالي خلق حوستك وثقالة دمك.. منال: تصدق ..احس انك ماحللقت زوالتاً فيك... خالد: يوم انك عارفه ليه مسويه لي سالفه... منال تكلم ساره: انلحس الولد..هههههه.. خالد: يالله ثقالة طينه...انا بروح وبس... لف خالد على انه بيطلع وتذكر شي: اقول منال من البنت الي توها طالعه من عندكم... منال: هاذي ملاك... خالد: اهاا.. منال: ليه اش عندك... خالد: لابس ابي اعرف ... منال: ايه..صح ..طيب.. خالد: انتي مافيك فايده...سلام.. وطلع خالد ومنال جلست شوي مع ساره بعدين ساره رجعت لبيتها ..وكانوا كلهم مدروخين... كانت ملاك تعبانه في غرفتها دايخه ..تحاول تنام عشان تريح جسمها شوي..بس ماقدرت تنام كاه تتقلب..واذا قدرت تنام تحلم بحلوم غريبه ...آخر شي قامت وطلعت من غرفتها..وراحت عند نوره تبي تجلس معاها... نوره كانت في غرفتها جالسه تحوس بلابتوبها...طقت ملاك باب غرفة نوره.. نوره: مين... ملاك:انا.. نوره: ادخلي... ملاك: نوره ..انتي فاضيه.. نوره: ايه وملانه بعد...جابك الله... ملاك: نوره..يالدبه عقدتيني ..من الحين ظايق صدري لروحتك... نوره: لا يضيق صدرك ماراح تشتاقين لي.. ملاك استغربت: ليه تقولين كذا... نوره حست انها بغت تفضح المفآجأه: لا بس ..توقعاتي... ملاك: لا ياعمري لاتتوقعين توقعات خاطيئه.. نوره: من عيوني... نوره تكمل كلامها: الا ملاك وش فيك متغيره هالايام.. ملاك: انا..؟؟ نوره: يس يو!!.. ملاك: مافيني شي... نوره: الا مره صرت هاجده ..بزيااده.. ملاك: لا مافيني شي ..بس تفكيري بهالاختبارات .. نوره: اهاا..طيب اسمعي غريبه مانمتي... ملاك: حاولت انام بس ماقدرت.. نوره:ملاك ودي اقول لك شي بس ماودي اقول لك... ملاك: حلوه...حددي موقفك.. نوره: اخاف اقول لك وافضح عمري.. ملاك: طيب تلميح... نوره بتردد:أأأأ..بكره بتشوفين المفاجأه..وبتسمعين بعد... ملاك: اهاا..طيب اشوف فهمتها ..بس اسمع احس ماتجي.. نوره: خلاص عاد بكره بتعرفين وانتي ساكته.. ملاك :طيب ليه تحمسيني يوم انك بتعلميني بكره.. نوره: عادي ...هذا الهدف عشان بجد ماتنامين ..تتحمسين.. ملاك: لاتخافين اصلا انا هاالايام مانام الابالطقاق.. نوره: الله العالم اسمع شخيرك من غرفتي... ملاك : كذابه هذا اكبر دليل على كذبك.. نوره : انا كذابه... ملاك : لا..ليه شاكه في عمرك.. نوره: ياشينك .. ملاك: موو اشين منك.. نوره قامت تبي تخبط ملاك... ملاك: لا انا ابغى اقول ازين ..بس عشان توني قالعه ضرسي طلعت اشين.. نوره: هههههه احلفي .. ملاك: حلوه والله .. نوره: طيب قولي زورو.. ملاك: هههههه تخيلي شورو.. نوره : بعطيك وحده صعبه..امممم ..قولي جزر... ملاك: جش..جشر..هههههههه نوره: الحمدلله رب العالمين ..والله انا فاضين... ملاك : لاحظت... نوره جت بتعدل جلستها: ايييي..رجلي نامت.. ملاك : اطفي اللمبات..ههههه.. نوره:هههههههه..اقول ملاك وش عندك .. ملاك: ماعندي شي....نوره وش بتكون ردة فعلك اذا جلست مع عبدالعزيز.. نوره: يمممممه والله بصراحه اتوقع اني بكون ماسكه قلبي بيدي .. ملاك: طيب عشان اهديك..ادخل معاك... نوره بسرعه: لااااا... ملاك:ههههه الجيل الثالث... نوره : اقول تسندي ..والله الي يشوفك يقول السبعينات.. ملاك: حراااام عليك... نوره : تخيلت شكلك كشه ولا بسه ستريتش تفاحي فااقعععع..مع بلوزه واسعه برتقالي فاقعععع..هههههههه تحفه... ملاك: هاااي ..على حسابي تتخيلين شكلي... نوره:طيب خلاص..شوفي اليوم بتجلسين بالبيت.. ملاك: مدري ..بس اتوقع ايه...بس ليه تسألين.. نوره: بس ..كذا... ملاك: مشتهيه اروح للملاهي..لو بروح تجين معاي.. نوره: للأسف ..ماأتقع اقدر..اليوم بطلع مع نواره.. ملاك: ياحظي... نوره :دقي على منال وساره وقولي لهم.. ملاك: اخاف ازعجهم... نوره: الحين بتزعجينهم...هم كل يوم يدقون عليك ويعزمونك وانتي ماتحبين تزعجينهم... ملاك : خلاص طيب ..باشوف بادق عليهم.....(قالت بطريقه تشكك الواحد في نفسه)..بس...كأن الاخت تبي تطردني من البيت... نوره : الحمدلله رب العالمين...وش دخلني فيك ..خلاص اقول بس لا تروحين.. ملاك :لا بشوف الربع... نوره:اوكيه.. ملاك : وشو ماني داقه الحين... نوره :طيب انا وش قلت.. ملاك: نوره وش عندك انتي ونواره ..ماصرتوا تجون لبعض كثير غريبه..اول اربعه وعشرين ساعه مع بعض... نوره: مافي شي بس كلن على همومه..هي عندها همومها وانا عندي همومي.. ملاك :طيب وشي همومك... نوره: انا بعرس... ملاك :يالللللله..دارين ... سكتوا يوم سمعوا طق الباب.. منار: نوره بتروحين للسوق اليوم.. نوره : ليه... منار: ابي اروح معك.. نوره : لا تبين تروحين روحي مع بابا ..انا مو فاضيه ابازي هاالبزارين.. منار: طيب بابا مشغول.. نوره : طيب ..مو لازم تجين معاي انا بروح مع نواره..وبس .. منار : نوره بليييز...انا اختك الصغيره.. نوره : لا لا لا لا ..هذا مايمشي معاي يمشي مع بابا وماما وبس..انا لا يمكن يمشي مع ملاك... منار : ايه ملاك دايما تسوي الي ابي.. نوره لفت على ملاك: طيب اذا كانت تسوي الي تبين ..هي يمكن بتروح للملاهي اليوم روحي معاها.. ملاك فتحت عيونها: لا والله ..يعني اذا كنتي ماتبينها بتورطيني بها... منار: حرام عليكم انا اختكم مو بنت الجيران... نوره: يالله حفظنا هالموال..تعيده في اليوم حوالي مليون مره..انا اختكم وانا اختكم.. ملاك :طيب ..منار وش تبين تشترين من السوق.. منار: اكسسوارات وخرابيط.. ملاك: والله انك فاضيه ..مو يعني انك فاضيه يعني الناس تفضى معاك.. منار: طيب بجي معاك... ملاك: يالله نشبه.. منار: بليييز ملاك.. ملاك: اصلا ماادري بروح ولا لا صديقاتي ماوافقوا وماقلت لهم لين الحين... منار: يعني فيه امل.. نوره: هههههه ورطتها.. ملاك: ياشينك نشبه... منار: طيب شكررراً..(وباست ملاك مع خدها)..ونعم الاخت موو الكبيره..(وطالعت نوره).. نوره: اسمعي ترا اقدر اخلي ملاك ماتروح ولاتوديك..فاهمه.. منار: داريه هاذي المشكله.. نوره : افاا انا عن قريب بروح عنكم وهذا هو سلوبك معي.. منار: هذا الي مخلي اسلوبي معك كذا..انتي ليه بتروحين ..شدي على رجلك .. ملاك :هههههههه .. نوره: نفس كلام نواره.. منار: اسمعي نصيحتي.. نوره: اقول اطلعي والي يرحم والديك.. منار: طيب ..بطلع..باي.. نوره: اقول انقلعي زين... طلعت منار من الغرفه.. ملاك : يالدبه الحين ورطتيني بهالبزر..خلاص ماراح اشاورهم اصلا.. نوره: صدقيني بتقول لماما ..وتحسبين ماما بتخليها تجلس ضايق صدرها.. ملاك :صح وحبذا لو تذلف...يالله ودي انام شكلي بروح انام... نوره: اوكيه يالله روحي نامي..وخليني اجلس بلحالي.. ملاك: هههه طيب بروح انام..باي .. نوره:باي.. راحت ملاك لغرفتها ..والحمدلله قدرت تنام... اما عن منال الي كانت في سابع نومه..مافي شي يوقف بطريق النوم بالنسبه لها....المهم وهي نايمه دق جوالها ...وكان ع الصامت ..فتحت عيونها يوم شافت نور الجوال ...قامت تبي تشوف مين الي داق...لقته حمد داق عليها .."طبعاً مستحيل تخلي رقم حمد بنفس اسمه كتبت اسم ولا يقرب من اسم الحمد..الي هو..ليلا..)..تفكر تقول ارد ولا لا.."على فكره هي الحين شبه نايمه"..ردت عليه.. منال:........... حمد:الوو... منال بصوت كله نوم:الوو.. حمد: اوه ااسف كنتي نايمه.. منال: تقريباً... حمد وشلون يعني...تقريباً نايمه ولا لا.. منال :ايييييييه.. حمد: آسف ازعجتك... منال: طيب... حمد: طيب خلاص ماودي ازعجك زياده كملي نومك... منال :لا عادي.. حمد: طيب انا داق بس عشان اسلم عليك واشوف احوالك..واخبارك.. منال: كلها الحمدلله تمام..... حمد: خلاص اوكيه ..حسيت اني مصدر ازعاج..يالله باي وآسف ازعجتك.. منال: لاعادي افا عليك .. حمد : طيب يالله باي.. منال: باي... صكرت منال ورجعت تبي تنام...بعد عشر دقايق دق الجوال مره ثانيه.. منال وهي نايمه:يووووووووووه.. ردت على التلفون بدون ماتشوف الرقم.. منال بعصبيه: نعم... .........:.............. منال: الوووو..نعم ..خير..مين.. .........: شوي شوي لاتاكليني.. منال ارتاعت كان صوت واحد من الشباب: نعم ..خير..مين.. ..........:معاك بدر ... منال: اقول روح زين..(وصكت في وجهه).. منال: يالله فاضي يغازل هذا الله يرحم حالي ..هنا المشكله في الجوال ..مافيه بلوك.... منال ملت كل شوي يجي احد ويزعجها ..قالت تقوم احسن لها لان النوم اصلا طار... قامت ونزلت تحت..لقت خالد جالس في الصاله يطالع التلفزيون ومتمدد على الكنبه...مشت بهدوء وراه.. منال بصوت عالي عشان تروع خالد:بووووووو.. خالد بكل برود: هلا... منال : يوه عاش خبرات من كثر مااروعه... خالد: ياربيه انتي ازعاج ماتشوفيني متحمس معا الفلم... منال: لا مااتخيل شكلك متحمس... قربت منال من عند الكنبه الي متمدد عليها وبكل برود اشرت على رجله عشان يشلها.. خالد: نعم.. منال: شيل رجلك ابي اجلس... خالد: ماتحلولا الجلسه الا جنبي... منال: لا بس انا ابي اجلس هنا... خالد: مشكلتك... منال: ياشيخ قوم احسن لك...ترا من خواص الكشش انها تنمعط..( رجعت تعلق على شعره الطويل).. خالد:ايه بس كشتك اكبر من كشتي.. منال وهي تغمز: الاخ غيران..؟؟؟ خالد: يصير خير.. منال: والله مايندرى ...عيال الجيل الثالث شعورهم اطول من شعور البنات... خالد: يالله ..خلاص بحلق ارتاحي لو تبين بعد حلقت صفر... منال: لا والي يرحم والديك تبي تكبر خشتك علينا... خالد: ياثقل الدم..الجلسه معك تحوم الكبد... منال: بوجودك اكيد... خالد: والله ..يامنال احمدي ربك ان امي مدلعتك ولا كان انتي الحين مفروشه على الارض.. منال: الله يحفظلي ماما.. خالد: اامين.. منال: طيب متى بتروح تحلق.. خالد: وش فيك انتي ... منال: انا وصحباتي اشين شي عندنا الكشه مع العيال... |
|
| |
|
21-05-08, 06:12 PM
| #30 |
| |[ عـضـو مـشـارك ]| الدولة: | رد : روايتي رواية ملاك الروح..غرقانه في بحر الذكريات..رواية من تأليفي.. خالد: مشكلتكم...الا مين صاحباتك بالظبط.. منال: تعرفهم انت.. خالد: طيب صاحباتك مايخلصون... منال: الثنتين الاساسيات.. خالد: مين ..ساره وملاك... منال: ايه ..مافيه غيرهم... خالد: اهااا..اصلا انا كنت بقوم بروح احلق من التهزيئ الي جاني من امي ومنك ...بس الفلم شدني.. منال: طيب يالله روح... خالد: يالله انتي وش عليك بروح اخذ مفاتيحي وبطلع.. منال: طيب ..اصفق لك.. خالد: لا شكرا..مع السلامه.. منال: مع السلامه... صعد خالد وأخذ مفاتيحه ومحفظته من غرفته وطلع ..منها يحلق ويفتك من هالنشبه منال.. يوم طلع خالد برا دق جوال منال رفعت الجوال لقت رقم غريب ماعرفت مين...قالت ترد.. منال:.......... بدر: الوو..هلا ليه صكيتي بوجهي ياحلو... منال عرفت انه الخايس الي ازعجها صكت في وجهه...وقفلت الجوال عشان مايدق مره ثانيه... (يالله شباب الجيل الثالث بس يجي خالد والله لاخلي خالد ينتفه).. ============================== اما عن ساره الي مانامت كانت جالسه في غرفتها وطربانه...وتحوس بشعرها >>من الفضاوه ماتدري وش تسوي...مسكت جوالها وتصور كل تسريحه تسويها... شوي دق جوالها..نواره يتصل بك.. ساره: الوو.. نواره: ساره تعالي لغرفتي ابي اكلمك بموضوع ضروري... ساره : طيب الحين جايه... صكرت ساره وهي مستغربه من نواره وش عندها....دخلت على نواره وشكل نواره فيها كلام كثيير..كانت مستغربه.. ساره: هلا والله... نواره: اهلين.. ساره: وش فيك... نواره: ابي اقول لك موضوع عني مهم.... ساره من زمان وهي حاسه ان عند نواره شي:هلا وشو الموضوع... نواره بتردد: اممم ...انا.... ساره بتحمس: ايه انتي وشو.. نواره: انا احب.... ساره فتحت عيونها : انتي تحبين!!..طيب مين حبيتي... نواره :اماانه ماتقولين لاي احد مهما كان... ساره : طيب ماراح اقول وعد..بس مين حبيتي وكيف.. نواره: بس مو تقلديني انا ماكان قصدي انا مريت بالطريق وزلقت... ساره بحماس زايد: ماراح اقلدك ..ويالله بتجاوبين على سؤالي ولا شلون.؟؟.. نواره: اسمه مشاري....وتعرفت عليه بالنت...وماادري وشلون حبيته بس وصرت اكلمه... ساره وهي فاتحه عيونها لاخر شي: طيب هو يحبك..اقصد قال لك انه يحبك اوشي... نواره: ايه ..قال لي انه يحبني ...بس... ساره: بس ايش... نواره: يقول اهله يبون يكون زواجه من وحده من اقاربه... ساره: لا ..لاتخافين ..ترا اذا كانوا اهله يحبونه مستحيل يوقفون بوجهه.. نواره: الله يسمع منك.. ساره نزلت راسها: مااصدق ..حبيتي ولا قلتي لي.. نواره: انا خفت انه مايبادلني الشعور..وانتي ماشاءالله عليك ..تخلين الواحد يتفائل وخفت تخليني اتفائل ومايكون يحبني ..وممكن اروح في 60 داهيه.... ساره: طيب شفتيه... نواره: ايه... ساره وهي مرتاعه: وجها لوجه.. نواره: لااااااا ..بصوره هو مرسل لي صوره... ساره: طيب اوصفي لي شكله... نواره وهي تتذكر شكله وهي مغمضه عيونها: امممم.. ابيض وشعره اسود ...وعيونه تجنن.. واااا....(فتحت عيونها) ..اصبري اوريك صورته... ساره: يالله ... نواره مسكت جوالها وتدور صورته.. يوم لقتها:هذا هو......ااااااااه.. ساره رفعت حواجبها كان وسيييم معنى الكلمه ومرتب وشكله ولد عز... ساره: نواره ...بسألك سؤال... نواره: هلا.. ساره: انتي حبيتيه قبل ماتشوفينه... نواره: ايه ... ساره بتردد: طيب ..لا يكون..أأأ..ارسلتي له ...صورتك..؟؟ نواره: لا... بس بصراحه ..مو صور واضحه انها انا ...نقول انا وانا مغطيه وجهي بالقبعه ولا بسه نظارت... ساره : بس هاذي... نواره: لا فيه صور بس مو واضح شكلي فيها ..وفيه صوره لي من ورا ..وجهي ماطلع..بس شعري ... ساره ماضاق صدرها لان الصور موو موضحه شكل نواره بقووه.. ساره: اهاا... نواره: وش فيك... ساره: لابس استوعب انك حبيتي... نواره: ههههه مو بس احبه الا اموت فيه... ساره: لاحول ولا قوة الا بالله... نواره: بجد..ماتوقعت اني بحب أي احد... ساره: الله يقلع بليسك يوم حطيت في بالي ان الحب خراط جيتي واقنعتيني انه موجود... نواره: طيب ليه تقنعين عمرك من الاول... ساره: وانا فاضيه استنى احد ماراح يجي... نواره: مايندرى ..يمكن الحين يجي ..وش يدريك.. ساره: ارتاحي بس ..اقول الا مشاري قدك.. نواره: لا اكبر مني بسنتين.. ساره تبغى تهبل في نواره: يعني اكبر مني بخمس سنوات.. نواره عصبت: ههييييي ليه ناويه عليه.. ساره تزيد: لابس اخذ الاحتياط واجب..ههههههههه نواره: كلي تبن... ساره: والله حركتات يغارون..ههههه لاتخافين ترا كنت العب عليك ...ههههههه .. نواره: يحق لي اغار عليه ..اخاف عليه منك.. ساره:هههههه طيب انا امزح الله يحفظكم لبعض... نواره: الله يسمع منك...الله يعطيك واحد مثله .. ساره: اصبري اشيك عليه اول.. نواره: احمدي ربك الناس يبون واحد ياخذ صفه وحده منه بس اجل وشلون واحد زيه بالظبط.. ساره: هههههه.."يب وش فيك ماصرتي تبلعين الاستهبال..ماتميزين بين الملح والسكر.. نواره:آآآآآآآه..يازينه وبس.. ساره: اهاا ..انا اقول اذا سهت البنت وين تروح..اثاريك تتذكرينه..والله انك فاضيه.. نواره: ايه ..ياناس تلوميني فيه... ساره ملت من الاخت الساهيه قدامها: طيب نواره..ماقلتي وش رايك بتسريحتي..(كانت رابطه شعرها كله خصل بمغاطات).. نواره ماعجبتها: من جدك... ساره:لا بس كنت فاضه وجلست احوس بشعري.. نواره تطالع شعر ساره: والله ياساره اسمحي لي اقول لك بكل صراحه وقدام الناس بدون غرور...كأنك زعيم افريقي..ههههههههههه.. ساره:ههههههههههه..جبتيها... نواره: لا وراضيه بعد..هههههه.. ساره: يالله بروح افك هالمغاطات لاابتلش..الحين.. نواره: يالله بس امانه لاتقولين حق أي احد عن مشاري ..مهمما كان.. ساره: لاتخافين ..لا..مدري ايش..حريص... نواره:ههههههه لاتوصين حريص يالسنعه... ساره: طيب ..ضاعت..يالله غود وداعا الى اللقاء.. نواره: اقول روحي زين.. ساره طلعت وهي تظحك..وتذكرت ان نواره تحب واحد واسمه مشاري...(يالله مااقدر اصدق ان نواره تحب واحد..مااتخيل ..يمه وصلت لاختي..لايكون بس بيجي دوري ..لا لا ماراح تحبين احد..يجيب الله مطر..).. منال دخل عليها خالد وهو محلق ومتسنع ..عشان تسحب كلامها عنه ..ارتاحت يوم شافت خالد مسنع نفسه... ونوره ونواره راحوا للسوق وشروا هدية ملاك..وشرت نوره ونواره كم غرض... وملاك اضطرت انها تطلع مع منار لان نوره بلشتها بها..ونعمه ان منال وساره راحوا معها.. ================================================= في اليوم الثاني ..كان اليوم الي بتدخل فيه ملاك ال20... قامت ملاك من النوم..وهي تشوف ساعتها...قامت من النوم وغسلت وجهها وفرشت اسنانها...نزلت وكان البيت هادي مافيه احد قايم ..منار ويزيد رايحين للمدارس وابو يزيد بالدوام وام يزيد بالدوام ونوره الحين نايمه..دخلت المطبخ وفتحت الثلاجه تبي شي تشربه..اخذت لها عصير ورقت فوق لغرفتها ..يوم دخلت في الغرفه لقت الجوال موجود فيه (ميسد كال)..شافت مين الي داق كانت منال الي داقه.. شكل المكالمه قبل شوي..دقت ملاك على منال تبي تشوف وش كانت تبي.. ملاك:الوو.. منال: هلا والله بهالصوت...وش مقومك بدري ..اليوم عندنا اوف.... ملاك: طيب يعني تحرمين علي القومه بدري...وعلى فكره ترى انتي بعد صاحيه الحين.. منال:لا يماما انا غير.. ملاك: طيب..وش عندك داقه اليوم.. منال: لابس حبيت ادق عليك..ايه صح ..انشاءالله عقبال المليون سنه... ملاك: لاشكرا ماحب اتعذب ..ملون مره وحده.. منال: هههه عادي عيشي حياتك.. ملاك: اقول مااشتقتي لي.. منال: ليه وش عندك.. ملاك: لا بس سؤال..يطرح نفسه.. منال: اكيد اذا ماشتقتلك مين بيشتاق لك... ملاك: ترا اتقطع.. منال: من اولها..هههههه ملاك: لابس مالقيت رد.. منال: طيب يالدبه ابيك تجين عندنا اليوم.. ملاك: والله ماادري تعرفين بكره ملكة نوره وبساعدهم بترتيب البيت.. منال:اوكي ..تصدقين ماجاني النوم...الا صح تذكرت ..امس دق علي واحد ..لاحظي مع اني نفخت فوجهه ..الا حالف يقول لي اسمه...يتميلح...لا واسمه بدر بعد صكيت في وجهه بس ماتاب دق علي مره ثانيه ...شغله عند خالد.. ملاك: معليش مصيره ..بيحس بسحبتك ويذلف.. منال: والله مايندرى.. ملاك: طيب ليه قلتي خالد مو حمد.. منال: لا خالد احسن لي.. ملاك: صح بس انا ابي احرقك بس شكلك تعودتي على حمد خلاص... منال: ايه افا عليك.. ملاك: اسمعي ياحلوه..بروح اغير وبدق عليك.. منال: خلاصلك 5 دقايق..يالله باي... ملاك: اوكي..باي.. صكرت ملاك من منال..وغيرت لبسها ..لبست شيال بنطلون كحلي مع بلوزه صفراء..والشيال كان مصكر من جهه والجهه الثانيه مفتوح..كان شكلها كيوووت مره.... جلست ملاك ودق جوالها..منال المتصله.. منال: السلام..انا قلت 5 دقايق موو 5 ساعات.. ملاك: طيب ..توني مخلصه اصلا.. منال: حشى لو انك بتروحين لعرس... ملاك: اقول روقي ..والله انك مبالغه... منال: داريه..الا اقول وش لبستي.. ملاك: يوم انك فاضيه ..لاتسألين اسأله مالها داعي.. منال: طيب انا من اكبر المحبي للاستطلاع.. ملاك كانت تبي تجيب الدفتر الي في الدولاب فوق(مخبيته فوق عشان ماتلقاه الملقوفه نوره..لان هذا الدفتر تكتب الي في بالها وكل الي يصير لها فيه)..قامت ملاك وسحبت الكرسي..عشان تصعد فوقه وتجيب الدفتر.. منال: مليك وين رحتي.. ملاك وواضح عليها انها تسوي شغله: لا مارحت بس اصبري بالبس السماعات.. منال: وليه.. ملاك : مالك شغل.. لبست ملاك السماعات ورقت فوق الكرسي.. منال: ملاك وش تسوين؟؟ ملاك : ابي اجيب دفتري من الدولاب الي فوق.. منال: يالله انتي ماتحبين تنشغلين الا اذا جيت اكلمك.. ملاك: لا حرام عليك..(وهي تكلم نفسها)..يالله وين راح له.. منال: ايه..طيب .. منال سمعت صوت ملاك تصارخ.. منال وهي مخترعه: وش فيك.. ملاك وهي تتألم: اييييييييييييييييي.. منال: وش فيك.. ملاك: ااييييي طحت.. منال انسدحت من الظحك:ههههههههه احسن عاقبك الله عشانك ساحبه علي.. ملاك: انطمي بس.. منال:ههه عسى ماتعورتي بس.. ملاك: ايي لا عادي... منال: حسافه..ههههههه.. ملاك: ياشينك بدال ماتقولين بسم الله عليك.. منال: بسم الله عليك الرحمن الرحيم..اقول ملاك..لايكون بتصيحين.. ملاك: شكلي بسويها....بس ماقدرت اطلعها.. منال:هههههههههه..طيب لقيتي الدفتر؟؟ ملاك: لاا.. منال: خلاص مو لازم.. ملاك: اخاف كرهت الدفتر من هالطيحه.. منال: والله تسوينها ههههه.. ملاك: الوو مافيني حيل اتكلم ..اييي تعور الطيحه.. منال: طيب ماابي ازعجك ..هههه تألمي على راحتك..ههههه ملاك: يالله باي.. منال: باي.. جلست ملاك على السرير متعوره..بس تبي تاخذ الدفتر من زمان ماكتبت فيه من بعد سفرة عبدالله كتبت يومين ووقفت..جابت الدفتر..وكان الدفتر من برا كاروهات..لونه احمر..ومن الداخل الورق عادي بس موجوده في الزاويه كلمة Memoris...(ذكريات).. مسكته وكتبت عن طيحتها والي صار في الايام الي راحت و..و...ألخ..والاهم كتبت ان اليوم هو يوم ميلادها.. وقفت عن الكتابه وصكت دفترها ..وكان شعرها مفلول..رفعته بالقلم الرصاص الي كان بيدها....وشغلت لها موسيقى هااديه وراحت في عالم ماتدري من وين طلع... انتبهت لصوت طق على الباب وكان هادي..هي مستغربه ..يمن هاذا الكل نايم الحين...قامت وفتحت الباب.. شافت نوره وهي واضح عليها انها توها قايمه... ملاك: صباح الخير.. نوره: صباح النور.. ملاك: طيب غريبه اول مره في التاريخ نوره تقوم بدري.. نوره: اقول بلافقش..ابي اكلمك بالموضوع المفاجأه.. ملاك: ياحليلك قايمه عشاني... نوره: لابس كنت ابي اشوف ردة فعلك.. ملاك: ردة فعلي لايش..لها الدرجه الفاجأه حلوه.. نوره: اكيد حلوه..1-لانها مني..2-لانك انت تبينها من زمان.. ملاك تحمست: طيب وش المفاجأه هاذي الي مقومه نوره من النوم بدري.. نوره: مدري وش رايك اقولها لك الحين.. ملاك: ايه ..ابي مفاجآت.. نوره: طيب اصبري بروح اجيب شي وبجي.. ملاك: بسرعه ..طيب.. نوره:طــيب... طلعت نوره وراحت لغرفتها يوم رجعت لغرفة ملاك لقت ملاك جالسه على اعصابها.. نوره: شكلك تحفه شكلي بقول لك المفاجأه بعدين.. ملاك : يالله عاد..عن البياخه... نوره: طيب وش رايك بعدشوي.. ملاك وصلت عندها: خلااص بلا بياخه وشي المفاجأه.. نوره : طيب اسمعي المفاجأه هي ثنتين..الأولا جماد..والثانيه خبر.. ملاك: لااااااه ..احلفي.. نوره: والله..اسمعيني ولا تقاطعيني ..فاهمه.. ملاك: انشاءالله.. نوره: بطله..المهم..انا بعطيك الجماد والخبر بعدين ..طيب.. ملاك: اوكيه.. نوره راحت عند الباب ودخلت الكيس الي كان برا..كان الكيس موو كبير ..الي يشوفه يقول على حجم شي بريء... نوره: معليش الهديه ..مو زينه مره ..بس الاهم المعنى من الهديه ..صح.. ملاك: اكيد ..يكفي انها من النوري.. نوره: تسلمين... ملاك: طيب افتحها الحين.. نوره: على كيفك..بس موو تقولين ابو ريالين.. ملاك: الله يستر.. فتحت ملاك الهديه ..لقت بداخلها صندوق واضح عليها انها مستحيل تكون من ابو ريالين..فتحت ملاك الصندوق..لقت بداخلها ساعه..واضح على الساعه انها غاليه ..كان اطار الساعه من الماس..وكلها الماس يعني وناسه الساعه مررره.. ملاك رفعت عيونها على نوره وهي مبتسمه.. ملاك: كفو ابو ريالين.. قربت من نوره وضمتها.. ملاك: شكرااً..الله لا يخلينا منك.. نزلت دمعة ملاك بالغصب..ذكرت ان نوره بتتزوج وبتتركهم أو بالاصح بتروح بعيد عنهم.. نوره: ملاك ..ليه الدموع.. ملاك: لا..بس باشتاق لك.. نوره: طيب اسمعي ..المفاجأه الثانيه تخالف كلامك.. ملاك استغربت ومسحت دمعتها الي نزلت غصب: وشلون.. نوره: انا قلت لك ..مفاجأه تلو الآخرى.. ملاك: ياربيه..انتي تعرفين تحمسين الواحد..لازم تتشتغلين في مجال الدعايات.. نوره: والله مالي خلق..تخيلي شكلي ماسكه فيري واقول"كوني زوجة وام صالحه"..ويييييين.. ملاك:هههههههههههه.. نوره: يالله ..الهديه الثانيه في الليل بقولها لك.. ملاك: يووه بجلس استنا لما يجي الليل... نوره: معليش .. ملاك: عشانك بستنى.. نوره: بطله..وشاطره..واصبري شوي بجيب من غرفتي ستيكر نجمه عشان احطه بجبهتك.. ملاك:هههههههه..بجد كره الجامعه كلها منها ..ماألحق على تحشيشك ..مابعد النوم.. نوره: عفواً تسبيني ولا تمدحيني.. ملاك: ماعاش من يسبك.. نوره: اجل عاش مرقع.. ملاك: طيب تقريباً ..تقريباً ..متى بتقولين لي الخبر ... نوره: اسمعي نواره بتجي اليوم ..واذا جت باقول لك... ملاك : اوكيه.. نوره :يالله بروح لغرفتي..(يوم وصلت للباب..لفت على ملاك) ايه صح انتي فاضيه اليوم.. ملاك: ايه ..بس ليه.. نوره: سؤال بس.. ملاك: اوكيه..يالله باي.. نوره: جوعااانه ..تنزلين معي نحوس في المطبخ..نسوي لنا فطور.. ملاك: يالله... نزلوا تحت للمطبخ وبدوا يحوسون في المطبخ ..في الاخير سوو اندومي..بالطريقه الصينيه<<خخخخخ ============================= |
|
| |
|
| الإشارات المرجعية |
| أدوات الموضوع | |
مواضيع مشابهة | ||||
| الموضوع | الكاتب | المنتدى | الردود | آخر مشاركة |
| رواية ملاك حبي - رواية رومنسية | رغوده الاموره | روايات تعب قلبي | 25 | 25-09-11 01:32 PM |
| روايتي رواية وين انت عني انا ؟!! رومانسية | ana 3beer | روايات تعب قلبي | 8 | 26-06-11 10:27 PM |
| رواية لك مني سلاامي يامن ملك احساسي - روايتي الاولى | همسات شجوني | روايات تعب قلبي | 13 | 08-10-10 07:16 PM |
| رواية شباب وبنات - روايتي الاولى | بشاير الغامدي | روايات تعب قلبي | 19 | 20-09-10 06:50 AM |
| رواية من دونك اتدمر - روايتي الاولى | ٌالمـ...شآكـــس oٌ | روايات تعب قلبي | 6 | 31-07-10 07:47 AM |
