روايتي رواية ملاك الروح..غرقانه في بحر الذكريات..رواية من تأليفي..

[بنوته خجوله]

هااااي انا محترمه قرارك ومقدرته ان ما لهم حق انهم يسرقون روايتك
واذا على الردود انا عارفه ان ما فيه حد يردك عليك بس على الاقل كملي
الروايه عشاني
تحياتي
بنوته خجوله

[عهود2008]

والي يسلمك كمليها بليييييزوترى بليز تهز حريم حبيبتي تكفين قلنا كل الكلام أنشاء الله تشجعتي

[**MoOn LiGht**]

بصراحه هالأجازه خايسه مايمديني اكح حتى..
لاشغاله ولا سواق ..
حتى بيتنا منب فيه عشان تصليحات تكسير وماادري ايش..

يعني ظروفي مخليتني اسحب على الروايه.. بس عشان عيونك يابنوته خجوله..وعهود2008 بعطيكم الي متوفر الحين.. مو كثير بس ماعليه...

[**MoOn LiGht**]

الجزء الخامس


كانت ملاك جالسه في غرفتها مافيها نوم..تحس بتكه.. ولسا هي مرتبكه ..خايفه تجيب معدل شين في الاختبارات....
حست ان النوم مره ميح ساحب عليها..قامت بتجيب من الدرج كتاب تقراه ..كانت تحب هالكتاب كان عن قصه رومانسيه ..كان هالكتاب مليان باحلامها..اخذته وجلست تقراه..حست انه النوم جاها صكرت الكتاب والسهاريه.. وانسدحت..يوم حست انها خلاص نامت سمعت صوت الباب ينفتح..

فتحت ملاك عيونها بس مع النور الي برا غطتها..
نوره: ملاك انتي قايمه..
ملاك وصوتها كله نوم: تقريباً..
نوره: وشلون يعني اروح..
ملاك جلست: لا عادي هلا ..(ذكرت ملاك ان نوره راجعه من بعد الطلعه الي مع عبدالعزيز)..
ملاك باستغراب: نوره ..توكْ جايه..
نوره: لا..من زمان بس رحت تروشت وبدلت..
ملاك: طيب قولي لي وش صار..
نوره: يعني وش صار..بس والله انه كل الي تمنيته..وهو الي كنت استناه..
ملاك نزلت عيونها وذكرت شكل عبدالله..
نوره رفعت راس ملاك بيدها: وش فيك...
ملاك: لابس ذكرت شي..
نوره: وشو..
ملاك ابتسمت : سلامتك..
نوره: افا ياملاك..عندك شي وماتقولين لي..
ملاك: مو شي مهم ..ماادري وش السالفه بالظبط..
قامت نوره من الكرسي وجلست ع السرير: قولي لي..
ملاك: اوكيه...

قالت لها عن سالفتها يوم كانت نايمه عند منال والموقف هذاك..

ملاك: هاه .. وش رايك..
نوره طقت ملاك مع كتفها: يالدبه كل هذا صاير ولا قلتي لي..
ملاك:ههههههههههه..تخيلي اجيك متحمسه واقول لك السالفه ..مالي داعي..
نوره: لا عادي..طيب هذا الي ضيق صدرك..
ملاك: لا يانوره..حتى بعدها رحت مع منال لمطعم وكان هو الي بيرجعنا..
نوره: نفسه..عبدالله..
ملاك: ايوه..
نوره ابتسمت: مين قدك.. ..طيب ملوكي هو وينه..
ملاك: مسافر..من ذاك اليوم حتى الان ماشفته.. ولاطعت انساه..
نوره : طيب انتي تحبينه..
ملاك: نوره..وين قاعدين احنا..ماشفته ولاراح اشوفه ..وبحبه مااقدر..وبعدين ماراح يرجع الا بعد سنتين ..وبيجلس شوي وبيروح..
نوره: اهاا..طيب هالبثر خالد داري عن الموقف..
ملاك: والله مدري عنه..بس احس اني اذا جلست مع منال ولا طحت معاها بموقف ..احس اني غبيه..
نوره:هههههههههه..غبيه مره وحده..
ملاك : يالله عاد ..خليني على جنب..وش صار اليوم..(رفعت المفرش عشان تجي نوره جنبها)..
جلست نوره جنبها وقالت لها كل شي بالتفصيل..

نوره: ملاك تخيلي يوم دخلت سلم علي وباس يدي..حسيت اني وناسه...
ملاك: احلى والله انه رومانسي واحنا ماندري..
نوره: تخيلي ياملاك ..طلع غيير الي كنت اظنه..طلع احلى واحد في العالم..
ملاك رفعت يدها: يارب ..يارب ..يجيني واحد زي عبدالعزيز..ولو انه مافيه زيه..
نوره : ملاك ابي اظمك..
ملاك خافت ..لان نوره اذا جت بتحظن احد ..تعصره من قلب..
ملاك: لااااا..(ماامدى ملاك تنحاش الا نوره لقطتها..)

ملاك تزاعق وهي مفعوصه: آآآآآآآي ..
تركتها نوره..
ملاك: الله يقطع بليسك..اول كنت اقول الافلام كارتون لعابين اذا قالوا مااقدر اتنفس..بس الحين اكتشفت انه واقع لا خيال..
نوره: ياربيه شكراً..عندي احلى حياة...لا ويوم كنت صغيره كنت اقول اشين حياة حياتي..الحين اقول انا كنت غلطانه 100%..عندي ماما وبابا..وعندي عزوز..وعندي ملوكه..واخواني..
ملاك: حسافه..طول هالسنين احاول اخربها في الاخير تحطيني مع قائمة الي مزينين حياتك..
نوره: تبين اطقك قولي لي..مو لازم تحوسين وتدوسين..
ملاك: طقيني ..كل شي منك حلو..
نوره: يالله بجد مايسوى علي ..من هنا يخققوني ..ومن هناك بعد..لاا وهذا بعد قبل مااتزوج توني..
ملاك: تذكري مقولت ابو العيال.."ورا السواهي دواهي"..
نوره: وش قصدك يالدبه..
ملاك: ماادري..واذا غلطت فسوري..
نوره:انتي عارفه انك غالطه بس لاتصرفين..
ملاك: يازينك بس..

دق جوال ملاك..
ملاك انتبهت لجوالها الي كان ياشر لانها حاطته ع السايلنت..مسكت الجوال لقتها منال المتصله..
لفت ملاك على نوره: نورتي عادي ارد..
نوره: وانا وش علي ردي..
ملاك: اوكي..

ملاك: ألوووو..
منال وباين على صوتها انها متحمسه: ملاك ملوكي ملوكه..
ملاك استغربت منال ..منال تدلعها: هلا هلا وش فيك..
منال: حمد جايب لي هديه..
ملاك: والله..غريبه..
منال: والله العظيم..مرسلها مع اخوه نواف..
ملاك: حركاات ..مين قدك..
منال: بس دب..كاتب لاتفتحينها الا بعد الاختبار الاول..
ملاك: عارف انك ماراح تحلين زين ف أخذ احتياطه وقال بعد الاختبار تفتحينها وترتاحين شوي..
منال: الله العالم مين الي بيجيب درجه شينه....مين الي طالع اليوم..
ملاك: انا وسوير..ونواره جت معانا بعد..والله كان خبال..ووناسه..
منال: اكيد وناسه بدوني..
ملاك: هههههه طيب انا وش قلت..
منال: ماادري بس اليوم انتي صايره تحطمين بزياده..
ملاك: والله انك صادقه..بحاول اخفف..
منال: ابي افتحها ابي اشوف وش جواها..
ملاك:لا لا تخربين على نفسك..
منال: تدرين ان خالد هو الي مناديني عشان اخذ الهديه..
ملاك: يووه..واخوك مخربها عادي عنده..
منال: والله ماادري انا مستغربه بعد..والمشكله يقولها ببرود..
ملاك: هههههههههه والله بجد اخوك محشش..
منال: هذا شي زين بعض الاحيان والبعض الثاني لا مو زين مره..
ملاك: ياحليلك..
منال: تسلمين ياوخيتي...يالله بصكر اخاف خالد يدخل علي في أي لحظه ويستفسر عن حركة حمد..
ملاك: هههههه يالله باي..
منال: باي ..

صكت ملاك ...ولفت تبي تشوف نوره...لقتها نايمه شكلها كانت تعبانه من التوتر الي جاها اليوم..
طفت ملاك السرايه ونامت وجنبها نوره..


================================================== =======


ساره كانت جالسه بغرفتها تفكر ..تبي تعرف مين هذاك الي حاس احوال نواره ..
ساره(يالله ابي ادق عليه اشوف ..ابي اعرف وش سالفته .. ابي اعرف ليه ترك نواره ..يمكن هو سبب قوي ....هو قال انه في احد حاس عليه وهدده بنواره..ابي اعرف مين هو...مااتوقع انه محمد..لاااا ... بس شكله برئ ..احس ان فيه احد خرب عليهم واذا طلع صادق برجعه لنواره مهما كان... يووه نسيت مشاري.. يارب تجيب الاحسن ل نواره والشين تبعده عنها..)..

قطع حبل افكارها صوت طق الباب..
ساره: مين..
فهد: انا ..
ساره قامت وفتحت الباب: هلا والله بفهودي..جت سحر..
فهد: ايوه ماما تحت..
ساره: متى جيتو..
فهد: من زمان بس انتي وخالتي نواره ماكنتوا فيه ..ورجعت خالتي نواره بلحالها بعدين..
ساره: معليش كنت مع صديقتي ملاك... فهودي امك تحت..
فهد: ايوه..
ساره: تعال معي يالله بسلم عليها..

مسكت ساره يد فهد نزلت ولقت سحر جالسه عند التلفزيون..
ساره: هلا والله بسحر توه ينور البيت..
سحر: لاا توك تنزلين وش بعده .. الحين بيجي سعود وبياخذني انا وفهودي..
ساره: لا لا لا ..احنا عندنا نظام جديد مافيه احد يجي للبيت ويطلع وهو ماجلس مع كل شخص اكثر من 12 ساعه بالقليل..
سحر: ماشاء الله الانظمه بدت تطلع يوم طلعت من البيت..
ساره: لا ..اصلا ماطلعت الا عشانك..
سحر: تسلمين ..الا وش فيها نواره..
ساره استغربت: ليه وش الي خلاك تقولين ان فيها شي..
سحر : ماادري..بس كانت طالعه معاكم ويوم رجعت مانتبهت لي الايوم ناديتها سلمت علي وهي ضايق صدرها ورقت لغرفتها .. ليه وش عندها؟؟
ساره عرفت ان نواره ماكانت بس تحبه الا كانت ميته عليه..
سحر: ياألوووه..ليه..
ساره: ماعنديش أي فكره..
سحر: المهم يمكن كانت تعبانه..اسمعي ياحلوه ترا انا بس عشاني اختك مازعلت منك..بس بين قوسين ..وش مطلعك وعليك اختبارات..
ساره عطتها نظرة براءه: انا ذاكرت وخلصت ..هاه..وبعدين مليت وطلعت..
سحر: ماتعيدينها ياسنعه فاهمه..
ساره: لا وش هالملل..حرام عليك..
سحر: طيب ذاكري يالمجنونه ..ولا بتطلع النتايج زي كل سنه ..
ساره: لا اصلا هالسنه استحيت كل صديقاتي ينقبون اسنانهم من اثار الكتاب وانا مااعرف اسم الماده اصلا فقلت بصير زيهم..
سحر: قويه ..ينقبون اسنانهم مره وحده...
ساره: تعرفيني انا انجح في البلاغه بس..
سحر: لا اسمحي لي ..بس انتي تنجحين في الملاغه بس..
ساره: يحليلك والله..لك وحشه انتي وثقالة دمه..
سحر: مااشتقتي لشي ثاني بعد..
ساره: وشو يعني..
سحر: ماادري يمكن طقي..
ساره: طقي وينطق ولدك..
سحر: جربي تلمسين شعره من راس فهود..
ساره: لاتتحدين..
سحر: لا بتحدا لانك ماراح تضمنين انك راح تعيشين لين بكره..
طمرت ساره من مكانها تبي تروح عند فهد... قامت سحر وراها..

كان فهد جالس يلعب بلايستيشن بريييييء مايدري وش السالفه...شوي طبت عليه ساره وامه...ارتاع..ويحس ان نظره بدى يضبب..اثاريها الدموع خااااف ..
ساره نفذت التحدي ولمست شعره بس..
سحر شافت ولدها يصيح ..وساره قامت عشان تلمس شعره على بالها عندها سالفه..

شالت سحر فهد الي من الروعه يصيح بقوه..
سحر: الله يحوسك يالخايسه صيحتي ولدك..
ساره: والله ولدك هو الخكري انا بس لمست شعره..
سحر: وبعطيك سبب عشانك لمستي شعره..
ساره:هههههههههه....(وهي تكلم فهد)..فهودي ..انتا تصيح..
فهد كان يشاهق من الصياح..
سحر: لا والله..لو انا في مكانه كان طاح قلبي..
ساره: والله عاد الولد طالع على امه وهاذي مو مشكلتي..
سحر: يالله ..ياليتك مانزلتي..
ساره: الا سحر..وش مقوم ولدك في عز الليل تراه بزر ..ولا من اولها تحسسينه انه رجال..هههههه
سحر: ياشيخه صيري زي نواره..هاجده ومؤدبه..
ساره: لا بس اليوم ناط فيني عرق معليش..وجيبي اهدي فهودي..
سحر: والله ماتنظمنين..
ساره: فهودي ترا كنا نلعب انا وامك..
فهد هجد شوي عن قبل..: ماما ماتلعب..
ساره: انتي معقده ولدك ولا مسويه كبيره..
سحر ماسكه اعصابها بس عشان فهد يهجد..
ساره: الا امك تلعب معاي بعض الاحيان..والحين تبي تسترجع ايام الطفوله..ههههه
فهد ابتسم ولو انه مايدري وش تقول ساره بس عشانها ظحكت..
ساره: فهودي كم عمرك انت..
اشر لها فهد باصابعه ..ثلاثه: عمري كذا..ثلاثه..
ساره: ماشاء الله عليك كبير وتصيح افاا..
فهد: لا ماكنت اصيح ..بس عيوني تعورني ..
ساره: ايه اشوى..انا عارفه ان فهودي بطل مايصيح..

سحر كانت متابعه..
سحر: والله عندك خبره بالاطفال..
ساره بعدت شعرها عن وجهها بطريقة غرور: عفوا.. خبره بكل شي..
سحر: واضح..الا ماتعرفين الدائره من المربع..
ساره: لا لاتخافين اعرف..

فهد قام وهو يمسح عيونه ..
فهد: ماما ..بنام هنا صح...
سحر: ماادري يابابا ..بس ليه..
فهد: فيني النوم..
ساره: ياشيخه نامي عندنا..وناسه بقوم الصبح وبلقاك موجوده..
سحر: والله ماادري بس بدق على سعود بقول له..
ساره: اوكي..طيب دقي عليه وانا بروح للمطبخ عطشانه..
سحر: اوكي...

راحت ساره للمطبخ ..فتحت الثلاجه (هذا الشي لازم كل من يدخل المطبخ يسويه)..لقت فيه بقعه صغيره شاني مكبوب...
ساره: الله يقطع البليس..اكيد فهييد هو الي كابه..
اخذت منديل ومسحته من الثلاجه ..صكرت الثلاجه وجت بتكب المنديل لقت بالزباله كوب مكسور..
كانت دايماً تشوف هالكوب كان مكتوب عليه For Ever ♥M+N= ..
تخربطت عندها المعلومات..هذا الكوب تشوفه في غرفة نواره دايماً..وتبي تعرف نواره كسرته ولا هو انكسر..(مستحيل يكون انكسر لحاله ..لانه حتى لو انكسر بيكون له معنى عندها..بس لحظه الحين حرف Mهو حرف مشعل ولامشاري.. يعني ليه كسرته لانها ذكرت مشعل ولا كسرته عشانها خلاص ماتبي مشاري لانها لقت مشعل..آآآخ ياراسي..)..

طب عليها فهد..
فهد: هيه بنام عندكم خالتو ساره..
ساره انتبهت:..والله وناسه..تبي تنام عندي..
فهد: لا بنام مع ماما..
ساره طاح وجهها: احسن روح لامك..بعدين تعال قول لي ابي حلاو ولا أي شي..هء طير بس اذلف روح لامك..انت ماتحبني..
فهد: لا انا احبك ياخالتو ..بس امي ماتصلح تنام بلحالها..
ساره غمزت له: احلى ..مااقدر عليك يارجال انت...طيب انا انام بلحالي..
فهد : لا ماما ماتعودت تنام بلحالها انتي تعودتي..
ساره:يعني الا بتلقا لك مخرج..اوكي روح نام عند امك..

طلعت ساره من المطبخ..
ساره: اشوى وافق يعني..
سحر: ايه وافق..وليه مايوافق ..
ساره: والله بجد عايلتكم تحفه هههه..
سحر : تسبين انتي..
ساره: لابس فهييد..لا قيله مخرج يعني لاقيه..
سحر: ايه هنا المشكله ..
ساره: يالله ياعيوني بروح انام ..خلاص وصلت حدي..
سحر: طيب تصبحين على خير..
ساره: وانتي من اهل الخير..

وبمجرد ماوصلت ساره لغرفتها طبت على السرير طبه ..فقدت احساسها ونامت بعدها..


==================================================


اما عن منال الي متحمسه تبي تعرف وش هالهديه ..و وش الطاري..المهم كانت جالسه في غرفتها ومعليه ع المكيف يقال لي جو يحمس..المهم ومتحمسه وكل دقيقه تلف على الكيسه الي مخليه الدم يغلي بعروق منال من الحماس...اصلا وهي تناظر الفلم هي شبه نايمه..يعني نايمه الا شوي..

سمعت صوت طق الباب..
منال وهي مدروخه: مين..!!
خالد: انا مافي غيري..
منال: نعم..
خالد: افتحي الباب ..بسرعه..
منال اخترشت: هاه..وشو..
قامت وفتحت الباب لخالد..
منال: وشو وش صاير..
خالد: لا بس ابيك تفتحين الباب..
منال ناظرته بنظرة استحقاروهي قالبه خشتها:بايخ..
خالد: ياحليلك ..ماصارت غرفه ..تقول الاسكيمو هنا..
منال: وش عليك انت انا مثل الدب القطبي احب البرد..
خالد: للمعلوميه ترا كلمتك فيها سب لك..
منال: معذوره..فيني النوم..
خالد: طيب نامي .. وش الي حادك تتابعين الفلم من البدايه..
منال: لانه بيصير اخر فلم اشوفه اثناء فترة الاختبارات..
خالد: ايه..كلام فاضي..
منال: طيب استسلمت ..خلاص برقد ..بنام..با سلييب..باخمد..
خالد: والله انك تحفه وانتي دايخه ..
منال: طيب انت جاي وش تبي..
خالد: لا بس جيت بمر على اختي ..
منال: الله العالم ..والله شكلك يقول تبي تعرف وش جاب الاخ..
خالد من اول ماشاف البنت مدروخه غسل يده:تقريباً..
منال: علمي علمك..
خالد: يعني وشو ماتعرفين..
منال: يس..
خالد: ليه مسويه ثقل..
منال: لا خويك الي مسوي سنع يقول لاتفتحينها الحين خليها بعدين..
خالد:والله حركات حمد هذا..
منال: اقول خالد..
خالد:همم..
منال: ممكن تقرفع..ابي انام..
خالد: اوكي ..بس قصري ع المكيف مو تمرضين بايام الاختبارات..
منال: انت بس تامر امر..
خالد: غوود نايت..
منال: سايم تو يو..

================================================

[**MoOn LiGht**]

================================================


قامت ملاك من النوم ..حست ان راسها ثقيل..لفت تبي تشوف نوره كانت شكل نوره وحده تعبااااانه .. قامت ملاك بهدووء ودخلت الحمام بتتروش..

نوره سمعت صوت باب الحمام وقامت من النوم..طبعاً تعرفون ردة فعل الشخص اذا قام من النوم ولقى نفسه في مكان مو متعود عليه .. المهم قامت نوره وراحت لغرفتها..

طلعت ملاك من الشاوار ومالقت نوره ..(غريبه متى قامت ولا مين قومها..مايهم..)

نوره كانت بغرفتها وماسكه الجوال: الله يقطلع البليس كم مره دق عزيز ياربيـــــــه ياليتني مانمت عند ملاك كان رديت عليه احسن لي..اقول ادق اشوف وش كان يبي احسن بكثير..

دقت نوره على عبدالعزيز..
نوره:رد..رد..رد..(رد عبدالعزيز)..ألووو..
عبدالعزيز:..هلا والله بالطش والرش..
نوره خقت:هلا فيك..عبدالعزيز هلا داق علي كم من مره!!..
عبدالعزيز: يووه يعني مااشتقتي لي..
نوره: افاا عليك انا بكل رمشة عين انسى عمري بدونك..<<اعرب الجمله الاتيه ..
حست نوره ان كلامها لحس شوي..
عبدالعزيز حس انها ملحوسه شوي فسلك لها:ههههههههه ياعمري..
نوره: معليش كلامي خرابيط..
عبدالعزيز: لا عادي معذوره..ايوه ..دقت عليك عشان اسألك اشتقتي لي؟؟..امزح امزح...لا دقيت عشان اعطيك شي بس مارديتي قلت اعطيك اياه بعدين..
نوره تحمست: وشو يعني..
عبدالعزيز:هديه..
نوره: خلاص والله غرقتني بالهدايا خلاص .. شوفتك هديه..
عبدالعزيز: تسلمين..
نوره حست انها خربتها شوي..
نوره استحت:قصــدي..اااا..
عبدالعزيز: فاهم والله فاهم وخاااق بعد..
نوره:الله يصلحك بس تبي تذبحني ترى حالتي صعبه الحين..
عبدالعزيز يستهبل ويجرب حظه: عشانك ماراح تشوفيني اليوم..صح؟
نوره: تقريباً..
عبدالعزيز: وشلون يعني ايه ولا لا حددي موقفك..
نوره خذت اسلوبه: صراحه ..اممم.. لا..
عبدالعزيز: زين لاني مشغول اليوم واذا قلتي ايه بضطر اني اخليك تشوفيني..
نوره فتحت عيونها موقفها انها تزاعق من جوا:................
عبدالعزيز:ههههههههه معاي ..
نوره: ايه بس ..لهيت شوي..وش قلت..
عبدالعزيز: اقول زين...(قاطعته نوره)..
نوره: سمعت سمعت تبيني اخق مره ثانيه..
عبدالعزيز: اقول ممكن طلب..
نوره: آآمر عيوني لك..معليش تراني مهويه اليوم فالتها..
عبدالعزيز: هذا الكلام ولا بلاش خربيها كل يوم اوك..ههههههه
نوره:طــيب تحمست هلا وش تبي..
عبدالعزيز: لا الطلب هذا ابي اقوله ل...ايه لملاك..
نوره استغربت: ملاك !!!؟؟؟
عبدالعزيز: لانك ماتقدرين تسوينه..يعني قصدي..قصدي لازم احد ثاني يسويه مو انتي..
نوره: طيب وشلون بتقوله لملاك؟؟
عبدالعزيز :برسل لها رساله..
نوره: يعني تاخذ رقمها؟؟؟؟؟
عبدالعزيز: ماااااادري بس لازم فيه طريقه..
نوره : طيب بالماس..
عبدالعزيز: يعني ااخذ ايميلها؟؟
نوره: لا عندها ايميل ماتستخدمه تاخذه وتقول لها طلبك بس ياويلك ان طلع الطلب بايخ..ترى بطلع حرتي بالبنت..
عبدالعزيز: طيب هي وش ذنبها هههههه..
نوره:لا يعني ااخذ احتياطي ..
عبدالعزيز وهو مستانس ع طريقة نوره في الترقيع: على حسابها..
نوره: لا..يعني..المهم بااعطيها خبر قبل مااعطيك ايميلها..
عبدالعزيز :اوكي..
نوره : اوكي..يالله بدي اتروش..
عبدالعزيز: اوكي..نعيماً مقدما..
نوره: الله ينعم عليك مقدما تو..يالله باااي..
عبدالعزيز: باي..

سكرت نوره واخذت الروب وراحت تتروش...

==================================================

ملاك كانت جالسه ع السرير (آآآآآه ملل..مالي خلق اذاكر...مااودي افطر بالبيت ..اوكي بدق على منال وبجرب حظي بمكن ترد علي وتكون رايقه نطلع انا وياها...)
مسكت جوالها ودقت على منال:يارب توافق .... يارب توافق..(ردت منال)..هلا والله بالحلا كله..صباح الخير باحلى البنات..>>مصالح خخخخ
منال بصوت هادي وبدون أي ردة فعل: اهلين..
ملاك استغربت ..منال دون ردة فعل!! : سلامات وش فيك..
منال: ابد بس مريضه..
ملاك: امس كلمتك مافيك الا العافيه..
منال وصوتها كله مرض: كله مني لو اني سمعت كلام خالد يقول لي برد بس انا كنت عديمة احساس لاني ماكنت موجوده بهالعالم اصلا..
ملاك: سلااااااامتك ..
منال: الله يسلمك..
ملاك: انظري الى الجانب المشرق .. بتجلسين بالبيت عشان تذاكرين..
منال ضاق صدرها: ياربيــــه بجلس اذاكر مالي خلق ..
ملاك: كلنا مالنا خلق بس الحياة تعلم الشطار...تحرييييف ههههه..
منال:ههههه معليش الحياة صعبه ..هلا شو كنتي عاوزه..
ملاك ماحبت تقول لها انها كانت داقه عشان تطلب منها انها تروح معاها لان منال مريضه الحين: لا بس حبيت اسلم عليك واقول لك ذاكري زين..
منال: علينــــــــــــا...
ملاك انفضحت: طيب..كاشفتني..لا بس كنت بسألك اذا بتفطرين معاي برى بس شكل حالتك صعبه فسحبت الطلب...
منال: لا عادي بروح معاك..
ملاك: عشان كذا سحبت كلامي اصلا خلاص تأخر الوقت مافي احد يفطر الحين..
منال: ايه واضح..اقول روقينا بس بروح معاك تبين امررك..
ملاك: لا تمرين ولا يحزنون..وبعدين اجلسي ذاكري عشان تفتحين الهديه..ولا ماتبين..
منال:هاه..الا اكيد ابي ..

انفتح باب غرفة منال بقوه وارتاعت..طلع خالد هو الي فاتح الباب ...هو بس شافها طمرت مات ظحك عليها..

منال وصلت حدها: خييييير وش تبي نعم ..يابايخ اذلف يالله ..انقلع..
خالد لسا يظحك:هههههه..
منال قامت عشان تخبط خالد بس عشانها مريضه اوجعها راسها وطاحت ع الارض..
خالد ارتاع لان منال طاحت (طبعاً كل هذا صار والسماعه مفتوحه)..
خالد وهو مرتاع: منال ش فيك ..منال..
ملاك ارتاعت ماحبت تسكر تبي تعرف وش فيها منال..
منال بصوت كله تعب: اااه ياراسي..
خالد: وش فيك انتي..
منال:راسي يعورني ..
خالد: كله من امس يالدب القطبي ..
منال: والله تعبانه ..
خالد : اوديك للمستشفى؟؟
منال:لا مافيني الا العافيه..

ملاك ارتاحت قالت خليني اسكر احسن لي..

خالد: متأكده..
منال بهدوء: ايوه...

=========================================

ساره كانت توها قايمه من النوم مااستوعبت ان وضعها غلط نايمه نومه غبيه من بعد طبة امس
مسكت راسها حست انها داااايخه قامت جلست شوي تستوعب الوضع .. ذكرت نواره و مشعل ..
ساره ( يالله عليك ياوخيتي .. آه بس لو اعرف وش احسن شي لك.. مو لا زم اسال مشعل ابي اسال نواره بنفسها.. عشان ماتزعل مني لاني طبيت..)

كانت ساره غرقااااانه ..تفكر .. ساهيه..مفهيه..كل وصف معناه مو موجوده على الخط..
كذا في لحظه ماتدري الا انها نطت نطه محترمه من مكانها وطاحت من السرير ... جاها واحد طااير وفتح الباب فتحه نعمه من ربي انها مانهبلت..اثاريه محمد داخل عليها وهو معصب .. شافها فزت حس انه بينفجر ظحك بس مسكها عشان مايخرب التعصيبه..
ساره ابرء من ردة فعلها مافيه ..
ساره بكل براءه رفعت عيونها: ..........
محمد استغرب طارت حواجبه حس ان اخته سكرانه <<يعني وش متوقع من وحده توها قايمه
ساره بنظره برييييئه:...هاه..
محمد هنا ماقدر يمسك نفسه مع انه ماسكها بقوة......
ابتسم وطلعت ظحكه صغيره لسا ماخربها:هي انتي يالسكرانه ..

ساره هنا بدا يرتفع صوتها:..نعم..نــعــم...وش تــــبــي الحين..(قامت وهي رافعه يدها ..وتقدمت عنده) ..خير..وش تبي ...افرض الحين انا ميته.. انت بس ..بس تخيل..
محمد ارتاع يقول البنت استنزلت: هي ترا انتي الي ازعجتيني وانا نايم..فيه احد يستهبل يطق الباب ويروح..
منال وهي تصارخ: ليه يالاخ اشتقت لايام الطفوله وانا ليه افكر اني اقبل حتى على غرفتك....انت ناسي ان سحر الله يخليها عندها بزر..
محمد: وش دخل سحر .. انا اكلمك انتي الحين.( ذكر محمد ان سحر موجوده ..واذا سحر موجوده ..يعني فهد موجود)..
ساره: الله يحوسك ..جعلك ان شاءالله ال ماني بقايله..
محمد يبي يلحق على نفسه قبل ماتسطره كف والله ينخاف منها..
محمد: يووه .. خلاص .. انا اصلا جاي اقول لك...(( مالقى له صرفه...شاف الشماغ على كتفه))..انا جاي اقول لك لي سنتين وانا انتظرك تكوين شماغي ماكويتيه..
ساره: مايحلو الشماغ الا اذا كويته.. روح عند الشغاله ماوراها لاشغل ولا مشغله..
محمد: خلاص طيب لاتصارخين..لاخليك تتحسفين على ام من جابتك..
ساره عصبت ..شافته راح ردعت بالباب..
هدت الوضع شويه ..
يوم حست انها ارتاحت.. خبط الباب مره ثانيه..
ودخل عليها بزر مسفففح.. رقى على سريرها وجلس ينطط..
هنا ساره غطت وجهها بيدها وحست انها بتصيح..
ساره بهدوء: يالــلــه صبرني..
شوي الا دخلت سحر .. تلاحق هالبثر..
سحر: فهد انزل وتعال بسرعه.. يالله بابا جاء بنروح..
جلس فهد عالسرير وضم ساره.. صارت يديه ملفوفه حول رقبتها..

فهد: خالتو ساره صح ماتبيني اروح..
ساره بهدوء وهي تتنهد: ياللله..لا بس بابا يزعل ماعنده لا ماما ولا فهد..
فهد: تروح ماما وانا اجلس معاك ومعا خالتو نواره..
ساره: اوكي ..اجلس الحين ماما وبابا بيروحون ....وانت بتجلس معانا بدون ماما وبابا..
فهد سكت شويه...
فهد: هما انا ..هاه..تعبان..بروح مع ماما عشان تعطيني الدواء..
وطمر فهد راح يجيب جزمته..
سحر تطالع ساره وااضح انها تبي تفتك منه فصارت تسلك له عشان يذلف..
سحر: ساره .. وش فيك..
ساره بدون نفس وهي منسدحه : ولا شي..
سحر: طيب مشكوره..
ساره: ماي بليجر..

طلعت سحر من غرفة ساره وهي على راسها اكبر علامات تعجب..!!!

قامت ساره وراحت سنعت الوضع..

================================================== ======

كانت نوره توها مروقه ..تروشت وافطرت ..ومن الملل يتجه كل انسان الا الt.v لطرد الملل...جلست تقلب فهالقنوات على امل تلقى لها شي صاحي... جلست تقرى الsms في قناة من القنوات...واغلب البنات كاتبين حبيبة مهند..او عاشقة مهند..او خرابيط باشكالها لمهند..
نوره بصوت خافت: ماصارت مهند ومهند..انا ماابي مهند انا عندي غلاتي عزوز..وه بس..
وجلست تغير شوي الا نزلت ملاك من الدرج بتجلس في الصاله..
نوره انتبهت لملاك: هلا والله..
ملاك:اهلين..
نوره: سلامات وش فيك خامده..
ملاك: مافيني شي بس اليوم كأيب وجلست اذاكر شويه ومليت..ومابقى الا اسبوع على الاختبارات..
نوره: هي انتي ..ذاكري زين مو تسقطين..
ملاك: لاتخافين ان شاءالله ماراح اسقط..
نوره: طيب اسمعي يالدبه..
ملاك: عفواَ تكلميني..
نوره: لا الجدار..ايه انتي..
ملاك: مااشوف شحوم عندي ..لاتقولين لي يالدبه..
نوره: يصير خير..الـــمـــهــــم..
ملاك: ايه..
نوره: عبدالعزيز يبي ياخذ ايميلك..
ملاك طالعتها وحكت اذنها: عفواّ عيدي ماسمعت..
نوره: اقول عبدالعزيز يبي يكلمك ..فعطيه ايميلك..
ملاك: وين قاعدين احنا..في حراج بنو قاسم..
نوره: يقول بيطلب منك طلب ..وبيحذفك على طول بعدها..وعطيه الايميل الي ماتستخدمينه اذا تبين..
ملاك: وش الطاري طيب..وانتي بعد خلاص ..اذا صار زوجك عسل لاتلحسه كله..
نوره: اقول انطمي قال بيطلب ماقال بيجيب..
ملاك: وش يدريك يمكن بيطلب مني مواصفات الي بيجيبه..
نوره: مااتوقع انا بنبهه ان جاب شي بنتفه..
ملاك: تنتفينه بالعافيه..((ولفت ظهرها واتجهت للمطبخ))..
نوره: بايخه...(( مسكت نوره شريط الgameboy الي قدامها ...ووجهته على ملاك من النعمه انه صقع بالجدار..))..
ملاك ارتاعت: نوره انتي سكرانه .. والله ان ربي راحمني ومن نعمة الله ان تصوبيك خايس..
نوره:ملاك يمكن ماجاك شي حتى الان بس بيجيك شي عن قريب يخبط راسك ينسيك ام من جابتك..
ملاك: نوره.. عالأيميل عطيه ايميلي الي مااستعمله..بس اذا طلب مني شي مااقدر عليه.. مالي شغل لافيك ولافيه..
نوره: اوكيه..هذا الي ابيه من قبل..
ملاك: وكل الي تبينه يجيك..وهنا تكمن المشكله..
نوره لفت على التلفزيون..:ماااسمعك ولا ابي اسمع..
ملاك: احسن لك..يادلوعه..
نوره: والله الدلع لك انتي ياmiss malak..
ملاك: وأفتخر.. اهم شي انه لابق علي..
نوره: اموت ع الثقه انا..
ملاك: تبين شي من المطبخ..
نوره: لاشكراّ..
ملاك: اوكي ..باخذ لي شي وبرقى فوق اكمل المذاكره..
نوره: اوكي..

******************************************

to be continue
....يتبع...





وان شاءالله اول مااكمل هالبارت الخامس بانزله ويمكن أتاخر عليكم لان بقالي اكتب يمكن12 صفحه وبحطه يصير البارت الخامس خلص وبأبدا بالسادس
تحياتي.. Evame